കണ്ണൂര്: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില് പൂര്ത്തീകരിച്ച പ്രവൃത്തികളുടെ എല്ലാ വിവരങ്ങളും ഇന്റര്നെറ്റിലൂടെ അറിയുന്നതിനുള്ള സംവിധാനം നിലവില് വരുന്നു. ജിയോ -ടാഗിംഗ് നടപ്പിലാക്കുന്നതിലൂടെ പ്രവൃത്തികളുടെ ഫോട്ടോകള്, തൊഴില് ദിനങ്ങള്, ചെലവു വിവരങ്ങള് എന്നിവ പ്രവൃത്തി നടന്ന സ്ഥലത്തിന്റെ വിശദാംശങ്ങള് സഹിതം ഭുവന് എന്ന സൈറ്റില് ലഭ്യമാകും. ഐഎസ്ആര്ഒയുടെ ഘടക സ്ഥാപനമായ നാഷണല് റിമോട്ട് സെന്സിങ്ങ് സെന്ററാണ് ഭുവന് തയ്യാറാക്കിയത്.
ജിയോ-ടാഗിഗ് നടപ്പാക്കുന്നതിനായി എഞ്ചിനീയര്മാര്ക്കുള്ള പരിശീലനം കലക്ടറേറ്റില് നടന്നു. ഗ്രാമ വികസന വകുപ്പ് അഡീഷണല് ഡവലപ്മെന്റ് കമ്മീഷണര് ഡോ.പി.കെ.സനില്കുമാര്, പിഎയു പ്രൊജക്ട് ഡയറക്ടര് കെ.എം.രാമകൃഷ്ണന് എന്നിവര് നേതൃത്വം നല്കി.
തൊഴിലുറപ്പ് പദ്ധതിയില് മറ്റ് സംസ്ഥാന-കേന്ദ്രാവിഷ്കൃത പദ്ധതികളുടെ സംയോജന സാധ്യതകള്, സ്ഥിരമായ ആസ്തി നിര്മ്മാണത്തിനുള്ള മുന്തിയ പരിഗണന, തൊഴില് ദിനങ്ങള് വര്ദ്ധിപ്പിക്കല്, അംഗന്വാടി നിര്മ്മാണം, മാലിന്യ സംസ്കരണ സംവിധാനങ്ങള് തയ്യാറാക്കല് എന്നിവ സംബന്ധിച്ച് ബ്ലോക്ക് തലത്തില് ശില്പശാലകള് സംഘടിപ്പിക്കുന്നതിന് തീരുമാനിച്ചു. അസി.പ്രൊജക്ട് ഓഫീസര് വി.കെ.ദിലീപ്, അസി. ഡവലപ്മെന്റ് കമ്മീഷണര് (ജനറല്) കെ.പ്രദീപന്, ജില്ലാ വനിതാക്ഷേമ ഓഫീസര് കെ.ബീന എന്നിവര് സംസാരിച്ചു.
