ഇരിട്ടി: കണ്ണൂരില് കഴിഞ്ഞ ദിവസം നടന്ന സംസ്ഥാന അംബെയ്തുമത്സരത്തില് രണ്ടാം വര്ഷവും തുടര്ച്ചയായി സ്വര്ണ്ണം നേടിക്കൊണ്ട് വേദിക് മുരളി, ഋഷിക രാജഗോപാല്, ദുര്ഗ്ഗാ ജയ്, അനാമിക സുരേഷ് എന്നിവര് കണ്ണൂരിന്റെ അഭിമാന താരങ്ങളായി. മിനി സബ് ജൂനിയര് വിഭാഗത്തില് നടന്ന മത്സരത്തില് ദുര്ഗ്ഗാ ജയ്, വേദിക് മുരളി എന്നിവര് കോമ്പൗണ്ട് വിഭാഗത്തിലും അനാമിക സുരേഷ് റിക്കര്വ് വിഭാഗത്തിലും, ഋഷിക ഇന്ത്യന് റൗണ്ട് വിഭാഗത്തിലും രണ്ടാം വര്ഷവും സ്വര്ണ്ണം നേടി .
എഴുത്തുകാരനും തിരക്കഥാകൃത്തും പഴയകാല സിനിമാനടനും നിര്മ്മാതാവുമായ എ.ആര്.കിഴുത്തള്ളിയുടെ മകളായ വിജയശ്രീയുടെയും ജയമണിയുടെയും മകളാണ് കണ്ണൂര് സെന്റ് തെരേസസ് സ്കൂള് എട്ടാംതരം വിദ്യാര്ത്ഥിനിയായ ദുര്ഗ്ഗാ ജയ്. പേരാവൂര് മുരിങ്ങോടിയിലെ പുഷ്പലതയുടെയും മുരളിയുടെയും മകനായ വേദിക് മുരളി പുന്നാട് നിവേദിതാ വിദ്യാലയത്തിലെ ഒന്പതാം ക്ലാസ് വിദ്യാര്ഥിയാണ്. വിദ്യാനികേതന് സോണല് മത്സരത്തിലും വേദിക് മുരളി ഈ വര്ഷം സ്വര്ണ്ണം നേടിയിരുന്നു. കായികവേദി ജില്ലാ സിക്രട്ടറി കാക്കയങ്ങാട് എടത്തൊട്ടിയിലെ രാജഗോപാലിന്റെയും മഹിളാ മോര്ച്ച മണ്ഡലം പ്രസിഡണ്ട് സീമാ രാജഗോപാലിന്റെയും മകളായ ഋഷിക പാലാ ഗവ.ഹയര്സെക്കന്ഡറി സ്കൂളിലെ ഒന്പതാം തരം വിദ്യാര്ഥിയും ഇന്ത്യന് റൗണ്ടില് ഈ വര്ഷം വെങ്കലം നേടിയ ദശരഥ് രാജഗോപാലിന്റെ സഹോദരിയുമാണ് . ഇരിട്ടി കടത്തും കടവ് സ്വദേശിനിയായ അനാമികാ സുരേഷ് പുല്പ്പള്ളി വിജയ ഹയര്സെക്കന്ഡറി സ്കൂള് പ്ലസ് വണ് വിദ്യാര്ഥിനിയാണ്. ഇതോടെ ഇവര് തിരുപ്പതിയില് വെച്ച് നടക്കുന്ന ദേശീയ ആര്ച്ചറി ചാമ്പ്യന് ഷിപ്പില് പങ്കെടുക്കാനുള്ള അര്ഹത നേടി.
