മുംബൈ: ന്യൂസിലന്ഡിനെതിരായ പരമ്പര നേട്ടത്തില് ആര്. അശ്വിന് പ്രശംസകള്ക്കു നടുവില് നില്ക്കുമ്പോള്, മുന് ഓഫ് സ്പിന്നര് ഹര്ഭജന് സിങ്ങിന് വ്യത്യസ്ത സ്വരം. സ്പിന്നിനെ തുണയ്ക്കുന്ന ഇപ്പോഴത്തെ പിച്ചുകളില് പന്തെറിഞ്ഞുവെങ്കില് കുംബ്ലെയ്ക്കും തനിക്കും ഇതിലേറെ വിക്കറ്റുകള് ലഭിച്ചേനെയെന്ന് ഹര്ഭജന് ട്വീറ്റ് ചെയ്തു.
അതിനു മറുപടിയുമായി നായകന് വിരാട് കോഹ്ലി തന്നെ രംഗത്തെത്തി. തിരിയുന്ന പിച്ചുകളാണെങ്കിലും നന്നായി പന്തെറിഞ്ഞാലേ വിക്കറ്റ് ലഭിക്കൂയെന്ന് വിരാട് പറഞ്ഞു. പന്തിന്റെ വൈവിധ്യവും തോളിന്റെ ഉപയോഗവുമെല്ലാം സ്പിന് ചെയ്യുന്നതില് ഘടകമാണ്. ട്വന്റി20 ലോകകപ്പില് ന്യൂസിലന്ഡ് നമ്മെ തോല്പ്പിച്ചപ്പോള് അവരുടെ സ്പിന്നര്മാരെ എല്ലാവരും പുകഴ്ത്തി. അതേ ബൗളര്മാര് തന്നെയാണ് ടെസ്റ്റിലും പന്തെറിഞ്ഞത്. ഇപ്പോള് ആരും അവരെ കുറിച്ച് സംസാരിക്കുന്നില്ലെന്നും വിരാട് പറഞ്ഞു.
നമ്മുടെ ഫാസ്റ്റ് ബൗളര്മാര് എല്ലാ പിച്ചിലും വിക്കറ്റെടുക്കുന്നു. സ്മിന്റ് പിച്ച് ഒരുക്കിയാല് പോലും ഒരു ബാറ്റ്സ്മാന്റെ മനസില് റണ്ണെടുക്കുന്നതിനെക്കുറിച്ചേ ചിന്തയുണ്ടാകു. നമ്മള് ഒരു പിച്ചിനെക്കുറിച്ചും പരാതി പറയാറില്ലെന്നും വിരാട് കൂട്ടിച്ചേര്ത്തു.
