ഇന്ഡോര്: വിരാട് കോഹ്ലിയും അജിങ്ക്യ രഹാനെയും ബാറ്റ് ചലിപ്പിക്കുന്നതു കണ്ടപ്പോള് ഓടിയൊളിക്കാന് തോന്നിയിട്ടുണ്ടാകും ന്യൂസിലന്ഡ് ബൗളര്മാര്ക്ക്. ആദ്യ ദിനത്തിലെ ആവേശം ഇന്നലെയും ഇരുവരും നിലനിര്ത്തിയപ്പോള് ന്യൂസിലന്ഡിനെതിരായ മൂന്നാം ക്രിക്കറ്റ് ടെസ്റ്റില് ഇന്ത്യയ്ക്ക് വന് സ്കോര്.
കരിയറിലെ രണ്ടാം ഇരട്ട ശതകം തികച്ച വിരാടും (211), എട്ടാം ശതകം നേടിയ അജിങ്ക്യയും (188) ചേര്ന്ന് ഇന്ത്യയെ അഞ്ച് വിക്കറ്റ് നഷ്ടത്തില് 557ലെത്തിച്ചു. മറുപടി തുടങ്ങിയ ന്യൂസിലന്ഡ് രണ്ടാം ദിവസം കളിനിര്ത്തുമ്പോള് വിക്കറ്റ് നഷ്ടമില്ലാതെ 28 റണ്സില്.
രണ്ടു തവണ ഇരട്ട ശതകം നേടുന്ന ആദ്യ ഇന്ത്യന് നായകനെന്ന ബഹുമതിയോടെയാണ് വിരാട് ഇന്നലെ കളം വിട്ടത്. 366 പന്തില് 20 ബൗണ്ടറികള് ആ ബാറ്റില് നിന്ന് പിറന്നു.
210 പന്തില് നിന്ന് മൂന്നക്കം കണ്ട അജിങ്ക്യ, 381 പന്തില് 18 ഫോറും നാലു സിക്സറും സഹിതം 188 റണ്സെടുത്തു. നാട്ടിലെ മൂന്നാം സെഞ്ചുറി മുംബൈ താരത്തിന്. ഇവര് നേടിയ 365 റണ്സ് നാലാം വിക്കറ്റില് ഇന്ത്യയുടെ ഏറ്റവും മികച്ച കൂട്ടുകെട്ട്. 2004ല് ഓസ്ട്രേലിയയ്ക്കെതിരെ സച്ചിന് ടെന്ഡുല്ക്കറും വിവിഎസ് ലക്ഷ്മണും നേടിയ 353 റണ്സ് ഇനി പഴങ്കഥ. ഇന്ത്യയുടെ നാല്, അഞ്ച് ബാറ്റ്സ്മാന്മാര് നൂറ്റമ്പതിനപ്പുറം സ്കോര് ചെയ്യുന്നതും രണ്ടാംതവണ. ഇന്ത്യയുടെ ഏറ്റവും മികച്ച ഏഴാമത്തെ കൂട്ടുകെട്ടാണ് വിരാടും അജിങ്ക്യയും ഇന്ഡോറില് കുറിച്ചത്.
ന്യൂസിലന്ഡിനെതിരെ ഇരട്ട സെഞ്ചുറി നേടുന്ന നാലാമത്തെ നായകനുമായി വിരാട്. മുഹമ്മദ് ഹനീഫ് (203 നോട്ടൗട്ട്), അലന് ബോര്ഡര് (205), സച്ചിന് ടെന്ഡുല്ക്കര് (217) മുന്ഗാമികള്. സച്ചിനു ശേഷം ഈ നേട്ടം കൈവരിക്കുന്നതും വിരാട്.
വിരാടിനെ ജീതന് പട്ടേല് വിക്കറ്റിനു മുന്നില് കുടുക്കിയപ്പോള്, അജിങ്ക്യയെ ട്രെന്റ് ബൗള്ട്ട് വാട്ലിങ്ങിന്റെ കൈയിലെത്തിച്ചു. തുടര്ന്നെത്തിയ രോഹിത് ശര്മയും (51 നോട്ടൗട്ട്), രവീന്ദ്ര ജഡേജയും (17 നോട്ടൗട്ട്) വേഗത്തില് സ്കോര് ചെയ്തു.
രോഹിത് അര്ധശതകം തികച്ചയുടന് ഇന്ത്യ ഇന്നിങ്സ് ഡിക്ലയര് ചെയ്തു. 63 പന്തില് മൂന്നു ഫോറും രണ്ടു സിക്സറും നേടി രോഹിത്. കിവികള്ക്കായി ട്രെന്റ് ബൗള്ട്ടും ജീതന് പട്ടേലും രണ്ടു വീതം വിക്കറ്റെടുത്തു.
സന്ദര്ശകര്ക്കായി മാര്ട്ടിന് ഗുപ്ടിലും (17), ടോം ലാഥവും കരുതലോടെയാണ് ഇന്നിങ്സ് തുടങ്ങിയത്.
