രം
കണ്ണൂര്: കലാസാഹിത്യരംഗങ്ങളില് മികച്ച സംഭാവനകളര്പ്പിച്ച സര്ഗപ്രതിഭകളെ ആദരിക്കുന്നതിനായി കണ്ണൂരിലെ പ്രമുഖ ജ്വല്ലറിയായ കൃഷ്ണാ ജ്വല്സ് വര്ഷംതോറും നല്കിവരാറുള്ള മയില്പ്പീലി പുരസ്കാരദാനച്ചടങ്ങില് ആയുര്വ്വേദ പാരമ്പര്യ ചികിത്സയിലെ സേവനവൈദഗ്ദ്ധ്യത്തെ പരിഗണിച്ച് ഇടൂഴി ഇല്ലം ആയുര്വ്വേദ ഫൗണ്ടേഷന് ചെയര്മാനും ചീഫ് ഫിസിഷ്യനുമായ ഡോ.ഇടൂഴി ഭവദാസന് നമ്പൂതിരിയെയും ആദരിക്കുമെന്ന് പുരസ്കാര സമിതി ചെയര്മാന് കെ.ബാലചന്ദ്രന്, കൃഷ്ണാ ജ്വല്സ് മാനേജിംഗ് പാര്ട്ണറും പുരസ്കാരസമിതി മുഖ്യരക്ഷാധികാരിയുമായ സി.വി.രവീന്ദ്രനാഥ് എന്നിവര് അറിയിച്ചു.
നൂറ്റാണ്ടുകളുടെ പാരമ്പര്യമുള്ള ആയുര്വേദ ചികിത്സയില് അമ്പതുവര്ഷത്തിലേറെയായി വൈദ്യരംഗത്തും പ്രവര്ത്തിക്കുന്ന ഡോക്ടര് മികച്ചൊരു സാമൂഹ്യപ്രവര്ത്തകന് കൂടിയാണ് ഡോ. ഭവദാസന് നമ്പൂതിരി. ആയുര്വേദ ഡോക്ടര്മാര്ക്ക് മാത്രമല്ല കുട്ടികള്ക്കും മെഡിക്കല് സംബന്ധമായ കഌസ്സുകള് നല്കുന്നതില് മുന്നിട്ടുനില്ക്കുന്ന അദ്ദേഹത്തെ തേടി നിരവധി അവാര്ഡുകളെത്തിയിട്ടുണ്ട്. സംസ്ഥാന സര്ക്കാരിന്റെ മികച്ച ആയുര്വേദ ഡോക്ടര്ക്കുള്ള പുരസ്കാരം, കേന്ദ്ര ഗവണ്മെന്റ് ഏര്പ്പെടുത്തിയ രാഷ്ട്രീയ ആയുര്വേദ വിദ്യാപീഠ് നാഷണല് ഫെല്ലോഷിപ്പ്, ആയുര്വേദ ഹോസ്പിറ്റല് മാനേജ്മെന്റ് അസോസിയേഷന് ഏര്പ്പെടുത്തിയ സംസ്ഥാന അവാര്ഡ്, നങ്ങേലി എക്സലന്സ് അവാര്ഡ്, പത്മഭൂഷണ് കെ.രാഘവന് തിരുമുല്പ്പാട് ഫൗണ്ടേഷനും വിദ്യാര്ത്ഥി സേവാ ട്രസ്റ്റ് എന്നിവര് ഏര്പ്പെടുത്തിയആചാര്യ പുരസ്കാരങ്ങള് അതില് ചിലതാണ്.
സംപൂജ്യ സ്വാമിനി അപൂര്വ്വാനന്ദ സരസ്വതി (ചിന്മയ മിഷന് കണ്ണൂര്) ചടങ്ങ് നിലവിളക്ക് കൊളുത്തി അനുഗ്രഹ പ്രഭാഷണം നടത്തും. മുഖ്യാതിഥിയായി കണ്ണൂര് സര്വ്വകലാശാലാ രജിസ്ട്രാര് ഡോ.ബാലചന്ദ്രന് കീഴോത്ത് പങ്കെടുക്കും.
മയില്പ്പീലി പുരസ്കാരസമിതി ചെയര്മാന് കെ.ബാലചന്ദ്രന്, പുരസ്കാര സമിതി മുഖ്യ രക്ഷാധികാരിയും കൃഷ്ണാ ജ്വല്സ് മാനേജിംഗ് പാര്ട്ണറുമായ സി.വി.രവീന്ദ്രനാഥ്, പുരസ്കാര സമിതി ജനറല് സെക്രട്ടറി ഒ.അശോക് കുമാര്, കണ്വീനര് സുകുമാരന് പെരിയച്ചൂര്, കോ ഓര്ഡിനേറ്റര് ടി.മിലേഷ് കുമാര് എന്നിവരടങ്ങിയ കമ്മിറ്റിയാണ് പുരസ്കാര ജേതാക്കളെ തെരഞ്ഞെടുത്തത്.
