നാം ആരാധിക്കുന്ന ദൈവങ്ങളെല്ലാം മനുഷ്യജന്മമെടുത്തവരാണ്. മനുഷ്യരുടെതായ ജീവിതത്തിലൂടെ കടന്നുപോയവരാണ്. ശ്രീരാമനും ശ്രീകൃഷ്ണനും ക്ഷത്രിയ രാജാക്കന്മാരായിരുന്നു. ക്രൈസ്തവ-ഇസ്ലാം മതങ്ങള്ക്കും ഇത് ബാധകമാണ്.
ഇന്ന് നാം ആരാധിക്കുന്ന, പുരാണങ്ങളിലും ഇതിഹാസങ്ങളിലും കാണുന്ന ദേവീദേവന്മാര് ഒരുകാലത്ത് മനുഷ്യരായി ജീവിച്ചവരാണ്. ഇതുപോലെ ഒരുകാലത്ത് നമുക്കിടയില് മനുഷ്യരായി ജീവിച്ച ഗുരുദേവനും കാലം പിന്നിടുമ്പോള് ദൈവമായി മാറാം. ഹിന്ദുവിശ്വാസമനുസരിച്ച് ബ്രാഹ്മണനും ക്ഷത്രിയനും അവതാരങ്ങളായി ജനിച്ചിട്ടുണ്ട്. മഹാവിഷ്ണുവിന്റെ പത്താമത്തെയും അവസാനത്തെയും അവതാരം ഇനിയുണ്ടാകുമെന്ന് വിശ്വസിക്കുന്നവരാണ് ഹിന്ദുക്കള്. സ്വാമി വിവേകാനന്ദനും മഹാത്മാഗാന്ധിക്കുമൊക്കെ ഭാവിയില് ഈ പദവി ലഭിക്കാം. അതുകൊണ്ട് ഗുരുദേവനെ ദൈവമായി ആരാധിക്കണമെന്ന് ആര്ക്കെങ്കിലും ഇന്ന് തോന്നിയാല് അതിന് അവകാശമുണ്ട്, സ്വാതന്ത്ര്യമുണ്ട്. അത് തെറ്റാണെന്ന് പറയാന് കഴിയില്ല.
ദൈവസങ്കല്പ്പം അങ്ങേയറ്റം വ്യക്തിപരമാണ്. ആരെ, എന്തിനെ ആരാധിക്കണം എന്നത് വ്യക്തികളുടെ ഇഷ്ടമാണ്. സര്പ്പക്കാവുകള് സംരക്ഷിക്കുന്നത് കേരളീയമായ രീതിയാണല്ലോ. അവിടെ സര്പ്പത്തെയാണ് ആരാധിക്കുന്നത്. പാമ്പ് വിഷജീവിയാണെന്ന കാരണം പറഞ്ഞ് ആര്ക്കെങ്കിലും ഇത് വിലക്കാനാവുമോ? ദുര്യോധനന് ഇതിഹാസത്തില് ദുഷ്ട കഥാപാത്രമാണ്. എന്നാല് നമ്മുടെ നാട്ടില് ദുര്യോധനന് ക്ഷേത്രമുണ്ട്. എന്തിനേറെ, ചിലന്തി പ്രതിഷ്ഠയായ ക്ഷേത്രംപോലും നമുക്കുണ്ട്. ഇവിടങ്ങളില് ആരാധനയുമുണ്ട്. ദുര്യോധനന് ദൈവമല്ല, ചിലന്തി ദൈവമോ എന്നൊക്കെ പറയാന് തുടങ്ങിയാലോ!
ദൈവിക മൂല്യങ്ങളും കഴിവുകളും ഉള്ക്കൊള്ളുന്ന ഗുരുദേവനെ ദൈവത്തിന്റെ അവതാരമായി ആരാധിക്കാന് വിശ്വാസികള്ക്ക് അവകാശമുണ്ട്. ശ്രീനാരായണ ഗുരുദേവനെ വളരെയധികം ആളുകള് ദൈവമായിത്തന്നെയാണ് ആദരിക്കുന്നത്. ഇത് വളരെ മുന്പ് തുടങ്ങിയതുമാണ്. ‘ആരായുകിലന്ധത്വമൊഴിച്ചാദി മഹസ്സിന് നേരാംവഴി കാട്ടും ഗുരുവല്ലോ പരദൈവം’ എന്ന് മഹാകവി കുമാരനാശാന് എഴുതിയിട്ടുമുണ്ട്.
കോടതിവിധികള് ഓരോന്നും ഓരോ സന്ദര്ഭത്തില് വരുന്നതാണ്. കോടതിവിധികളുടെ അടിസ്ഥാനത്തില് ഗുരുദേവന്റെ മഹത്വം തീര്ച്ചപ്പെടുത്താന് കഴിയില്ല. അല്ലെങ്കില്തന്നെ ഹിന്ദുക്കളുടെ ദൈവങ്ങള്ക്ക് മാത്രം എന്തിനീ വിലക്ക്?
തീര്ത്തും അനാവശ്യമായ ഒരു വിവാദത്തിന് ഗുരുദേവന് ദൈവമല്ലെന്ന വിധി ഇടയാക്കിയിട്ടുണ്ട്. ഗുരുദേവന് ദൈവമല്ലെന്നുള്ള തര്ക്കം ചിലരുടെ വ്യക്തിപരമായ താല്പ്പര്യങ്ങള്ക്കും രാഷ്ട്രീയ താല്പ്പര്യങ്ങള്ക്കും വേണ്ടിയാണ്. ഇതുകൊണ്ട് ഗുരുദേവന് ദൈവമാണോ, അല്ലയോ എന്ന് ആരും സംശയിക്കേണ്ട. ഗുരുദേവനെ ആരാധിക്കുന്നവര്ക്കും ആരാധിക്കണമെന്ന് തോന്നുന്നവര്ക്കും ദൈവമായി ആരാധിക്കാം.
