കണ്ണൂര്: സിപിഎം തില്ലങ്കേരിയില് നടത്തിയ കൊലപാതകത്തെ ഉള്പ്പെടെ ന്യായീകരിച്ച് ഡിസിസി പ്രസിഡണ്ട് രംഗത്തെത്തി. കോണ്ഗ്രസ് സംഘടിപ്പിക്കുന്ന സമാധാന സംഗമത്തെക്കുറിച്ച് പറയാനായി ഇന്നലെ കണ്ണൂര് പ്രസ് ക്ലബില് നടത്തിയ പത്രസമ്മേളനത്തിലാണ് ഡിസിസി പ്രസിഡണ്ട് കെ.സുരേന്ദ്രന് സിപിഎം അക്രമങ്ങളെ ന്യായീകരിച്ച് രംഗത്തെത്തിയത്. കണ്ണൂരില് ഇപ്പോള് നടക്കുന്ന അക്രമങ്ങള് തുടങ്ങിവെച്ചത് കേന്ദ്രം ഭരിക്കുന്ന ബിജെപിയും ആര്എസ്എസ്സുമാണെന്ന് പച്ചക്കളളം പടച്ചു വിട്ടാണ് സിപിഎം അക്രമത്തെ സുരേന്ദ്രന് വെളളപൂശിയത്. സിപിഎം അധികാരത്തിലെത്തിയ അന്നു മുതല് പിണറായിയില് ഉള്പ്പെടെ നടത്തിയ മനുഷ്യാവകാശ ലംഘനങ്ങളും അക്രമങ്ങളും തില്ലങ്കേരിയിലും പയ്യന്നൂരിലും നടത്തിയ കൊലപാതകങ്ങളും ദീര്ഘകാലം ജില്ലയില് നിലനിന്ന സമാധാനം നശിപ്പിച്ചു കൊണ്ട് ആര്എസ്എസ് നേതാവായിരുന്ന കതിരൂര് മനോജിനെ വധിച്ച് ജില്ലയില് വീണ്ടും അക്രമങ്ങള്ക്ക് സിപിഎം തുടക്കം കുറിച്ചതുള്പ്പെടെ വിസ്മരിച്ചു കൊണ്ടാണ് ദുരുദ്ദേശത്തോടെ സംഘപരിവാറാണ് ജില്ലയിലെ അക്രമങ്ങള്ക്ക് പിന്നില്ലെന്ന രീതിയില് സുരേന്ദ്രന് സംസാരിച്ചത്.
മാത്രമല്ല സിപിഎം അക്രമത്തില് ദുരിതമനുഭവിക്കുന്ന സംഘപരിവാര് പ്രവര്ത്തകരുടെ വേദന നേരിട്ട് കാണാന് ബിജെപി എംപി സംഘം കണ്ണൂരിലെത്തിയതില് കോണ്ഗ്രസ്സിനുളള അസഹിഷ്ണുതയും പത്രസമ്മേളനത്തില് സുരേന്ദ്രന് വെളിപ്പെടുത്തി. കാലങ്ങളായി സിപിഎമ്മിന്റെ ഇംഗിതത്തിനുസരിച്ച് അടിയും കുത്തും കിട്ടിയ കോണ്ഗ്രസ് പ്രവര്ത്തകരെ പാര്ട്ടിയുടെ ഒരൊറ്റ ദേശീയ നേതാവും തിരിഞ്ഞുനോക്കാത്തതിലെ വൈഷമ്യം സുരേന്ദ്രന്റെ വാക്കുകളില് പ്രകടമായി. വീട് സന്ദര്ശിച്ച് ആശ്വസിപ്പിച്ചാല് ജില്ലയിലെ പ്രശ്നങ്ങള് തീരില്ലെന്ന് സുരേന്ദ്രന് പറഞ്ഞു. യുഡിഎഫ് സംസ്ഥാന കമ്മിറ്റിയുടെ നേതൃത്വത്തില് നാളെ കണ്ണൂരില് നടക്കുന്ന സമാധാന സംഗമത്തില് രമേശ് ചെന്നിത്തലയുള്പ്പെടെയുളള നേതാക്കള് സംബന്ധിക്കുമെന്ന് അദ്ദേഹം പറഞ്ഞു. പത്രസമ്മേളനത്തില് യുഡിഎഫ് ജില്ലാ കണ്വീനര് എ.ഡി..മുസ്തഫ, സി.എ.അജീര്, വി.കെ.അബ്ദുള്ഖാദര് മൗലവി എന്നിവരും പങ്കെടുത്തു.
