ആലപ്പുഴ: വിവിധ ആവശ്യങ്ങള് ഉന്നയിച്ച് ജില്ലയിലെ ആധാരം എഴുത്തുകാര് തിരുവോണനാളില് പട്ടിണി സമരം നടത്തി. ജില്ലാ രജിസ്ട്രാര് ഓഫീസിന് മുന്നില് നടന്ന സമരം ആലപ്പുഴ നഗരസഭാദ്ധ്യക്ഷന് തോമസ് ജോസഫ് ഉദ്ഘാടനം ചെയ്തു.
സമരസമിതി ചെയര്മാന് പി.ടി. ജോണ് പെരുമ്പള്ളി അദ്ധ്യക്ഷത വഹിച്ചു. സംസ്ഥാന പ്രസിഡന്റ് കെ. ജി. ഇന്ദുകലാധരന് , സംസ്ഥാന സെക്രട്ടറി സുരേഷ്ബാബു, സംസ്ഥാന വനിതാ ചെയര്പേഴ്സണ് വൃന്ദാമണി, എ. താഹാകുഞ്ഞ്, മുത്തുസ്വാമിപിള്ള, ജില്ലാസെക്രട്ടറി ആര്. ബേബി, എം. പി. മധുസൂദനന്, കെ. ആര്. ഷാനവാസ്, ശശിധരപണിക്കര്, സുരേഷ്കുമാര്, പുരുഷോത്തമന് പിള്ള, സോമന്പിള്ള എന്നിവര് പ്രസംഗിച്ചു.
ഭൂമാഫിയകളെയും, റിട്ടയര് ചെയ്ത ഉദ്യോഗസ്ഥരെയും സഹായിക്കുന്നതിനായി ആധാരകക്ഷികള്ക്കും ആധാരം എഴുതാം എന്ന മുന് സര്ക്കാര് കൊണ്ടുവന്ന ഉത്തരവ് ലൈസന്സ് നേടി ആധാരം എഴുത്ത് തൊഴില് ചെയ്ത് ഉപജീവനം നടത്തുന്ന അന്പതിനായിരത്തില് പരം തൊഴിലാളികളേയും രണ്ടു ലക്ഷത്തോളം വരുന്ന അവരുടെ കുടുംബാഗങ്ങളേയും പട്ടിണിയിലാക്കും, അതിനാല് ഈ നിയമം പിന്വലിക്കണമെന്ന് സമരക്കാര് ആവശ്യപ്പെട്ടു.
