കണ്ണൂര്: കഴിഞ്ഞ ദിവസം അന്തരിച്ച കണ്ണൂരിലെ പ്രശസ്ത ഡോക്ടര് പി.മാധവന് സംഘ പ്രസ്ഥാനങ്ങളുമായി വളരെ അടുത്ത് ബന്ധപ്പെട്ട് പ്രവര്ത്തിച്ച വ്യക്തിയായിരുന്നു. വര്ഷങ്ങളായി സംഘ പ്രസ്ഥാനങ്ങളുടെ കണ്ണൂരിലെ എല്ലാ പരിപാടികളുമായി സഹകരിച്ച് പ്രവര്ത്തിച്ചു വരികയായിരുന്നു ബഹുമുഖപ്രതിഭ കൂടിയായ കണ്ണൂരിന്റെ ഡോക്ടര്. അതോടൊപ്പം കക്ഷി രാഷ്ട്രീയങ്ങള്ക്കതീതമായി കണ്ണൂര് നഗരത്തിന്റെ സമസ്ത മേഖലകളിലും നിറഞ്ഞുനിന്നിരുന്ന വ്യക്തിത്വത്തിന് ഉടമയായിരുന്നു. മാത്രമല്ല വലുപ്പച്ചെറുപ്പ വ്യത്യാസമില്ലാതെ എല്ലാ വിഭാഗം ജനങ്ങളോടും ഉറ്റബന്ധം വെച്ചുപുലര്ത്തിയിരുന്നു. തന്നെത്തേടിയെത്തുന്ന രോഗികളും നിരാലംബരുമായ ആയിരങ്ങള്ക്ക് മടിശ്ശീലയുടെ കനംനോക്കാതെ നല്കിയ സേവനങ്ങള് കണ്ണൂരിലെ ഈ ജനകീയ ഡോക്ടറെ ജനങ്ങളുടെ പ്രിയപ്പെട്ടവനാക്കി മാറ്റുകയായിരുന്നു. ഇതുകൊണ്ടുതന്നെ ജീവിതത്തിന്റെ സായന്തനത്തിലും അദ്ദേഹം നാട്ടുകാരുടെ സ്നേഹാദരങ്ങളാല് മൂടപ്പെട്ടിരുന്നു. സംഘ പ്രസ്ഥാനങ്ങളുമായുളള ബന്ധം തന്റെ ജീവിതത്തിലും ജോലിക്കും എന്നും മുതല്ക്കൂട്ടായിരുന്നുവെന്ന് അദ്ദേഹം സുഹൃത്തുക്കളോട് പറയുമായിരുന്നു.
സംഘപരിവാര് പ്രസ്ഥാനങ്ങളുമായി ഊഷ്മളമായ ബന്ധം പുലര്ത്തിയിരുന്ന ഡോ.പി.മാധവന് പ്രസ്ഥാനത്തിന്റെ ഉയര്ച്ച താഴ്ചകളില് സാധാരണ പ്രവര്ത്തകന്റെ വികാരം ഉള്ക്കൊണ്ട് പ്രവര്ത്തിക്കുകയും ചെയ്തിരുന്നു. വിശ്വഹിന്ദുപരിഷത്ത് സംസ്ഥാന ഉപാധ്യക്ഷന്, ബിജെപി സംസ്ഥാന സമിതിയംഗം എന്നീ നിലകളിലും കണ്ണൂരില് യുവകേരളയുടെ ഭാരതവല്ക്കരണ റാലി, ഹിന്ദുസംഗമം, ബിജെപി മേഖലാ സമ്മേളനം എന്നിവയുടെ ഭാരവാഹി തുടങ്ങി ഒട്ടേറെ ചുമതലകളും അദ്ദേഹം വഹിച്ചിട്ടുണ്ട്. കഴിഞ്ഞ കാലങ്ങളില് നടന്ന പല തെരഞ്ഞെടുപ്പുകളിലും ബിജെപിയുടെ സ്ഥാനാര്ത്ഥികളുടെ വിജയത്തിനായി പ്രവര്ത്തിച്ച കമ്മറ്റികളുടെ ഭാരവാഹിത്വവും ഇദ്ദേഹം വഹിച്ചിട്ടുണ്ട്.
ആര്എസ്എസ് സര്സംഘചാലകായിരുന്ന സ്വര്ഗ്ഗീയ ദേവറസ്ജി, മുന്പ്രധാനമന്ത്രി അടല് ബിഹാരി വാജ്പേയി, ഉപപ്രധാനമന്ത്രി എല്.കെ.അദ്വാനി, ബിജെപി ദേശീയ അധ്യക്ഷനായിരുന്ന ഡോ.മുരളി മനോഹര് ജോഷി, ഇപ്പോഴത്തെ സര്സംഘചാലക് ഡോ.മോഹന് ഭഗവത് എന്നിവരടക്കം നിരവധി സംഘപരിവാര് നേതാക്കള്ക്ക് ആതിഥ്യമരുളാനുള്ള സൗഭാഗ്യവും മാധവന് ഡോക്ടര്ക്ക് ലഭിച്ചിട്ടുണ്ട്. മാരാര്ജി അടക്കമുള്ള ഒട്ടേറെ നേതാക്കളുമായുള്ള ഊഷ്മള ബന്ധം സംഘടനാ വിശേഷങ്ങളും അദ്ദേഹം സംഘപ്രവര്ത്തകരുമായി പങ്കുവെക്കാറുണ്ടായിരുന്നു.
മികച്ച പൊതുപ്രവര്ത്തനം കണക്കിലെടുത്ത് പള്ളിക്കുന്ന് ആസ്ഥാനമായി പ്രവര്ത്തിക്കുന്ന സര്വ്വമംഗള ചാരിറ്റബിള് ട്രസ്റ്റ് ഏര്പ്പെടുത്തിയ 2014 ലെ പ്രൊഫ.ടി.ലക്ഷ്മണന് സ്മാരക സര്വ്വമംഗള പുരസ്കാരം ഡോ.മാധവനെ തേടിയെത്തിയിരുന്നു. ഡോക്ടറുടെ വേര്പാട് കണ്ണൂരിന്റെ സാമൂഹ്യ, സാംസ്കാരിക, ആധ്യാത്മികമേഖലക്ക് തീരാനഷ്ടമാണ്. സര്വ്വമംഗള ട്രസ്റ്റിന്റെ പ്രവര്ത്തനങ്ങള്ക്ക് എന്നും പ്രചോദനമായിരുന്ന ഡോക്ടര് ട്രസ്റ്റിന്റെ കീഴില് ചാലാട് പളളിക്കുന്നില് പ്രവര്ത്തിക്കുന്ന ബാലികാ സദനത്തിനായെടുത്ത ഭൂമിയില് ഒരു സെന്റ് ഭൂമിയുടെ വില പൂര്ണ്ണമായും നല്കുകയുണ്ടായി. നവതിയുടെ നിറവിലും സേവന നിരതനായിരുന്ന അദ്ദേഹം കണ്ണൂര് നഗരത്തിലും പരിസരപ്രദേശങ്ങളില് നടന്നു വരുന്ന ഒട്ടുമിക്ക സേവന പ്രവര്ത്തനങ്ങളിലും കൈമെയ് മറന്ന് തന്നാലാവുന്ന സഹായങ്ങള് നല്കി വരാറുണ്ട്.
