ചവറ: ദേശീയ ജലപാതയായ ടി.എസ് കനാലിന്റെ പന്മനയിലെ തീരഭാഗങ്ങള് സാമൂഹ്യ വിരുദ്ധരുടെ താവളമാകുന്നതായി നാട്ടുകാര്.
പകലും രാത്രിയുമായി അപരിചിതരായ നിരവധി യുവാക്കളാണ് തീരത്ത് തമ്പടിക്കാന് എത്തുന്നത്. മദ്യപാനം, കഞ്ചാവ് ഉപയോഗം എന്നിവയ്ക്കായി ചെറുപ്പക്കാര് കൂട്ടമായെത്തുന്നതിന്റെ ‘യത്തിലാണ് സ്ഥലവാസികള്.
മേക്കാട്, ചിറ്റൂര്, അഞ്ചുമനയ്ക്കല് ഭാഗങ്ങളിലാണ് സാമൂഹ്യവിരുദ്ധര് കനാലിന്റെ തീരം ലഹരി ഉപയോഗത്തിനായി കണ്ടെത്തിയിരിക്കുന്നത്. ആഡംബരബൈക്കിലും അല്ലാതെയുമായി എത്തുന്നവരുടെ എണ്ണം പെരുകിയതോടെ നാട്ടുകാര് ആശങ്കയിലാണ്. പലപ്പോഴും നാട്ടുകാരുടെ പരാതിയില് പോലീസെത്തുമ്പോഴേക്കും സംഘം രക്ഷപ്പെടുകയാണ് പതിവ്.
തീരത്തിനരുകില് ഇടുങ്ങിയ വഴിയായത് കാരണം പോലീസ് ജീപ്പിന് കടന്നുവരാന് കഴിയാത്തതാണ് സംഘത്തിന് രക്ഷപെടാന് എളുപ്പമാകുന്നത്. കഴിഞ്ഞ ദിവസം പോലീസ് വന്നതിന് പിന്നാലെ തീരത്ത് താമസിക്കുന്നവരുടെ വീടിന് നേരെ അക്രമം ഉണ്ടായി. മേക്കാട് ലൗ ഡെയിലില് സാജു സ്റ്റീഫന്റെ വീട്ടിലെ കിടപ്പുമുറിയുടെ ജനാലകളാണ് അടിച്ചു തകര്ത്തത്.
ഞായറാഴ്ച പുലര്ച്ചെ 12.30 ഓടെയാണ് സംഭവമെന്ന് വീട്ടുകാര് പറഞ്ഞു. ശബ്ദം കേട്ട് ഉണരുമ്പോള് ജനല്ചില്ലുകള് തെറിച്ചു വീഴുന്നതാണ് കണ്ടതെന്ന് ഇവര് പറഞ്ഞു. കട്ടിലില് കിടക്കുകയായിരുന്ന കുട്ടികളുടെ ദേഹത്താണ് ചില്ലുകള് വീണത്. വീട്ടുകാര് വിവരമറിയിച്ചതനുസരിച്ച് ഉടന് തന്നെ പോലീസെത്തിയെങ്കിലും ആരെയും പിടികൂടാന് കഴിഞ്ഞില്ല.
ഞായറാഴ്ച രാവിലെ പരിസരവാസികള് നടത്തിയ തിരച്ചിലില് സമീപത്തെ ഒഴിഞ്ഞ പുരയിടത്തില് ഉപേക്ഷിക്കപ്പെട്ട നിലയില് ബൈക്കും കണ്ടെത്തി.
നാലുവശവും മതിലും ഗേറ്റും ഉള്ള പുരയിടത്തില് മതിലിന് മുകളിലൂടെ എടുത്തിട്ട നിലയിലാണ് ബൈക്ക്. പന്മന അഞ്ചുമനയ്ക്കലിലും തീരപ്രദേശത്തെ വീടുകളില് രാത്രികാലങ്ങളില് സാമൂഹ്യവിരുദ്ധ ശല്യം രൂക്ഷമാണന്ന് പരിസരവാസികള് പറയുന്നു. വീടിന് പുറത്തിട്ടിരിക്കുന്ന പാത്രങ്ങള്, വസ്ത്രങ്ങള് എന്നിവ സമീപ പുരയിടത്തിലും വീടുകളിലും നശിപ്പിച്ചിടുന്നത് പതിവായിരിക്കുകയാണ്.
അഞ്ചുമനയ്ക്കല് മുല്ലശേരി രതീഷിന്റെ വീടിന്റെ വേലി സാമൂഹ്യ വിരുദ്ധര് നശിപ്പിച്ചു. പരിസരത്തെ വീടുകളില് വസ്ത്രങ്ങള് പുറത്ത് കഴുകിയിടാന് പോലുമാകാത്ത സ്ഥിതിയാണന്ന് വീട്ടുകാര് പറയുന്നു.
രാത്രികാല പോലീസ് നിരീക്ഷണം ശക്തമാക്കണമെന്ന ആവശ്യത്തിലാണ് തീരവാസികള്. അക്രമം നടന്ന വീട്ടുകാരുടെ പരാതിയില് ചവറ പോലീസ് കേസെടുത്തിട്ടുണ്ട്.
