കൊയിലാണ്ടി: കൊയിലാണ്ടി നഗരസഭാ പരിധിയില്‍ ചട്ടങ്ങള്‍ ലംഘിച്ച് നടത്തുന്ന കെട്ടിടത്തിന്റെ നിര്‍മ്മാണത്തിന് അനുമതി നല്‍കിയ നഗരസഭയുടെ നടപടി വിവാദമാവുന്നു. റയില്‍വേ മേല്‍പ്പാലത്തോട് ചേര്‍ന്ന് പുതുതായി നിര്‍മ്മിക്കുന്ന ഇരുനില കെട്ടിടം, കെട്ടിട നിര്‍മ്മാണത്തിന്റെ യാതൊരുവിധ നിയമവും പാലിക്കാതെയാണ് പണി നടക്കുന്നത്. റവന്യൂഭൂമി പോലും സ്വകാര്യ വ്യക്തികള്‍ കയ്യടക്കി കെട്ടിടമുണ്ടാക്കുന്നതായി മുന്‍സിപ്പാലിറ്റി പരിധിയില്‍ നിരവധി ആരോപണങ്ങള്‍ ഉയര്‍ന്നിട്ടുണ്ട്.
ദേശീയപാതയോരത്ത് ആരംഭിച്ച ഒരു ടെക്സ്റ്റയില്‍ ഷോപ്പിന് പാര്‍ക്കിംങ് ഏരിയ പോലുമില്ലാതെയാണ് കെട്ടിട നിര്‍മ്മാണ അനുമതി കൊടുത്തത്.
കൊയിലാണ്ടി ബസ് സ്റ്റാന്റിലെ ഒരു ഹോട്ടലിന് കെട്ടിടത്തിന്റെ വരാന്ത പോലും ഹോട്ടല്‍ ആവശ്യത്തിന് ഉപയോഗിക്കാന്‍ നഗരസഭ അനുമതി നല്‍കിയിരുന്നു.
നിയമങ്ങള്‍ പാലിക്കാതെ നിര്‍മ്മിക്കുന്ന കെട്ടിടങ്ങള്‍ക്ക് അനുമതിയും കെട്ടിട നമ്പറും നല്‍കുന്നതിന് നഗരസഭ അധികാരികള്‍ ഒരു മടിയും കാണിക്കാത്തത് ഭരണകക്ഷി രാഷ്ടീയ നേതാക്കളുടെ ഇടപെടല്‍ കൊണ്ടാണെന്ന് ആക്ഷേപമുണ്ട്
