പത്തനാപുരം: പട്ടാഴിയില് മദ്യപാനത്തിനിടെ തൊഴിലാളികള് തമ്മിലുണ്ടായ സംഘര്ഷത്തില് അഞ്ചുപേര്ക്ക് കുത്തേറ്റു. അമിതമായ മദ്യപാനമാണ് സംഘര്ഷങ്ങള്ക്ക് കാരണം.
കൊട്ടാരക്കര പടിഞ്ഞാറെത്തെരുവ് സജിവിലാസത്തില് അജി (28), പട്ടാഴി ഏറത്തുവടക്ക് റേഷന്കടമുക്ക് അനില് നിവാസില് അരുണ്രാജ് (29), ചേര്ത്തല തുറവൂര് സ്വദേശി ജെയ്സണ്(30), ചേര്ത്തല സ്വദേശി ബെന്സിലാല് (29), എന്നിവര്ക്കാണ് കത്തികൊണ്ടുളള കുത്തേറ്റത്.
ഇവരുടെ ഒപ്പം ജോലി ചെയ്ത് താമസിച്ചുവന്ന ആലപ്പുഴ മണ്ണഞ്ചേരി സ്വദേശി അനൂപാണ് (29) നാല് പേരെയും ഗുരുതരമായി കുത്തിപരിക്കേല്പ്പിച്ചത്. ഇയാള് പോലീസ് നിരീക്ഷണത്തില് ചികിത്സയിലാണ്. ഇവരെല്ലാം ടൈല്സ് തൊഴിലാളികളാണ്.
പരിക്കേറ്റവരെ തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചു. കുത്തേറ്റവരില് ബെന്സിലാല്, ജെയ്സണ് എന്നിവരുടെ നില ഗുരുതരമാണ്. പട്ടാഴി വടക്കേക്കര ഗ്രാമപഞ്ചായത്തിലെ ഏറത്തു വടക്ക് റേഷന്കടമുക്കിന് സമീപമുളള വാടക വീട്ടില് കഴിഞ്ഞ രാത്രി പതിനൊന്നിനാണ് മദ്യപാനത്തിനിടെ തൊഴിലാളികള് തമ്മില് സംഘര്ഷം ഉണ്ടാകുന്നത്.
പോലീസ് പറയുന്നത് ഇങ്ങനെ; പട്ടാഴി ഏറത്തുവടക്ക് സ്വദേശിയായ കരാറുകാരന് ശിവന്കുട്ടിക്ക് വേണ്ടി ടൈല്സ് പണിചെയ്യുന്ന തൊഴിലാളികളാണ് ഇവര്.
രണ്ട് ദിവസം മുമ്പാണ് അനൂപ് ജോലിക്കായി ഇവിടെ എത്തുന്നത്. മറ്റുള്ളവരെല്ലാം ഒരു വര്ഷമായി ഇവിടെ ജോലിചെയ്ത് താമസിച്ചുവരികയായിരുന്നു. അഞ്ചുപേരും ഒരുമിച്ചിരുന്നാണ് അമിതമായി മദ്യപിച്ചിരുന്നത്. അനൂപ് മൊബൈലില് സംസാരിക്കുന്നതിനിടെ മറ്റുള്ളവരോട് ശബ്ദമുണ്ടാക്കാതിരിക്കാന് പറഞ്ഞതാണ് സംഭവങ്ങള്ക്ക് തുടക്കം. വാക്കേറ്റത്തില് തുടങ്ങിയത് കത്തിക്കുത്തില് അവസാനിക്കുകയായിരുന്നു.
പത്തനാപുരം സര്ക്കിള് ഇന്സ്പെക്ടര് പി.റെജി എബ്രഹാം, എസ്ഐ രാഹുല്രവീന്ദ്രന് എന്നിവരുടെ നേതൃത്വ ത്തിലുളള പോലീസ് സംഘവും വിരലടയാള വിദഗ്ദ്ധരും പരിശോധന നടത്തി.
