അങ്കാറ: തുര്ക്കിയില് വിവാഹഹാളിനു സമീപത്തുണ്ടായ ചാവേര് ബോംബ് സ്ഫോടനത്തില് 30 പേര് കൊല്ലപ്പെട്ടു. 94 പേര്ക്കു പരിക്കേറ്റു. സിറിയന് അതിര്ത്തിക്കു സമീപമുള്ള ടര്ക്കിഷ് നഗരമായ ഗാസിയാന്ടെപില് നടന്ന വിവാഹ ആഘോഷത്തിനിടെയായിരുന്നു ചാവേറാക്രമണം.
പ്രാദേശിക സമയം ശനിയാഴ്ച രാത്രി 10.50 നാണ് ആക്രമണം നടന്നത്.വിവാഹ ആഘോഷങ്ങള് നടക്കുന്ന തെരുവിലേക്ക് എത്തിയ ചാവേര് സ്വയം പൊട്ടിത്തെറിക്കുകയായിരുന്നുവെന്ന് ദൃക്സാക്ഷികള് വ്യക്തമാക്കി.
വിവാഹത്തില് പങ്കെടുക്കാനെത്തിയവരാണ് മരിച്ചവരില് അധികവും മരണസംഖ്യ ഇനിയും ഉയരാന് സാധ്യതയുണ്ട്. പരിക്കേറ്റവരില് പലരുടെയും നില ഗുരുതരമാണെന്ന് ആശുപത്രി വൃത്തങ്ങള് വ്യക്തമാക്കി.
മരിച്ചവരില് അധികവും സ്ത്രീകളും കുട്ടികളുമാണ്. ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. ഇസ്ലാമിക് സ്റ്റേറ്റ് ഭീകരവാദികളോ കുര്ദിഷ് പോരാളികളോ ആയിരിക്കും ആക്രമണത്തിനു പിന്നിലെന്നാണു വിവരം. സിറിയയില് സമാധാനം പുനഃസ്ഥാപിക്കാന് വേണ്ട സഹായങ്ങളെല്ലാം ചെയ്യുമെന്ന തുര്ക്കി പ്രധാനമന്ത്രിയുടെ പ്രഖ്യാപനത്തിനു പിന്നാലെയായിരുന്നു ആക്രമണം.
സംഭവത്തെ തുടര്ന്ന് പ്രദേശത്ത് മാധ്യമപ്രവര്ത്തകര്ക്ക് നിയന്ത്രണം ഏര്പ്പെടുത്തിയിരിക്കുകയാണ്. സ്ഫോടനം നടന്ന സമയത്തെടുത്ത ചിത്രങ്ങളും വീഡിയോകളും പുറത്ത് പോകാതിരിക്കാനും നിയന്ത്രണങ്ങളുണ്ട്. ആളുകള് പരിഭ്രാന്തരാകാതിരിക്കാനായാണ് മുന്കരുതല്.
അതേസമയം സംഭവം ഭീകരാക്രമണമാണെന്ന് തുര്ക്കി അധികൃതര് സ്ഥിരീകരിച്ചു. അക്രമം നടന്ന സ്ഥലം ഉള്പ്പെടുന്ന പ്രവിശ്യ കഴിഞ്ഞ 15 ദിവസമായി സുരക്ഷാ മേഖലയായി പ്രഖ്യാപിച്ചിരിക്കുകയായിരുന്നു.
സിറിയന് അതിര്ത്തിക്കുള്ളില് നിന്ന് റോക്കറ്റ് ആക്രമണം ഉണ്ടായതിന് പിന്നാലെയാണ് മേഖലയില് സുരക്ഷ കൂട്ടിയത്. പ്രദേശത്ത് കുര്ദ്ദിഷ്, ഇസ്ലാമിക് സ്റ്റേറ്റ് തീവ്രവാദികളുടെ സാന്നിധ്യം ശക്തമാണ്.
