പാരിപ്പള്ളി: ആര്എസ്എസ് പാരിപ്പള്ളി മണ്ഡലം കാര്യകര്ത്താക്കളുടെ നേതൃത്വത്തില് പാരിപ്പള്ളി പോലീസ് സ്റ്റേഷനിലേക്ക് പ്രതിഷേധ മാര്ച്ച് നടത്തി. ശ്രീകൃഷ്ണജയന്തി ആഘോഷത്തിന്റെ ഭാഗമായി മൈക്ക് ഓര്ഡര് എടുക്കാന് പോലീസ് സ്റ്റേഷനില് എത്തിച്ചേര്ന്ന ചാത്തന്നൂര് നഗര് സേവാപ്രമുഖ് എം.ലിജു നെയും പാരിപ്പള്ളി മണ്ഡലം ശാരീരിക് പ്രമുഖ് മണിലാലിനെയും അപമാനിക്കുകയും പിടിച്ചു തള്ളി സ്റ്റേഷനില് നിന്നു പുറത്താക്കുകയും ചെയ്തതിനെ തുടര്ന്നായിരുന്നു പ്രതിഷേധ മാര്ച്ച്. രണ്ടു ദിവസങ്ങളിലായി മൈക്ക് ഓര്ഡര് എടുക്കാനായി പോലീസ് അധികാരികളെ സമീപിച്ച പ്രവര്ത്തകര്ക്ക് മോശം അനുഭവമാണ് ഉണ്ടായത്. ഇതു ചോദ്യം ചെയ്തതിനെ തുടര്ന്നായിരുന്നു എസ്ഐ അബ്ദുല് റഹ്മാന് പ്രവര്ത്തകരോട് അപമര്യാദയായി പെരുമാറിയത്. പോലീസിന്റെ ഭാഗത്തു നിന്നും തുടര്ന്നും ഇത്തരം പ്രവര്ത്തനങ്ങള് ഉണ്ടായാല് ശക്തമായി പ്രതികരിക്കുമെന്ന് ആര്എസ്എസ് ജില്ലാ ശാരീരിക് പ്രമുഖ് കണ്ണന് പറഞ്ഞു. ആര്എസ് എസ് ജില്ലാ സദസ്യന് ജയന്, കര്ഷക മോര്ച്ച സംസ്ഥാനകമ്മിറ്റി അംഗം മുരളി, ബാലഗോകുലം താലൂക് ഉപാധ്യക്ഷന് എം.എസ്.ഗോപകുമാരന് നായര്, ബിജെപി ചാത്തന്നൂര് മണ്ഡലം സെക്രട്ടറി ജി.ഗോപകുമാര് തുടങ്ങിയവര് സംബന്ധിച്ചു.
സംഘപരിവാര് പ്രവര്ത്തകര് പ്രതിഷേധ മാര്ച്ച് നടത്തി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.