സില്‍വര്‍ ജൂബിലി വര്‍ഷം ‘റീവൈന്റ് 87-91 ‘ആഘോഷിക്കും

കണ്ണൂര്‍: കണ്ണൂര്‍ ഗവണ്‍മെന്റ് എഞ്ചിനീയറിംഗ് കോളേജില്‍ 1987-91 കാലഘട്ടത്തില്‍ പാഠനം നടത്തിയ രണ്ടാം ബാച്ച് വിദ്യാര്‍ത്ഥികള്‍ പഠനം പൂര്‍ത്തിയാക്കിയതിന്റെ സില്‍വര്‍ ജൂബിലി വര്‍ഷം റീവൈന്റ് 87-91 എന്ന പേരില്‍ 15,16 തീയ്യതികളില്‍ വിവിധ പരിപാടികളോടെ ആഘോഷിക്കുമെന്ന് കോളേജ് അലൂമിനി അസോസിയേഷന്‍ ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. 87-91 ബാച്ചില്‍ പഠനം നടത്തിയവരുടെ കുടുംബാംഗങ്ങളുടെ സംഗമവും നടക്കും. മാങ്ങാട്ടുപറമ്പിലെ കോളേജ് കാമ്പസില്‍ 15 ന് രാവിലെ 9.00 ന് നടക്കുന്ന പരിപാടിയില്‍ പ്രശസ്ത ശാസ്ത്രഞ്ജന്‍ ഡോ.ടി.പി.ശശികുമാര്‍ മുഖ്യാതിഥിയായി പങ്കെടുക്കും . കോളേജ് പ്രിന്‍സിപ്പാള്‍ ടി.ഡി.ജോണ്‍ അധ്യക്ഷത വഹിക്കും. വൈകുന്നേരം കലാപരിപാടികളും കോളേജ് വിദ്യാര്‍ത്ഥികളെ പങ്കെടുപ്പിച്ചു കൊണ്ടുളള മത്സരങ്ങളും നടക്കും. കാല്‍ നൂറ്റാണ്ടു കാലത്തെ എഞ്ചിനീയറിംഗ് പ്രവര്‍ത്തന പരിചയ സമ്പത്ത് പുതിയ തലമുറയിലെ വിദ്യാര്‍ത്ഥികള്‍ക്ക് പങ്കുവെയ്‌ക്കുന്നതിനു വേണ്ടി 25 വിഷയങ്ങളില്‍ ക്ലാസുകളും പരിപാടിയോടനുബന്ധിച്ച് സംഘടിപ്പിച്ചിട്ടുണ്ട്. 14 ന് പറശ്ശിനിക്കടവ് ഹോട്ടല്‍ പോളാറസില്‍ എത്തിച്ചേരുന്ന സതീര്‍ത്ഥ്യരും കുടുംബാംഗങ്ങളും നോള്‍സ്റ്റാജിക് ട്രിപ്പ് എന്ന് പേരിട്ടിരിക്കുന്ന കണ്ണൂര്‍ ദര്‍ശന്‍ എന്ന പേരില്‍ ടൂറും സംഘടിപ്പിച്ചിട്ടുണ്ട്. അലൂമിനിയുമായി സഹകരിച്ച് കോളേജില്‍ വിവിധ വികസന പരിപാടികള്‍ ആസൂത്രണം ചെയ്യുന്നതായും ഇവര്‍ പറഞ്ഞു. വാര്‍ത്താ സമ്മേളനത്തില്‍ പ്രൊഫ.വി.വി.മധു, പ്രൊഫ.ആര്‍.ശൈലേഷ്, ടി.വി.മധുകുമാര്‍,,കെ.സുധീര്‍,ടി.വി.ബാലകൃഷ്ണന്‍ എന്നിവര്‍ പങ്കെടുത്തു.