ആലപ്പുഴ: കുട്ടനാടിന്റെ മാമാങ്കത്തിന് കുരുന്നുകളുടെ ഭാവന ചാലിച്ച നിറച്ചാര്ത്ത്. ആലപ്പുഴ ടൗണ്ഹാളില് നടന്ന മത്സരത്തില് നെഹ്റുട്രോഫി വള്ളംകളിയുടെ ആവേശവും ഉന്മാദവും വിദ്യാര്ഥികളുടെ ഭാവനയില് വിടര്ന്നപ്പോള് നെഹ്റു ട്രോഫിയും വള്ളംകളിയും നിറങ്ങളിലാറാടി. എന്റെ നാട്ടിലെ വള്ളംകളി എന്ന വിഷയത്തില് ആലപ്പുഴയുടെ കായലും കനാലുകളും വര്ണക്കുടയും ആവേശവും കുരുന്നുകള് കടലാസ്സില് കോറിയിട്ടു. കൊച്ചുകുട്ടികള് നിറങ്ങള് കൊണ്ട് വള്ളം തുഴഞ്ഞു. നഴ്സറി വിദ്യാര്ഥികളടക്കം ആയിരത്തോളം വിദ്യാര്ഥികള് പങ്കെടുത്തു. എല്.കെ.ജി. മുതല് നാലാംക്ലാസ് വരെയുള്ളവര്ക്കായി കളറിങ് മത്സരവും യു.പി., ഹൈസ്കൂള് വിദ്യാര്ഥികള്ക്കായി ചിത്രരചനാ മത്സരവുമാണ് നടത്തിയത്.
മത്സരവിജയികള്: കളറിങ് മത്സരം(നഴ്സറി മുതല് രണ്ടാംക്ലാസ് വരെയുള്ള വിഭാഗം): കൈനകരി ലിറ്റില് ഫഌവര് എല്.പി.എസിലെ രണ്ടാംക്ലാസ് വിദ്യാര്ഥി ഐശ്വര്യ ബിനു ഒന്നാം സ്ഥാനവും എസ്.ഡി.വി. ഇ.എം.എച്ച്.എസ്.എസിലെ ഒന്നാംക്ലാസ് വിദ്യാര്ഥി മുഹമ്മദ് യാസിന് രണ്ടാംസ്ഥാനവും പുറക്കാട് ലിറ്റില് ഫഌവര് എല്.പി.എസിലെ രണ്ടാംക്ലാസ് വിദ്യാര്ഥി എസ്. ശ്രീലക്ഷ്മി മൂന്നാം സ്ഥാനവും കരസ്ഥമാക്കി.
കളറിങ് മത്സരം(മൂന്ന്, നാല് ക്ലാസ്): ആലപ്പുഴ കാര്മല് അക്കാദമി സ്കൂളിലെ നാലാംക്ലാസ് വിദ്യാര്ഥി എസ്.ജെ. ദേവപ്രിയ ഒന്നാംസ്ഥാനവും ജ്യോതി നികേതന് സ്കൂളിലെ മൂന്നാംക്ലാസ് പാര്വതി എസ്. നമ്പൂതിരി രണ്ടാം സ്ഥാനവും കാര്മല് അക്കാദമി സ്കൂളിലെ നാലാംക്ലാസ് വിദ്യാര്ഥി മാനുവല് റ്റി. സാമുവല് മൂന്നാംസ്ഥാനവും നേടി.
ചിത്രരചനാ മത്സരം(യു.പി. വിഭാഗം): കാര്മ്മല് അക്കാദമി സ്കൂളിലെ ആറാം ക്ലാസ് വിദ്യാര്ഥി എസ്. പാര്വതി ഒന്നാംസ്ഥാനവും സെന്റ് മേരീസ് ആര്.സി. സ്കൂളിലെ ഏഴാംക്ലാസ് വിദ്യാര്ഥി എ. ജിഷ്ണു രണ്ടാം സ്ഥാനവും കാളാത്ത് ലിയോ തേര്ട്ടീന്ത് ഇ.എം.എച്ച്.എസ് സ്കൂളിലെ ഏഴാംക്ലാസ് വിദ്യാര്ഥി നസ്ലിന് സലീം മൂന്നാംസ്ഥാനവും നേടി.
ചിത്രരചനാ മത്സരം(ഹൈസ്കൂള് വിഭാഗം): കാര്മ്മല് അക്കാദമി സ്കൂളിലെ ഒമ്പതാംക്ലാസ് വിദ്യാര്ഥി ആദിത്യ രാജന് ഒന്നാംസ്ഥാനവും ചെട്ടികുളങ്ങര ഹയര്സെക്കന്ഡറി സ്കൂളിലെ എട്ടാംക്ലാസ് വിദ്യാര്ഥി യു. നിര്മ്മല് രണ്ടാം സ്ഥാനവും കാര്മല് അക്കാദമി സ്കൂളിലെ പത്താംക്ലാസ് വിദ്യാര്ഥി സാന്ദ്ര സിബി മൂന്നാംസ്ഥാനവും നേടി.
