ചേര്‍ത്തല: നഗരത്തില്‍ ബൈക്ക് മോഷണം പതിവാകുന്നതായി പരാതി. തിരക്കേറിയ ഭാഗങ്ങളില്‍ പാര്‍ക്ക് ചെയ്യുന്ന വാഹനങ്ങളാണ് മോഷ്ടിക്കപ്പെടുന്നത്. ചൊവ്വാഴ്ചയാണ് അവസാനമായി നഗരത്തില്‍ ബൈക്ക്‌മോഷണം നടന്നത്. ഗാന്ധിബസാര്‍ ഷോപ്പിങ് കോംപ്ലസ് അങ്കണത്തില്‍ പാര്‍ക്ക് ചെയ്ത ബൈക്ക് പകല്‍ രണ്ടുമണിയോടെ മോഷണംപോയി. പട്ടണക്കാട് 11-ാം വാര്‍ഡില്‍ വെട്ടയ്‌ക്കല്‍ കല്ലുപുരയ്‌ക്കല്‍ റഫീക്കിന്റെ ഹീറോഹോണ്ട പാഷന്‍പ്രോ ബൈക്കാണ് നഷ്ടപ്പെട്ടത്. എസ്ബിഐ ശാഖയിലേക്ക് പോയി മിനിട്ടുകള്‍ക്കകം തിരിച്ചെത്തിയപ്പോള്‍ ബൈക്ക് കാണാതായി. ഉടമ ചേര്‍ത്തല പോലീസില്‍ പരാതിപ്പെട്ടു. ബാങ്കിന്റെ സിസിടിവിയില്‍ മോഷ്ടവിന്റെ ദൃശ്യമുള്ളതായാണ് വിവരം. ദൃശ്യം ശേഖരിച്ച് പരിശോധിക്കാനാണ് പോലീസ് നീക്കം.
ഇത്തരം മോഷണം നഗരത്തില്‍ ആവര്‍ത്തിക്കുകയാണ്. കെഎസ്ആര്‍ടിസി സ്റ്റാന്‍ഡിന് സമീപത്തെ മുനിസിപ്പല്‍ ഷോപ്പിങ് കോംപ്ലക്‌സ് അങ്കണം, റെയില്‍വേ സ്‌റ്റേഷന്‍ പരിസരം തുടങ്ങിയ സ്ഥാലങ്ങളിലാണ് മോഷണം ആവര്‍ത്തിക്കുന്നത്. ഇതിനുപിന്നില്‍ വന്‍ റാക്കറ്റ് ഉള്ളതായാണ് സൂചന. കഴിഞ്ഞദിവസം ചേര്‍ത്തല സ്വദേശിയായ കുപ്രസിദ്ധ മോഷ്ടാവിനെ അര്‍ത്തുങ്കല്‍ പോലീസ് അരീപ്പറമ്പില്‍ പിടികൂടി. എറണാകുളത്തുനിന്ന് മോഷ്ടിച്ചെടുത്ത ബൈക്കുമായാണ് അനേകം മോഷണക്കേസുകളില്‍ പ്രതിയായ നെബു പിടിയിലായത്. മോഷണത്തിന് പിന്നില്‍ കഞ്ചാവ് മയക്കുമരുന്ന് ലോബിയും ഉള്ളതായാണ് സൂചന.
