അമ്പലവയല് : അമ്പലവയല് സര്ക്കാര് ആശുപത്രിയോടുള്ള വിവേചനം അവസാനിപ്പിക്കണമെന്നാവശ്യപ്പെട്ട് ബിജെപി അമ്പലവയല് പഞ്ചായത്ത് കമ്മിറ്റി മാര്ച്ച് നടത്തി. അമ്പലവയല് ഗവ.ആശുപത്രിയിലേക്ക് നടത്തിയ മാര്ച്ച് ബിജെപി ജില്ലാ പ്രസിഡന്റ് സജിശങ്കര് ഉദ്ഘാടനം ചെയ്തു. നിരവധി നിവേദ്ദനങ്ങള് നല്കിയിട്ടും സമരപരിപാടികള് നടത്തിയിട്ടും ആശുപത്രിയിടെ പ്രവര്ത്തനത്തിന് യാതൊരു മാറ്റവുമുണ്ടായിരുന്നില്ല. സമരത്തിന്റെ ആദ്യഘട്ടമെന്ന നിലയിലാണ് അമ്പലവയല് ഗവ.ആശുപത്രിയിലേക്ക് മാര്ച്ചും ജനകീയ ധര്ണ്ണയും നടത്തിയത്. 1948ല് വയനാട് എക്സ് സര്വീസ്മെന് കോളനിക്കാര്ക്കുവേണ്ടിയാണ് ആശുപത്രി പ്രവര്ത്തനമാരംഭിച്ചത്. നിലവില് ആയിരകണക്കിന് രോഗികള് ഈ ആശുപത്രിയെ ആശ്രയിക്കുന്നു. 25 കൊല്ലം മുന്പ്വരെ ഇവിടെ മികച്ച സേവനം ലഭിച്ചിരുന്നു. പിന്നീട് സ്ത്രീകളുടെ പ്രസവവും ശസ്ത്രക്രിയകളും ഇല്ലാതായി. 35 കിടക്കകളും അനുബന്ധസൗകര്യങ്ങളും ഇവിടെയുണ്ട്. ഉച്ചകഴിഞ്ഞാല് ഒരു ഡോക്ടറുടെ സേവനംപോലും ഇവിടെ ലഭ്യമല്ല. പിഎച്ച്സിയെ സിഎച്ച്സി ആയി ഉയര്ത്തിയിട്ടും ആവശ്യത്തിന് ജീവനക്കാരെ നിയമിക്കാന് ഇടത്-വലത് സര്ക്കാരുകള് മറന്നു. കിലോമീറ്ററുകള് അകലെയുള്ള ബത്തേരി താലൂക്ക് ആശുപത്രിയെയാണ് ഇന്ന് എല്ലാവരും ആശ്രയിക്കുന്നത്. ഗൈനോക്കോളജിസ്റ്റ്, പീഡിയാട്രീഷ്യന് തുടങ്ങി അഞ്ച് ഡോക്ടര്മാരുടെ സേവനം ഇവിടെ ആവശ്യമാണ്. അനുബന്ധജീവനക്കാരുടെയും സ്ഥിതിയും വ്യത്യസ്ഥമല്ല.
ഇതിനെതിരെയാണ് ബിജെപി സമരരംഗത്തിറങ്ങിയത്. ഇവിടുത്തെ ജനറേറ്റര് തുരുമ്പെടുത്ത് നശിക്കുന്നു, ആശുപത്രിയിലേക്ക് കുടിവെള്ളം ഉറപ്പുവരുത്തണം. ആശുപത്രിഭൂമി കയ്യേറ്റം ഇവിടെ സ്ഥിരം കാഴ്ച്ചയാണ്. മുടങ്ങികിടക്കുന്ന കെട്ടിടനിര്മ്മാണ പ്രവൃത്തികള് ആരംഭിക്കണമെന്നും നേതാക്കള് ആവശ്യപ്പെട്ടു. കെ. വേണു അദ്ധ്യക്ഷത വഹിച്ചു. ബിജെപി മണ്ഡലം പ്രസിഡന്റ് പി.എം. അരവിന്ദന്, യുവമോര്ച്ച ജില്ലാ പ്രസിഡന്റ് അഖില് പ്രേം, മഹിളാമോര്ച്ച മണ്ഡലം സെക്രട്ടറി ഷീല, രാധാസുരേഷ്, പൊന്നു, വി. മോഹനന്, മുഹമ്മദ് ഗുരുക്കള്, ഒ.പി. ശശിധരന്, കെ.ആര്. ഷിനോജ് തുടങ്ങിയവര് പ്രസംഗിച്ചു.
