ആലപ്പുഴ: അനധികൃതമായി മണല്‍ കടത്തുകയായിരുന്ന വാഹനം പിടികൂടാന്‍ ശ്രമിക്കവെ വാഹനം ഇടിച്ചുകയറ്റി നോര്‍ത്ത് സ്റ്റേഷനിലെ എസ്‌ഐയെ അപായപ്പെടുത്താന്‍ ശ്രമിച്ച സംഭവത്തെക്കുറിച്ച് രഹസ്യാന്വേഷണ വിഭാഗം എറണാകുളം റേഞ്ച് ഐജിക്ക് റിപ്പോര്‍ട്ട് നല്കി. കഴിഞ്ഞദിവസമാണ് സംഭവം സംബന്ധിച്ച് വിശദമായ റിപ്പോര്‍ട്ട് രഹസ്യാന്വേഷണ വിഭാഗം കൈമാറിയത്.
എസ്‌ഐയ്‌ക്ക് പരിക്കേറ്റ സംഭവവുമായി ബന്ധപ്പെട്ട് കേസ് എടുക്കുന്നതടക്കമുള്ള നടപടികളില്‍ വീഴ്ചയുണ്ടായി എന്നതടക്കം റിപ്പോര്‍ട്ടിലുണ്ടെന്നാണ് സൂചന. സംഭവത്തെക്കുറിച്ച് അടിയന്തിര റിപ്പോര്‍ട്ട് നല്‍കാന്‍ ശനിയാഴ്ച തന്നെ ഉന്നത പോലീസ് അധികാരികള്‍ നിര്‍ദേശം നല്കിയിരുന്നു. എസ്‌ഐയ്‌ക്ക് പരിക്കേറ്റ സംഭവത്തില്‍ കൃത്യമായ വകുപ്പുകള്‍ ചുമത്തി കേസെടുക്കാന്‍ അധികൃതര്‍ക്ക് ജില്ലയിലെ ഉന്നത പോലീസ് അധികാരിയും നിര്‍ദേശം നല്കിയിട്ടുള്ളതായാണ് അറിയുന്നത്.
അതേസമയം അപകടമുണ്ടാക്കിയ എയ്‌സ് പോലീസ് ജില്ലാ കളക്ടര്‍ക്ക് കൈമാറി. വാഹനത്തില്‍ മണല്‍ കടത്തുന്നത് പിടികൂടിയാല്‍ വാഹനവും മണലും ജില്ലാ കളക്ടര്‍ക്ക് റിപ്പോര്‍ട്ട് തയാറാക്കി കൈമാറണമെന്ന നടപടിക്രമമനുസരിച്ചാണ് വാഹനവും മണലും ജില്ലാ കളക്ടര്‍ക്ക് കൈമാറിയത്.
സംഭവം ഒതുക്കി തീര്‍ക്കാന്‍ ഉന്നത കോണ്‍ഗ്രസ് നേതൃത്വത്തിന്റെ ഇടപെടല്‍ ഉണ്ടായിരുന്നു. ജന്മഭൂമി അടക്കമുള്ള പത്രങ്ങള്‍ ഇതുസംബന്ധിച്ച് വാര്‍ത്ത നല്‍കിയതോടെ ഇത്തരം നീക്കങ്ങള്‍ ഫലം കാണാതാകുകയായിരുന്നു. കഴിഞ്ഞ ശനിയാഴ്ച പുലര്‍ച്ചെ ഒന്നോടെ ബാപ്പു വൈദ്യര്‍ ജംഗ്ഷന് സമീപമായിരുന്നു മണല്‍ വാഹനം പിടികൂടാന്‍ ശ്രമിക്കുന്നതിനിടെ എസ്‌ഐയ്‌ക്ക് വാഹനം തട്ടി പരിക്കേറ്റത്. മുപ്പാലത്തിന് സമീപം വാഹന പരിശോധന നടത്തുകയായിരുന്ന സൗത്ത് പോലീസ് സംഘം ബീച്ച് ഭാഗത്തുനിന്നും വരുകയായിരുന്ന വാഹനത്തിന് കൈകാണിച്ചെങ്കിലും നിര്‍ത്തിയില്ല. തുടര്‍ന്ന് പെട്രോളിംഗ് സംഘം ഇവരെ പിന്‍തുടരുകയും വിവരം വയര്‍ലെസിലൂടെ കൈമാറുകയും ചെയ്തു. ഈ സമയം ശവക്കോട്ടപാലത്തിന് സമീപമുണ്ടായിരുന്ന നോര്‍ത്ത് എസ്‌ഐയുടെ നേതൃത്വത്തിലുള്ള സംഘം ബാപ്പു വൈദ്യര്‍ ജംഗ്ഷന് സമീപമെത്തി വാഹനം തടയാന്‍ ശ്രമിച്ചു.
റോഡിന് നടുവില്‍ നിന്ന് വാഹനം നിര്‍ത്താനാവശ്യപ്പെട്ട എസ്‌ഐയുടെ നേരെ എയ്‌സ് വാന്‍ ഓടിച്ചുകയറ്റുകയായിരുന്നു. വാഹനം വരുന്നതുകണ്ട് എസ്‌ഐ ചാടി മാറിയതിനാല്‍ കൈക്ക് മാത്രമേ പരിക്കേറ്റുള്ളു. തുടര്‍ന്ന് സമീപത്തെ ഇടവഴിയിലേക്ക് ഓടിച്ചുകയറ്റിയ വാന്‍ രണ്ട് ബൈക്കുകളും ഇടിച്ചു തെറുപ്പിച്ചാണ് നിന്നത്. വാഹനത്തിലുണ്ടായിരുന്നവര്‍ ഓടി രക്ഷപ്പെടുകയും ചെയ്തു.
കസ്റ്റഡിയിലെടുത്ത വാന്‍ പോലീസ് പിന്നീട് സ്റ്റേഷനിലേക്ക് മാറ്റുകയായിരുന്നു. പരിക്കേറ്റ ഉദ്യോഗസ്ഥനുമേല്‍ കേസ് സംബന്ധമായി ശക്തമായ സമ്മര്‍ദ്ദമുള്ളതായും സൂചനയുണ്ട്. ജനറല്‍ ആശുപത്രിയിലടക്കം എസ്‌ഐ ചികിത്സ തേടിയതിന്റെ രേഖകളുണ്ട്.
