കണ്ണൂര്: റോഡപകടങ്ങള് കുറക്കുന്നതിനായി നിയമപാലനവും ബോധവല്ക്കരണവും സമന്വയിപ്പിച്ചിട്ടുള്ള കണ്ണൂര് ജില്ലാ പോലീസിന്റെ പുതിയ പരിപാടി ‘സീറോ അവര്’ പദ്ധതിക്ക് ഇന്നലെ തുടക്കമായി. കണ്ണൂര് ജില്ലാ പോലീസ് ഓഡിറ്റോറിയത്തില് ജില്ലാ പോലീസ് മേധാവി സഞ്ജയ് കുമാര് ഗുരുഡിന് പദ്ധതിയുട ഉദ്ഘാടനം നിര്വ്വഹിച്ചു. ”സീറോ അവര് സമയത്ത് പിടിക്കപ്പെടുന്നവരില് നിന്നും പിഴ ഈടാക്കുന്നതല്ലെന്നല്ല .ഇതിനര്ത്ഥമെന്നും കണ്ണൂര് ജില്ലാ പോലീസ് ഇത്തരക്കാരെ നിയമനടപടിയില് നിന്നും ഒഴിവാക്കുകയല്ല. മറിച്ച് ഇത്തരക്കാരെ കാത്തു നില്ക്കുന്നത് കുറച്ചു കൂടി കടുപ്പമേറിയ ശിക്ഷയാണ്. ഇത്തരക്കാരെ മേഖലാതലത്തില് ആഴ്ചയില് ഒരുദിവസം നടക്കുന്ന നിര്ബസന്ധിത ട്രാഫിക് ബോധവല്ക്കരണ ക്ലാസില് പങ്കെടുപ്പിക്കും. ഏകദേശം 30 മിനുറ്റ് നീണ്ടു നില്ക്കുന്ന ക്ലാസ്സില് വിവിധ മുന്കാല അപകടങ്ങളുടെ വീഡിയോ പ്രദര്ശനവും ജാഗ്രത നിര്ദേശങ്ങളും അപകടത്തിന്റെ ഭീകരത തുറന്നുകാട്ടുന്ന ചിത്രപ്രദര്ശനവും അപകടത്തില് ഇരയായവരുടെ കുടുംബങ്ങളുമായി അനുഭവങ്ങള് പങ്കുവെക്കുന്ന പരിപാടിയും ഉണ്ടായിരിക്കുന്നതാണെന്നും അദ്ദേഹം പറഞ്ഞു. ”ഇന്ന് റോഡപകടങ്ങളില് ഏറിയ പങ്കും ഇരയാവുന്നത് ഇരുചക്ര വാഹങ്ങളും, കാല്നടയാത്രക്കാരുമാണ്. നമ്മള് കുറച്ച് ഉത്തരവാദിത്വത്തോടും ശ്രദ്ധയോടും കൂടി റോഡ് ഉപയോഗിക്കുകയാണെങ്കില് പല ഗുരുതരമായ അപകടങ്ങളും നമുക്ക് ഒഴിവാക്കുന്നതാണ്. ട്രാഫിക് നിയമങ്ങള് കേവലം പിഴ ഈടാക്കുന്നതിനോ ജനങ്ങള്ക്ക് ബുദ്ധിമുട്ട് ഉണ്ടാക്കുന്നതിനോ അല്ല മറിച്ച് ജനങ്ങളുടെ ജീവന് രക്ഷിക്കുന്നത്തിന് വേണ്ടിത്തന്നെയാണെന്നും അദ്ദേഹം പറഞ്ഞു.
ജീവന് രക്ഷിക്കുന്നതിന് വേണ്ടിയും നിങ്ങള്ക്കും മറ്റുള്ളവര്ക്കും വേണ്ടി റോഡ് സുരക്ഷിതമാക്കുന്നതിന് വേണ്ടിയും കണ്ണൂര് ജില്ലാ പോലീസിന്റെ ദൗത്യവുമായി സഹകരിക്കണമെന്നും ജില്ലാ പോലീസ് സൂപ്രണ്ട് അഭ്യര്ത്ഥിച്ചു.
പ്രതിദിനം ഒരുമണിക്കൂര് വാഹന പരിശോധന സമയത്ത് പിടിക്കപ്പെടുന്നവരെ പിഴ അടക്കാതെ നിര്ബന്ധിത ബോധവല്ക്കരണ ക്ലാസ്സില് പങ്കെടുപ്പിക്കും. ട്രാഫിക് നിയമം പാലിക്കുന്നവരെ മാതൃകാപരമായി ഉയര്ത്തിക്കാട്ടുന്ന പരിപാടികളും സംഘടിപ്പിക്കും. ഗതാഗത നിയമംലംഘിക്കുന്നവരെ കണ്ടെത്താന് ജില്ലയിലെ വിവിധ സ്ഥലങ്ങളിലെ കാമറകള് പരിശോധിക്കുന്നതാണെന്നും പരിപാടിയില് സംസാരിക്കവേ ജില്ലാ പോലീസ് സൂപ്രണ്ട് അറിയിച്ചു.
