ആലപ്പുഴ: ജില്ലയിലെ 277 തദ്ദേശസ്ഥാപന വാര്ഡുകളില് കാര്ഷിക സെന്സസ് വിവരശേഖരണം ആരംഭിച്ചു. ജില്ലയില് ഗ്രാമപഞ്ചായത്തുകളിലെ 233 വാര്ഡുകളിലും നഗരസഭയിലെ 44 വാര്ഡുകളിലുമാണ് കാര്ഷിക സെന്സസ് നടത്തുന്നത്. സാമ്പത്തിക സ്ഥിതിവിവരക്കണക്ക് വകുപ്പിലെ ഇന്വെസ്റ്റിഗേറ്റര്മാര് വീടുകള് സന്ദര്ശിച്ചാണ് വിവരം ശേഖരിക്കുന്നത്. കാര്ഷിക സെന്സസ് പ്രവര്ത്തനം ഫലപ്രദമാക്കാനായി ജനങ്ങള് സര്വേയ്ക്കാവശ്യമായ ശരിയായ വിവരങ്ങള് നല്കി സഹകരിക്കണമെന്ന് ഡെപ്യൂട്ടി ഡയറക്ടര് അഭ്യര്ഥിച്ചു.
കാര്ഷിക സെന്സസ് ജോലികള് മൂന്നു ഘട്ടങ്ങളിലായാണ് പൂര്ത്തീകരിക്കുന്നത്. തെരഞ്ഞെടുക്കപ്പെട്ട വാര്ഡുകളിലെ ഓരോ കുടുംബത്തിന്റെയും കൈവശമുള്ള മൊത്തം ഭൂമിയുടെ വിവരങ്ങള് ഒന്നാംഘട്ടത്തില് ശേഖരിക്കും. ഒന്നാംഘട്ടം സെപ്റ്റംബര് 30നകം പൂര്ത്തീകരിക്കും. രണ്ടാംഘട്ടത്തില് വിവരങ്ങള് ശേഖരിക്കപ്പെട്ടതില് നിശ്ചിതശതമാനം കുടുംബങ്ങളെ തെരഞ്ഞെടുത്ത് അവരുടെ കൈവശമുള്ള ഭൂമിയുടെ വിനിയോഗം, ഉടമസ്ഥത, കൃഷിചെയ്യുന്ന വിളകളുടെ വിവരങ്ങള്, ജലസേചനം സംബന്ധിച്ച വിവരങ്ങള് മുതലായവ ശേഖരിക്കും. മൂന്നാംഘട്ടത്തില് തെരഞ്ഞെടുക്കപ്പെട്ട കുടുംബങ്ങളില് നിന്നും കൃഷിക്കുപയോഗിക്കുന്ന വിത്തിനങ്ങള്, രാസ, ജൈവ വളപ്രയോഗങ്ങള്, കീടനാശിനിപ്രയോഗം, കൃഷിയ്ക്കുവേണ്ടി ഉപയോഗിക്കുന്ന വിവിധ ഉപകരണങ്ങള് മുതലായവ സംബന്ധിച്ച വിവരങ്ങളും ശേഖരിക്കും.
