തിരുവനന്തപുരം: വര്ക്കല ഇലകമണ് ആലുവിളപ്പുറം കോളനിയില് പട്ടികജാതി കുടുംബങ്ങളെ ശാരീരികമായും മാനസികമായും ജാതീയ പീഡനത്തിനുവിധേയരാക്കുകയാണെന്ന് കേരള സാംബവസഭ ഇക്കാര്യത്തില് നിയമപാലകരെ സമീപിക്കുമ്പോള് പ്രതികളെ സംരക്ഷിക്കുന്ന നിലപാടാണ് സ്വീകരിക്കുന്നതെന്നും സാംബവസഭ സംസ്ഥാന ജനറല് സെക്രട്ടറി മഞ്ചയില് വിക്രമനും തിരുവനന്തപുരം ജില്ലാ പ്രസിഡന്റ് വടക്കേക്കോണം ബാബുവും വാര്ത്താസമ്മേളനത്തില് പറഞ്ഞു.
ആലുവിളപ്പുറം കോളനിയില് നിരവധി തവണ വീടുകയറിയുള്ള ആക്രമണങ്ങള് നടന്നു. പീഡനത്തിന് വിധേയരാകുന്നവര്ക്കെതിരെ വധശ്രമത്തിന്റെ പേരില് കള്ളക്കേസെടുക്കുന്ന സമീപനമാണ് പോലീസ് പിന്തുടരുന്നത്. കഴിഞ്ഞ ദിവസം പട്ടാപകല് നിഥിന് എന്ന യുവാവ് ക്രൂരമായി ആക്രമിക്കപ്പെട്ട് കൊല്ലം ആശുപത്രിയില് ചികിത്സയിലാണ്. ഇതിലെ ഒരു പ്രതിയെ പോലീസ് കസ്റ്റഡിയില് എടുത്ത് സ്റ്റേഷന് ജാമ്യത്തില് വിട്ടയക്കുകയായിരുന്നു.
വര്ക്കല ഹരിഹരപുരം വാര്ഡില് എല്ഡിഎഫ് സ്ഥാനാര്ത്ഥി തോല്ക്കുകയും ബിജെപി സ്ഥാനാര്ത്ഥി ജയിക്കുകയും ചെയ്തതുമുതലാണ് കോളനിയിലെ കുടുംബങ്ങള്ക്കുനേരെ നിരന്തര ആക്രമണം തുടങ്ങിയത്. പട്ടികജാതി പീഡനനിരോധന നിയമപ്രകാരം കേസെടുക്കുന്നതിനുപകരം പ്രതികളെ സംരക്ഷിക്കുകയാണ് പോലീസ് ചെയ്യുന്നത്. ഇക്കാര്യങ്ങള് ചൂണ്ടിക്കാട്ടി പട്ടികജാതിവര്ഗകമ്മിഷനും പട്ടികജാതി വകുപ്പ് മന്ത്രിക്കും ആഭ്യന്തരവകുപ്പിനും പരാതി നല്കും. വര്ക്കലയില് ഇരകളായവര്ക്ക് നീതി ലഭിക്കുന്ന സാഹചര്യമുണ്ടായില്ലെങ്കില് ശക്തമായ ജനകീയ പ്രക്ഷോഭം ഉയര്ത്തിക്കൊണ്ടുവരുമെന്ന് ഭാരവാഹികള് അറിയിച്ചു.
