മെല്ബണ്: വിഖ്യാത ആസ്ട്രേലിയന് ചലച്ചിത്രകാരന് പോള് കോക്സ് (76) അന്തരിച്ചു. അര്ബുദ രോഗത്തെ തുടര്ന്നായിരുന്നു അന്ത്യം. ആസ്ട്രേലിയയില് സ്വതന്ത്ര സിനിമയുടെ പിതാവെന്ന് അറിയപ്പെടുന്ന ചലച്ചിത്രകാരനാണ് കോക്സ്. ആസ്ട്രേലിയന് ഡയറക്ടേഴ്സ് ആണ് മരണ വാര്ത്ത പുറത്തുവിട്ടത്.
കോക്സിന്റെ സിനിമകള്ക്ക് കൂടുതലും സ്വീകാര്യത ലഭിച്ചിട്ടുള്ളത് ആസ്ട്രേലിയയ്ക്ക് പുറത്താണ്. 18 ചലച്ചിത്രങ്ങളും ഏഴ് ഡോക്യുമെന്ററികളും പതിനൊന്ന് ഹ്രസ്വചിത്രങ്ങളും കോക്സിന്റെ സംവിധാനത്തില് പിറവി കൊണ്ടു. മാന് ഓഫ് ദ ഫ്ളവേഴ്സ്, ഫോഴ്സ് ഓഫ് ഡെസ്റ്റ്നി, ലോണ്ലി ഹാര്ട്ട്സ്, മൈ ഫസ്റ്റ് വൈഫ്, ഇന്നസന്സ് എന്നിവയാണ് അദ്ദേഹത്തിന്റെ പ്രധാന ചലച്ചിത്രങ്ങള്.
തന്റേതുള്പ്പെടെയുള്ള ഏഴ് ചിത്രങ്ങളില് അഭിനയിക്കുകയും തന്റെതന്നെ ഇരുപതോളം ചിത്രങ്ങള്ക്ക് കഥയെഴുതുകയും ചെയ്തിട്ടുണ്ട്.
അന്താരാഷ്ട്ര ചലച്ചിത്ര മേളകളില് സ്ഥിരം സാന്നിധ്യമായിരുന്നു കോക്സ് ചിത്രങ്ങള്. തവോര്മിന ഫിലിം ഫെസ്റ്റിവലില് ഫിപ്രസ്സി പുരസ്ക്കാരവും ഷിക്കാഗോ അന്താരാഷ്ട്ര ചലച്ചിത്രമേളയില് മികച്ച ചിത്രത്തിനുള്ള സില്വര് ഹ്യൂഗോ പുരസ്കാരവും അദ്ദേഹം സ്വന്തമാക്കിയിട്ടുണ്ട്.
1940ല് നെതര്ലന്ഡ്സിലാണ് ജനനം. 1963ല് നിശ്ചല ഛായാഗ്രഹണം പഠിക്കുന്നതിന് ആസ്ട്രേലിയയില് എത്തിയതോടെയാണ് കോക്സിന്റെ സിനിമാ ജീവിതം തുടങ്ങുന്നത്. 1970 കളോടെയാണ് അദ്ദേഹം മുഴുനീള ചിത്രങ്ങള് നിര്മിക്കാന് ആരംഭിച്ചത്.
2012ലെ കേരള ചലച്ചിത്രമേളയില് കോക്സ് ആയിരുന്നു ജൂറി ചെയര്മാന്.
