വിൻഹോക്: ഭാരതത്തിന് യുറേനിയം നൽകാൻ നമീബിയ സമ്മതം മൂളി. നമീബിയൻ പ്രസിഡന്റ് ഹെയ്ജ് ഹീൻഗോബാണ് ഈ വിവരം വ്യക്തമാക്കിയത്. രാഷ്ട്രപതി പ്രണബ് മുഖർജിയുടെ ആഫ്രിക്കൻ സന്ദർശന വേളയിലാണ് നമീബിയൻ പ്രസിഡന്റ് ഭാരതത്തിന് യുറേനിയം നൽകുന്ന കാര്യം അറിയിച്ചത്. ആഫ്രിക്കൻ രാജ്യങ്ങളായ ഘാന, ഐവറികോസ്റ്റ് എന്നീ രാജ്യങ്ങളിലെ സന്ദർശനത്തിനുശേഷമാണു രാഷ്ട്രപതി നമീബിയയിലെത്തിയത്.
നമീബിയയുടെ സാമൂഹിക–സാമ്പത്തിക മേഖലകളിൽ ഭാരതം എല്ലാ സഹായവും നൽകാൻ സന്നദ്ധമാണെന്ന് നമീബിയയുടെ സംയുക്ത പാർലമെന്റ് സമ്മേളനത്തിൽ പ്രസംഗിക്കവേ രാഷ്ട്രപതി പ്രണബ് മുഖർജി പറഞ്ഞു.
ആണവസാങ്കേതികവിദ്യ ചില രാജ്യങ്ങൾ മാത്രം കയ്യടക്കിവച്ചിരിക്കുന്നതു ശരിയല്ലെന്നും ഇക്കാര്യത്തിൽ വിവേചനം പാടില്ലെന്നും രാഷ്ട്രപതി പ്രണബ് മുഖർജിക്ക് നൽകിയ വിരുന്നിനിടെ അദ്ദേഹം വ്യക്തമാക്കി. ഇതിനു പുറമെ ഭാരതത്തിലെ കമ്പനികളെ നമീബിയയിൽ നിക്ഷേപം നടത്താനും നമീബിയൻ പ്രസിഡന്റ് ക്ഷണിച്ചു.
