പെരുമ്പാവൂര്‍: ജിഷയുടെ ഘാതകന്‍ അമീര്‍ ഉള്‍ ഇസ്ലാമിനെ കോടതിയില്‍ ഹാജരാക്കിയത് കറുത്ത തുണിയും ഹെല്‍മറ്റും ധരിപ്പിച്ചായിരുന്നു. പ്രതിയെ ആരും തിരിച്ചറിയാതിരിക്കാനാണ് ഇത്തരത്തില്‍ കൊണ്ടുവന്നത്. നാല് പോലീസ് വാഹനങ്ങളുടെ അകമ്പടിയോടെ കനത്ത കാവലിലാണ് ഇസ്ലാമിനെ കോടതിയിലെത്തിച്ചത്. കൊലപാതകിയുടെ ചിത്രങ്ങള്‍ എടുക്കാതിരിക്കാന്‍ പോലീസ് പ്രത്യേകം ജാഗ്രത പുലര്‍ത്തി. കോടതി പരിസരത്ത് വന്‍ജനാവലിയാണ് പ്രതിയെ കാണാന്‍ കാത്തുനിന്നത്.
പ്രകോപനപരമായ പ്രതികരണമുണ്ടായാല്‍ അതിനെ പ്രതിരോധിക്കാന്‍ കോടതി പരിസരം വടം കെട്ടി തിരിച്ചിരുന്നു. 250-ല്‍ ഏറെ പോലീസുകാരെ വിവിധയിടങ്ങളിലായി വിന്യസിച്ചിരുന്നു.
പ്രതിയുടെ ചിത്രം എടുക്കാന്‍ ശ്രമിച്ച മാധ്യമപ്രവര്‍ത്തകരെ പോലീസ് വിലക്കി. കോടതിയുടെ മുകളിലത്തെ നിലയില്‍നിന്നും പടം എടുക്കാന്‍ ശ്രമിച്ച മാധ്യമപ്രവര്‍ത്തകനെ തടയുകയും നിര്‍ബന്ധപൂര്‍വ്വം താഴെ ഇറക്കുകയും ചെയ്തു. ഒരുകാരണവശാലും ചിത്രമെടുക്കാന്‍ അനുവദിക്കരുതെന്ന് പോലീസിനോട് ഉന്നത ഉദ്യോഗസ്ഥന്‍ പ്രത്യേകം നിര്‍ദ്ദേശം നല്‍കി. ഇതിനിടെ പ്രതിയുടെ ചിത്രമെടുക്കാന്‍ ശ്രമിച്ച ഒരു മാധ്യമപ്രവര്‍ത്തകനെ പോലീസ് തള്ളിമാറ്റി.
തിരിച്ചറിയല്‍ പരേഡ് നടത്തേണ്ടതുകൊണ്ടും അതീവ രഹസ്യമായി നടപടികള്‍ മുന്നോട്ട് കൊണ്ടുപോകുന്നതിനുംവേണ്ടിയാണ് പ്രതിയുടെ ചിത്രമെടുക്കാന്‍ അനുവദിക്കാതിരുന്നത്.
മൊബൈല്‍ ഫോണിലൂടെ ചിത്രമെടുക്കാന്‍ ശ്രമിച്ച ആളുകളേയും പോലീസ് വിരട്ടിയോടിച്ചു.
