ആലപ്പുഴ: സ്വകാര്യ വ്യക്തിയുടെ ഭൂമി വില്പ്പന നടത്തുന്നതിനായി മൂന്ന് പതിറ്റാണ്ട് മുമ്പ് റബ്ബര് ഫാക്ടറി ജങ്ഷനുസമീപം സ്ഥാപിച്ച വെയിറ്റിങ് ഷെഡ്ഡ് രാത്രിയുടെ മറവില് പൊളിച്ചുനീക്കിയത് സംഘര്ഷത്തിനിടയാക്കി. സിപിഎമ്മിലെ ഒരു ജില്ലാതല നേതാവിന്റെ നേതൃത്വത്തിലാണ് ചിപ്കോ വായനശാല മൂന്ന് പതിറ്റാണ്ട് മുമ്പ് കേരളത്തനിമയില് പണികഴിപ്പിച്ച വെയിറ്റിങ് ഷെഡ്ഡ് പൊളിച്ചുനീക്കിയത്.
കഴിഞ്ഞ ദിവസം രാത്രിയാണ് വെയിറ്റിങ് ഷെഡ്ഡ് ഇവിടെ നിന്ന് പൊളിച്ചുനീക്കി അമ്പത് മീറ്റര് പടിഞ്ഞാറോട്ട് മാറ്റി സ്ഥാപിച്ചത്.ഇന്നലെ പുലര്ച്ചെ നാട്ടുകാരെത്തുമ്പോള് ബസ് കാത്തുനില്ക്കുന്ന ഭാഗത്ത് വെയിറ്റിങ് ഷെഡ്ഡ് കാണാതിരുന്നത് അന്വേഷിച്ചപ്പോഴാണ് അമ്പത് മീറ്റര് പടിഞ്ഞാറോട്ട് മാറി നിര്മിച്ച നിലയില് കണ്ടത്.
തുടര്ന്നുള്ള അന്വേഷണത്തിലാണ് നിലവിലെ വെയിറ്റിങ് ഷെഡ്ഡ് സ്ഥിതി ചെയ്തിരുന്ന സ്ഥലത്തിന് തൊട്ടുപിന്നിലെ പ്രവാസി മലയാളിയുടെ കോടികള് വിലമതിക്കുന്ന ഭൂമി കൂടിയ വിലക്ക് വിറ്റുപോകുന്നതിനാണ് ഇത് പൊളിച്ചുനീക്കിയതെന്നറിഞ്ഞത്.ഇതോടെ നാട്ടുകാര് സംഘടിച്ച് സിപിഎം നേതാവിന്റെ വീട്ടിലെത്തി.
പ്രവാസി മലയാളിയുടെ വിഷമങ്ങള് നാട്ടുകാരോട് നേതാവ് അവതരിപ്പിച്ചെങ്കിലും പതിറ്റാണ്ടുകളായി നാട്ടുകാരും യാത്രക്കാരും ഉപയോഗിച്ചുപോരുന്ന വെയിറ്റിങ് ഷെഡ്ഡ് അതേ സ്ഥാനത്ത് തന്നെ പുനര്നിര്മിക്കണമെന്ന് നാട്ടുകാര് ആവശ്യപ്പെട്ടു. ഇതോടെ നാട്ടുകാരുടെ ആവശ്യത്തിന് വഴങ്ങിയ നേതാവ് വെയിറ്റിങ് ഷെഡ്ഡ് പുനഃസ്ഥാപിക്കാന് നടപടി സ്വീകരിക്കുകയായിരുന്നു. പ്രവാസി മലയാളിക്ക് ബുദ്ധിമുട്ടുണ്ടാകാത്ത നിലയില് വെയിറ്റിങ് ഷെഡ്ഡ് ചെറുതാക്കിയാണ് പുനഃസ്ഥാപിച്ചത്.
എആര് ക്യാമ്പിലെ പോലീസുകാരടക്കം ദിനം പ്രതി നൂറുകണക്കിന് യാത്രക്കാര് ബസ് കാത്തുനില്ക്കുന്ന വെയിറ്റിങ് ഷെഡ്ഡ് ഇതേ സ്ഥാനത്ത് തന്നെ നിലനിര്ത്താന് നടപടി സ്വീകരിക്കണമെന്ന് നാട്ടുകാര് അധികൃതരോടാവശ്യപ്പെട്ടു.
