തലശ്ശേരി: കോണ്ഗ്രസ് പ്രവര്ത്തകനായ അച്ഛനെ മര്ദ്ദിച്ച സിപിഎമ്മുകാരനെ പെണ്മക്കള് പാര്ട്ടി ഓഫീസില് കയറി മര്ദ്ദിച്ചു. ഇതിന്റെ പ്രതികാരമായി സിപിഎമ്മുകാര് സംഘം ചേര്ന്ന് ഇവരെ വീട്ടില് കയറി അക്രമിക്കുകയും വീട് അടിച്ചു തകര്ക്കുകയും ചെയ്തു. സിപിഎം കോട്ടയായ തലശ്ശേരി കുട്ടിമാക്കൂലില് ഇന്നലെ രാത്രിയായിരുന്നു സംഭവം. ദളിതനും കോണ്ഗ്രസ് പ്രവര്ത്തകനുമായ മുന് തലശ്ശേരി നഗരസഭാ കണ്ടിജന്സി ജീവനക്കാരന് എന്.രാജനെയാണ് കഴിഞ്ഞദിവസം സിപിഎമ്മുകാര് മര്ദ്ദിച്ചത്. പിതാവിനെ മര്ദ്ദിച്ച സിപിഎമ്മുകാരനെ പാര്ട്ടി ഓഫീസില് കയറി പെണ്കുട്ടികള് തിരിച്ചടിക്കുകയായിരുന്നു. ഇതിന്റെ പ്രതികാരമായാണ് ഇന്നലെ രാത്രി ഒരു സംഘം സിപിഎമ്മുകാര് രാജന്റെ വീടിന് നേരെ അക്രമം നടത്തുകയും വീട്ടില് കയറി രാജന്റെ പെണ്മക്കളെ ക്രൂരമായി മര്ദ്ദിക്കുകയും ചെയ്തത്. മര്ദ്ദനമേറ്റ രാജന്(61), മക്കളായ അഖില(30), അഞ്ജന(25) എന്നിവരെ പരിക്കുകളോടെ തലശ്ശേരി ജനറല് ആശുപത്രിയില് പ്രവേശിപ്പിച്ചു. ഇവരുടെ വീട്ടിലുണ്ടായിരുന്ന കാറിന്റെ ഗ്ലാസുകളും അക്രമിസംഘം തകര്ത്തിട്ടുണ്ട്.
