ചേര്ത്തല: കോണ്ഗ്രസ് നേതൃത്വം നല്കുന്ന പട്ടണക്കാട് സര്വീസ് സഹകരണ ബാങ്കിലെ തട്ടിപ്പുമായി ബന്ധപ്പെട്ട് ഭരണസമിതി അംഗങ്ങളില് നിന്ന് മൊഴിയെടുക്കുമെന്ന് സൂചന. ഇതോടെ കൂടുതല് പേര് പ്രതിപ്പട്ടികയിലേക്ക് എത്തുമെന്നാണ് അന്വേഷണ സംഘം നല്കുന്ന വിവരം.
ബാങ്കിന്റെ ഭരണ സാരഥ്യം കയ്യാളിയിരുന്ന ആള് പലരുടെ പേരുകളിലായി 40 ലക്ഷം രൂപ വായ്പയെടുത്തതും തട്ടിപ്പ് പുറത്തായതിനെ തുടര്ന്ന് പണം തിരിച്ചടച്ചതും നേരത്തെ വിവാദമായിരുന്നു. ഇതിനിടെ ഇരുപത് കോടിയുടെ തട്ടിപ്പുമായി ബന്ധപ്പെട്ട് പ്രതിപട്ടികയിലുള്പ്പെട്ടിരുന്ന ജീവനക്കാരി അന്വേഷണ സംഘത്തിന് മുന്നില് കീഴങ്ങി.
ഖദീജയാണ് ഹൈക്കോടതി നിര്ദ്ദേശ പ്രകാരം ക്രൈംബ്രാഞ്ച് ഉദ്യോഗസ്ഥനു മുന്നില് കീഴടങ്ങിയത്. ഇവരുടെ മൊഴിയെടുത്തെങ്കിലും അറസ്റ്റ് രേഖപെടുത്തിയിട്ടില്ല. അടുത്ത ദിവസം ഇവരുമായി ബാങ്കില് തെളിവെടുപ്പ് നടത്തുമെന്ന് അന്വേഷണ ഉദ്യോഗസ്ഥര് പറഞ്ഞു.
പ്രതിപട്ടികയിലുള്ള ഗിരീഷ്കുമാര് എന്ന ജീവനക്കാരനാണ് ഇനി പിടിയിലാകാനുള്ളത്. ഇയാളുടെ മുന്കൂര് ജാമ്യാപേക്ഷ ഹൈക്കോടതിയുടെ പരിഗണനയിലായിരുന്നതിനാലാണ് അറസ്റ്റ് വൈകിയിതെന്നാണ് വിശദീകരണം. കോടതി ജാമ്യാപേക്ഷ തള്ളിയ സാഹചര്യത്തില് ഉടന് അറസ്റ്റുാകുമെന്നാണ് സൂചന.
മെയ് പകുതിയോടെ നിര്ത്തിവെച്ച അന്വേഷണം കഴിഞ്ഞ ദിവസമാണ് പുനരാരംഭിച്ചത്. ശാസ്ത്രീയമായ തെളിവുകള്ക്കായി ഫോറന്സിക്ക് ലാബില് നല്കിയിട്ടുള്ള വിവരങ്ങള്ക്കു സാധൂകരണം ലഭിച്ചാല് വൈകാതെ കുറ്റപത്രം സമര്പ്പിക്കാനാകുമെന്നാണ് ക്രൈംബ്രാഞ്ച് സംഘത്തിന്റെ വിലയിരുത്തല്.
സഹകരണ വകുപ്പു നല്കിയ പ്രാഥമിക റിപ്പോര്ട്ടിന്റെ അടിസ്ഥാനത്തിലാണ് നിലവിലെ അന്വേഷണം. വകുപ്പു തല അന്വേഷണം പൂര്ത്തിയാക്കി അന്തിമ റിപ്പോര്ട്ടു സമര്പ്പിച്ചിട്ടുണ്ട്.
