ആലപ്പുഴ: നഗരത്തിലെ ആര്ഒ പ്ലാന്റുകള് തുടര്ച്ചയായി പണിമുടക്കുന്നു, ജനം ശുദ്ധജലത്തിനായി നെട്ടോട്ടമോടുന്നു. വെള്ളത്തില് ഫഌറൈഡിന്റെ അംശം കൂടുതലായതിനാല് നഗരവാസികള്ക്ക് ശുദ്ധജലത്തിനായി ആര്ഒ പ്ലാന്റുകളെ ആശ്രയിക്കേണ്ട ഗതികേടാണുള്ളത്. കരളകംപാടം, വടികാട്, വേലിയാകുളം, ചാത്തനാട്, കൊമ്മാടി, പൂന്തോപ്പ്, വഴിച്ചേരി, കോണ്വെന്റ് സ്ക്വയര്, ബാപ്പു വൈദ്യര്, ഇഎസ്ഐ, വലിയകുളം, ആലിശേരി, വെള്ളക്കിണര്, പഴവങ്ങാടി, ചന്ദനക്കാവ്, പഴവീട്, പാതിരപ്പള്ളി, പാട്ടുകുളം, ഹോംകോ, രാമവര്മ തുടങ്ങിയ പ്രദേശങ്ങളിലാണ് നഗരത്തില് ആര്ഒ പ്ലാന്റുകള് പ്രവര്ത്തിക്കുന്നത്.
എന്നാല് ഇതില് പല പ്ലാന്റുകളുടെയും പ്രവര്ത്തനം പതിവായി മുടങ്ങുന്നതായാണ് പരാതി ഉയരുന്നത്. ചിലയിടങ്ങളില് സമയക്രമം പാലിക്കുന്നില്ലെന്നും ആക്ഷേപമുണ്ട്. ചില പ്ലാന്റുകളില് നിന്നു പായല് കലര്ന്ന ജലവും ചിലതില് നിന്നു ദുര്ഗന്ധമുള്ള ജലവും ലഭിക്കുന്നതായി പരാതി ഉയരുന്നു.
കഴിഞ്ഞ ഒരു മാസത്തോളമായി പൂന്തോപ്പിലെ ആര്ഒ പ്ലാന്റില് ശുദ്ധജല വിതരണം മുടങ്ങിയിരിക്കുകയാണ്. ഒരു മാസത്തിനിടെ രണ്ടു മോട്ടോറുകള് കത്തിപ്പോയതാണ് ജലവിതരണം മുടങ്ങാന് കാരണമെന്നു ജല അതോറിറ്റി ജീവനക്കാര് പറഞ്ഞു. തുടര്ച്ചയായുണ്ടാകുന്ന വോള്ട്ടേജ് വ്യതിയാനമാണ് മോട്ടോര് കേടാകാന് കാരണമെന്നും വൈദ്യുതി ബോര്ഡ് വോള്ട്ടേജ് സ്ഥിരത ഉറപ്പാക്കിയാല് മാത്രമേ പുതിയ മോട്ടോര് സ്ഥാപിക്കാന് സാധിക്കുകയുള്ളു എന്നുമാണ് ജല അതോറിറ്റി അധികൃതര് പറയുന്നത്.
നഗരസഭാധികൃതരോ, സര്ക്കാരോ അടിയന്തരമായി ഈ വിഷയത്തില് ഇടപെടണമെന്നാണ് ആവശ്യം ഉയരുന്നത്.
