മുഹമ്മ: ദേശീയ പാതയ്‌ക്ക് വേണ്ടി വേമ്പനാട്ട് കായലില്‍ കുളക്കോഴിച്ചിറയില്‍ നടത്തുന്ന മണല്‍ ഖനനം പാതിരാമണല്‍ ദ്വീപിന് സമീപത്തേയ്‌ക്ക് നീട്ടാനുള്ള നീക്കത്തില്‍ പ്രതിഷേധം.
ഖനനത്തിന് മുന്നോടിയായുള്ള സ്ഥല പരിശോധന നടന്നു. പാതിരാമണല്‍ ദ്വീപിന്റെ മുഖ്യ പ്രവേശന കവാടമായ കായിപ്പുറം ബോട്ട്‌ജെട്ടിക്ക് തെക്ക് മേഖലയിലാണ് കായലില്‍ നിന്ന് എടുക്കുന്ന മണല്‍ ശേഖരിക്കുന്നതിനുള്ള സ്ഥലം ഒരുക്കുന്ന ജോലികള്‍ നടന്നത്. കായല്‍ തീരത്തോട് ചേര്‍ന്ന സ്ഥലം ജെസിബി ഉപയോഗിച്ച് നിരപ്പാക്കുന്ന ജോലിയാണ് ഇന്നലെ നടന്നത്.ലോകോത്തര ടൂറിസ്റ്റ് കേന്ദ്രമാക്കി പാതിരാമണല്‍ ദ്വീപിനെ മാറ്റുന്നതിനുള്ള പദ്ധതികള്‍ മെനയുന്നതിനിടെയാണ് ദ്വീപിനും കായല്‍ സമ്പത്തിനും കനത്ത ആഘാതമേല്‍പ്പിക്കുന്ന മണല്‍ ഖനനത്തിന് അധികൃതര്‍ അനുമതി നല്‍കിയത്.
ജനജീവിതം ദുസ്സഹമാക്കുന്ന മണല്‍ ഖനനത്തില്‍ നിന്ന് പിന്മാറണമെന്ന് മേഖല സന്ദര്‍ശിച്ച മുഹമ്മ പഞ്ചായത്ത് പ്രസിഡന്റ് അരുണ്‍മോഹന്‍ ആവശ്യപ്പെട്ടു. ദ്വീപിന്റെ സുരക്ഷയ്‌ക്ക് കനത്ത ഭീഷണിയാകുമെന്നതിനാല്‍ ഖനനം ഈ മേഖലയില്‍ അനുവദിക്കില്ലെന്നും അരുണ്‍ മോഹന്‍ പറഞ്ഞു. ജില്ലാ കളക്ടര്‍ ഉള്‍പ്പെടെയുള്ള അധികാരികള്‍ക്ക് പരാതി നല്‍കിയതായും പറഞ്ഞു. കുളക്കോഴിച്ചിറയില്‍ നിന്ന്അഞ്ചരലക്ഷം ക്യുബിക് ടണ്‍ മണല്‍ ശേഖരിക്കാനാണ് അനുമതി നല്‍കിയത്. ഇത് ഒരാഴ്ചക്കുള്ളില്‍ ശേഖരിച്ചതോടെയാണ് അനുമതി ഒന്‍പത് ലക്ഷമാക്കി ഉയര്‍ത്തി നല്‍കിയതെന്നും അരുണ്‍ മോഹന്‍ പറഞ്ഞു.
