കൊച്ചി: ഡോക്ടറുടെ കുറിപ്പടി ഇല്ലാതെ സിറിഞ്ചോ വേദനസംഹാരികളോ വില്‍ക്കരുതെന്ന് മെഡിക്കല്‍ ഷോപ്പ് ഉടമകള്‍ക്ക് നിര്‍ദേശം നല്‍കിയിട്ടുണ്ടെന്ന് ആഭ്യന്തര മന്ത്രി രമേശ് ചെന്നിത്തല . ആരോഗ്യമന്ത്രിയുമായി ഇക്കാര്യം സംസാരിച്ചിട്ടുണ്ട്. അമൃത ആശുപത്രിയില്‍ ‘ഓപ്പറേഷന്‍ തൂഫാന്‍’ പദ്ധതി ഉദ്ഘാടനം ചെയ്ത് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
കാസര്‍കോട് ഇവിഎം ഹാക്കിങ് നടന്നുവെന്ന ആരോപണം മന്ത്രി നിഷേധിച്ചു. അങ്ങനെ ഹാക്കിംഗ് നടക്കില്ല. ആരെങ്കിലും അങ്ങനെ പറഞ്ഞിട്ടുണ്ടോ എന്നറിയില്ല. പറഞ്ഞിട്ടുണ്ടെങ്കില്‍ ശരിയല്ല. വിശദമായി പരിശോധന പാര്‍ട്ടി നടത്തുമെന്നും വ്യക്തതയില്ലാത്ത കാര്യങ്ങളായിട്ടാണ് തോന്നുന്നതെന്നും അദ്ദേഹം പറഞ്ഞു.
ആശുപത്രികളില്‍ അവയവ കച്ചവടം നടക്കുന്നുവെന്ന പരാതിയുടെ അടിസ്ഥാനത്തിലാണ് എസ്‌ഐടി രൂപീകരിച്ചത്. എസ്‌ഐടി ഉടന്‍ അന്വേഷണം തുടങ്ങും. അവയവ കച്ചവടം കര്‍ശനമായി നിയന്ത്രിക്കുമെന്നും മന്ത്രി പറഞ്ഞു.
