പയ്യന്നൂര്‍: സിപിഎം കേന്ദ്രത്തില്‍ മൃതദേഹം കാണുന്നതിനും പാര്‍ട്ടി വിലക്ക്. അന്ത്യോപചാരമര്‍പ്പിക്കാനും ഭൗതികദേഹത്തില്‍ റീത്ത് വെക്കാനും എത്തിയവരെ സിപിഎമ്മുകാര്‍ സംഘം ചേര്‍ന്ന് തടയുകയും കയ്യേറ്റം ചെയ്യുകയുമുണ്ടായി. പയ്യന്നൂര്‍ പിലാത്തറ നരിക്കാംവള്ളിയിലാണ് സിപിഎമ്മിന്റെ കടുത്ത അസഹിഷ്ണുതയും ഭീകരതയുമുണ്ടായത്.
പിലാത്തറ നരീക്കാം വള്ളിയില്‍ കഴിഞ്ഞ ദിവസം അന്തരിച്ച ടി.എം.രവീന്ദ്രന്റെ മൃതദേഹം കാണാനും റീത്ത് സമര്‍പ്പിക്കാനും എത്തിയ സംഘപരിവാര്‍ പ്രവര്‍ത്തകരെയാണ് സിപിഎം സംഘം തടഞ്ഞത്. രവീന്ദ്രന്റെ മകന്‍ മനീഷ് ദേശഭാരതി സ്വയം സഹായ സംഘത്തിന്റെ പ്രവര്‍ത്തകനാണ്. ഈ സ്വയം സഹായ സംഘത്തിലെ സഹപ്രവര്‍ത്തകരോടാണ് സിപിഎം കാടത്ത സമീപനമുണ്ടായത്. റീത്തുമായെത്തിയ പ്രവര്‍ത്തകരായ എം.വി.സനീഷ്, പി.വി.ബാബു, കെ.പി.വി.ബാലകൃഷ്ണന്‍, യു.പ്രശാന്ത് എന്നിവരെ മര്‍ദിക്കുകയും റീത്ത് വലിച്ചുകീറി നശിപ്പിക്കുകയും ചെയ്തു. കണ്ണൂര്‍ ജില്ലയില്‍ മരണവീടുകളില്‍പ്പോലും സിപിഎമ്മുകാര്‍ മറ്റ് പാര്‍ട്ടി പ്രവര്‍ത്തകരോട് വെച്ചുപുലര്‍ത്തുന്ന സമീപനമാണ് നരീക്കാംവള്ളിയിലുമുണ്ടായത്. നടപടി പ്രദേശത്തിനുപോലും അവമതിപ്പുണ്ടാക്കിയെന്നാണ് പാര്‍ട്ടി അണികള്‍ പോലും പറയുന്നത്. സിപിഎമ്മുകാരുടെ കയ്യേറ്റത്തിനെതിരെ പരിയാരം പോലീസില്‍ പരാതി നല്‍കിയിട്ടുണ്ട്.
