ആലപ്പുഴ: വണ്ടാനം മെഡിക്കല് കോളജില് പ്രധാനമന്ത്രി സ്വാസ്ഥ്യ സുരക്ഷ പദ്ധതി പ്രകാരം അനുവദിച്ച സൂപ്പര് സ്പെഷ്യല്റ്റിക്കൊപ്പം ട്രോമ കെയര് യൂണിറ്റിന്റെ രണ്ടാംഘട്ട വികസനത്തിന് 17 കോടിരൂപ കൂടി അനുവദിച്ച് കേന്ദ്രമന്ത്രി ജെ.പി. നദ്ദ വാക്കു പാലിച്ചു. ഇവിടുത്തെ ജനപ്രതിനിധികള് തെരഞ്ഞെടുപ്പ് പ്രചാരണ കാലയളവില് നല്കുന്ന വാഗ്ദാനങ്ങള് മറക്കുന്ന സാഹചര്യത്തിലാണ് കേന്ദ്രമന്ത്രിയുടെ അനുകരണീയ മാതൃക.
ഇവിടെ ദല്ഹിയിലെ ഓള് ഇന്ത്യ ഇന്സ്റ്റിറ്റിയുട്ട് ഓഫ് മെഡിക്കല് സയന്സിന്റെ മാതൃകയില് സംസ്ഥാന പൊതുമരാമത്ത് വകുപ്പു രൂപകല്പ്പന ചെയ്ത കെട്ടിടത്തിന്റെ ഒന്നാംഘട്ട നിര്മാണം ആരംഭിക്കാനിരിക്കെയാണു പുതിയ പ്രഖ്യാപനം ഉണ്ടായത്. കഴിഞ്ഞ ഫെബ്രുവരി 20നു സൂപ്പര് സ്പെഷ്യല്റ്റി കെട്ടിട സമുച്ചയത്തിന്റെ നിര്മാണം കേന്ദ്രമന്ത്രി ഉദ്ഘാടനം ചെയ്തിരുന്നു. 150 കേടി രൂപയാണു സൂപ്പര് സ്പെഷ്യല്റ്റി പദ്ധതി ചെലവ്.
ഉദ്ഘാടന സമ്മേളനത്തിലാണ് ട്രോമ കെയര് യൂണിറ്റിന് പണം അനുവദിക്കുമെന്ന് ജെ.പി. നദ്ദ പ്രഖ്യാപിച്ചത്. മൂന്നു നിലകളിലായി 5,000 ച. മീറ്റര് വിസ്തീര്ണത്തിലാണു കെട്ടിട നിര്മാണം. സിടി സ്കാന്, അള്ട്രാ സൗണ്ട് സ്കാന്, എംആര് ഐ സ്കാന്, എക്സറേ, ലാബ്, ബ്ലഡ്സ്റ്റോറേജ്, മൈനര് ഓപ്പറേഷന് തിയറ്റര്, ക്രിട്ടിക്കല് കെയര് വാര്ഡുകള്, സ്റ്റെപ്ഡൗണ് തീവ്രപരിചരണ വിഭാഗം, പവര് ലോണ്ട്രി, പ്ലാസ്റ്റര് റൂം തുടങ്ങിയ ആധുനിക സൗകര്യങ്ങളാണു ട്രോമ കെയര് യൂണിറ്റില് ഉണ്ടാവുക. 150 കിടക്കകളാണു തയാറാക്കുന്നത്.
ദേശീയപാതയോടു ചേര്ന്ന ആശുപത്രിയായതിനാല് ഇവിടെ അപകട കേസുകള് നിരവധിയാണ് ദിവസവും റിപ്പോര്ട്ട് ചെയ്യുന്നത്. ഇപ്പോഴത്തെ സാഹചര്യത്തില് സൗകര്യങ്ങളുടെ കുറവു കാരണം കോട്ടയം മെഡിക്കല് കോളജിലേക്കോ, കൊച്ചിയിലെ സ്വകാര്യാശുപത്രികളിലേക്കോ രോഗിയെ റഫര് ചെയ്യുകയാണ് പതിവ്. കഷ്ടിച്ചു മൂന്നു രോഗികളെ മാത്രം കിടത്താവുന്ന ട്രോമാ കെയര് യൂണിറ്റാണ് നിലവിലുള്ളത്. ന്യുറോ സര്ജറി വിഭാഗത്തിലും മതിയായ സൗകര്യങ്ങളില്ല.
അത്യാഹിത വിഭാഗത്തില് വിദഗ്ദ്ധ ഡോക്ടര്മാരുടെ കുറവും ചികില്സയെ ബാധിക്കുന്നു. നരേന്ദ്രമോദി സര്ക്കാരിന്റെ ഇടപെടല് ആലപ്പുഴയുടെ ആരോഗ്യരംഗത്തിന് വലിയ ആശ്വാസമാണ് പകരുന്നത്.
