കണ്ണൂര്: മധ്യവേനലവധി കഴിഞ്ഞ് ജില്ലയിലെ വിദ്യാലയങ്ങള് തുറന്നതോടെ കൗതുകവും അമ്പരപ്പുമായി പുതിയ ലോകത്തേക്ക് കൊച്ചുമിടുക്കരുടെ ആരവമുയര്ന്നു. വിദ്യാലയങ്ങളില് പ്രവേശനോല്സവം വര്ണാഭവും ഹരിതാഭവുമാക്കാന് മത്സരം തന്നെ നടന്നു. തോരണങ്ങള്, ബലൂണുകള്, വര്ണക്കടലാസുകള് എന്നിവ കൊണ്ട് അണിഞ്ഞൊരുങ്ങിയ വിദ്യാലയങ്ങള് മധുരം നല്കിയാണ് കുട്ടികളെ സ്കൂളിലേക്ക് സ്വാഗതം ചെയ്തത്.
സ്കൂള് പ്രവേശനോല്സവത്തിന്റെ ജില്ലാതല ഉദ്ഘാടനം തലശ്ശേരി വലിയ മാടാവില് ഗവ. സീനിയര് ബേസിക് സ്കൂളില് നിയുക്ത എംഎല്എ എ.എന്.ഷംസീര് നിര്വഹിച്ചു. ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷത വഹിച്ചു. തലശ്ശേരി നഗരസഭാ ചെയര്മാന് സി.കെ.രമേശന് അക്ഷരദീപം തെളിയിച്ചു. തുടര്ന്ന് അക്കാദമിക് കലണ്ടര് പ്രകാശനവും പ്രവേശനോല്സവ ഗാനാലാപനവും നടന്നു.
കണ്ണൂര് വിദ്യാഭ്യാസ ജില്ലാതല സ്കൂള് പ്രവേശനോല്സവം അരോളി ഗവ.ഹയര് സെക്കന്ററി സ്കൂളില് നടന്നു. പാപ്പിനിശ്ശേരി ഗ്രാമപഞ്ചായത്ത് പ്രസിഡന്റ് കെ.നാരായണന്റെ അധ്യക്ഷതയില് നിയുക്ത എംഎല്എ കെ.എം.ഷാജി ഉദ്ഘാടനം ചെയ്തു.
പ്രവേശനോല്സവത്തിന്റെ ഭാഗമായി വിദ്യാലയങ്ങളില് സുരക്ഷാ സന്ദേശങ്ങളും മാതൃകാ സ്കൂള് പദ്ധതി അവതരണവും നടന്നു.
തിലാന്നൂര് യുപി സ്കൂള് പ്രവേശനോത്സവം സമുചിതമായി ആഘോഷിച്ചു. സ്കൂള് ഹെഡ്മിസ്ട്രസ് എം.പി.പത്മജയുടെ അധ്യക്ഷതയില് കൗണ്സിലര് എം.രാജീവന് ഉദ്ഘാടനം ചെയ്തു. ബാലന് മാസ്റ്റര്, കെ.വി.ജയരാജന് മാസ്റ്റര്, രാജിത്ത് കുളവയല്, കെ.മനോജ് മാസ്റ്റര് എന്നിവര് സംസാരിച്ചു. പിടിഎ പ്രസിഡണ്ട് ഷിബാഷാജി സൗജന്യ പുസ്തക വിതരണം നടത്തി. തുടര്ന്ന് മധുരപലഹാര വിതരണവും കുട്ടികളുടെ കലാപരിപാടികളും നടന്നു.
ഇരിക്കൂര് ബ്ലോക്ക്തല പ്രവേശനോത്സവം ചാമക്കാല് ഗവ എല്പി സ്കൂളില് വിവിധ പരിപാടികളോടെ നടന്നു. വാദ്യമേളങ്ങളുടെ അകമ്പടിയോടെ നവാഗതരെ സ്വീകരിച്ചു. തുടര്ന്ന് നടന്ന യോഗത്തില് ഹെഡ്മിസ്ട്രസ് എത്സമ്മ മാത്യു സ്വാഗതം പറഞ്ഞു. പയ്യാവൂര് പഞ്ചായത്ത് വൈസ് പ്രസിഡണ്ട് ടി.പി.അഷറഫ് അധ്യക്ഷത വഹിച്ചു. ഇരിക്കൂര് ബ്ലോക്ക് പഞ്ചായത്ത് പ്രസിഡണ്ട് ടി.വസന്തകുമാരി പ്രവേശനോത്സവം ഉദ്ഘാടനം ചെയ്തു. ഇരിക്കൂര് ബിപിഒ സി.സുധാകരന് പ്രവേശനോത്സവ സന്ദേശവും ഡയറ്റ് ഫാക്കല്ട്ടി എസ്.കെ.ജയദേവന് അക്ഷരദീപം തെളിയിക്കലും ഗ്രാമ പഞ്ചായത്ത് മെമ്പര് കെ.ടി.അനില് പഠനോപകരണ വിതരണവും നടത്തി. ലൗലി ജോസഫ്, കെ.ജി.ഷിബു, രജനി രാജന്, കെ.എ.ആന്സി, ടി.സ്വപ്ന തുടങ്ങിയവര് സംസാരിച്ചു.
എള്ളരഞ്ഞി എല്പി സ്കൂള് പ്രവേശനോത്സവം നഗരസഭാ കൗണ്സിലര് കെ.കെ.ശശിധരന് ഉദ്ഘാടനം ചെയ്തു. പിടിഎ പ്രസിഡണ്ട് കെ.എ.പ്രകാശന് അധ്യക്ഷത വഹിച്ചു. കൗണ്സിലര് ഇ.ഗീത, ഇ.വി.നാരായണന്, പി.രജിത, എസ്.കെ.മോഹനന്, പി.ഗീത, എം.സി.ശ്രീജിത്ത്, എസ്.കെ.ഗീത, പി.രാജേഷ്, പ്രധാനാധ്യാപകന് കെ.പി.വേണുഗോപാലന്, ദിബിന് കൃഷ്ണന് എന്നിവര് സംസാരിച്ചു. നവാഗതര്ക്ക് സ്കൂള് കിറ്റ് വിതരണം ചെയ്തു.
തലശ്ശേരി വിദ്യാഭ്യാസ ജില്ലാ സ്കൂള് പ്രവേശനോത്സവം വര്ണാഭമായ അന്തരീക്ഷത്തില് തലശ്ശേരി സെന്റ് ജോസഫ്സ് ഹയര് സെക്കന്ററി സ്കൂളില് വിദ്യാഭ്യാസ ജില്ലാ ഓഫീസര് രാധാകൃഷ്ണന്റെ അധ്യക്ഷതയില് തലശ്ശേരി മുനിസിപ്പല് വൈസ് ചെയര്പേഴ്സണ് നജ്മ ഹാഷിം ഉദ്ഘാടനം ചെയ്തു. ഫാ.മാത്യു, അബ്ദുള് ഖിലാബ്, ഫാത്തിമ മാളിയേക്കല്, ഡെന്നി ജോണ് തുടങ്ങിയവര് സംസാരിച്ചു. ബെന്നി ഫ്രാന്സിസ് സ്വാഗതവും ജോസ് പ്രകാശ് നന്ദിയും പറഞ്ഞു. നവ വിദ്യാര്ത്ഥി വി.സൗരവ് അക്ഷരദീപം തെളിയിച്ച ചടങ്ങിന് ശേഷം നഗരംചുറ്റി പ്രവേശനോത്സവ വിളംബരജാഥയും നടത്തി. പിടിഎ പ്രതിനിധികളുടെ സജീവസാന്നിധ്യം കൊണ്ട് ധന്യമായ ചടങ്ങിന് ശേഷം വിദ്യാര്ത്ഥികള്ക്ക് മധുരപലഹാര വിതരണവും നടത്തി.
മാഹി അവറോത്ത് സ്കൂളിലെ പ്രവേശനോത്സവം ശ്രദ്ധേയമായി. കൊടിതോരണങ്ങളാല് അലംകൃതമായ വിദ്യാലയമുറ്റത്ത് ബലൂണുകളുമായി നിന്ന മുതിര്ന്ന വിദ്യാര്ത്ഥികള് ആദ്യമായി വിദ്യാലയത്തിലെത്തിയ കുരുന്നുകളെ ക്ലാസുകളിലേക്ക് ആനയിച്ചു. തുടര്ന്ന് സ്കൂള് മുറ്റത്ത് പ്രത്യേകം അസംബ്ലി ചേരുകയും നവാഗതരെ അതിഥികളായി സ്റ്റേജിലിരുത്തുകയും ചെയ്തു. അതിനുശേഷം പ്രവേശനോത്സവത്തിന്റെ ഔപചാരികമായ ഉദ്ഘാടനച്ചടങ്ങുകള് ആരംഭിച്ചു. പിടിഎ പ്രസിഡണ്ട് കെ.വി.ഹരീന്ദ്രന് ഉദ്ഘാടനം ചെയ്തു. പൂര്വ്വ വിദ്യാര്ത്ഥി സംഘടനാ പ്രസിഡണ്ട് കെ.പി.ഗംഗാധരന്, കഴിഞ്ഞ എസ്എസ്എല്സി പരീക്ഷയില് മുഴുവന് വിഷയങ്ങളിലും എ പ്ലസ് നേടിയ പൂര്വ്വ വിദ്യാര്ത്ഥി അഭിനന്ദ് പ്രേമന് തുടങ്ങിയവര് സംസാരിച്ചു. എന്.അഭിഷേക് സ്വാഗതം പറഞ്ഞു. പ്രവേശനോത്സവത്തെ തുടര്ന്ന് പായസ വിതരണവും നടന്നു.
കരയത്തുംചാല് ഗവ യുപി സ്കൂളില് പ്രവേശനോത്സവത്തിന്റെ ഭാഗമായി പുതിയ കുട്ടികളെ ശിങ്കാരിമേളത്തിന്റെ അകമ്പടിയോടെ പൂക്കള് നല്കി സ്വീകരിച്ചു. എസ്എംസി ചെയര്മാന് ബിജു പുതുശ്ശേരിയുടെ അധ്യക്ഷതയില് ശ്രീകണ്ഠാപുരം മുനിസിപ്പല് കൗണ്സിലര് സൂസന് ദേവസ്യ ഉദ്ഘാടനം ചെയ്തു. കുട്ടികള്ക്കുള്ള കിറ്റ് വിതരണം അഞ്ചാം വാര്ഡ് കൗണ്സിലര് ലിനി മേലേട്ടുതടത്തില് നിര്വഹിച്ചു. മുന് ഹെഡ്മാസ്റ്റര് കെ.ജെ.ജോണ് യൂണിഫോം വിതരണം നിര്വഹിച്ചു. പി.കോമളവല്ലി, ടി.ജെ.ത്രേ്യസ്യ. കെ.വിനയ, കെ.വി.കുഞ്ഞിരാമന് എന്നിവര് സംസാരിച്ചു. പ്രധാനാധ്യാപകന് ബാബു ജോര്ജ്ജ് സ്വാഗതവും സ്റ്റാഫ് സെക്രട്ടറി പി.സി.ടോമി നന്ദിയും പറഞ്ഞു.
പാനൂര് നഗരസഭയുടെ പ്രഥമ പ്രവേശനോത്സവം മധുരതരമായി. നഗരസഭാ ഓഫീസിനടുത്തു തന്നെയുള്ള പാനൂര് യുപി സ്ക്കൂളാണ് ഇത്തവണ പ്രവേശനോത്സവത്തിന്റെ ഉദ്ഘാടന ചടങ്ങിന് ആതിഥ്യം വഹിച്ചത്. ഘോഷയാത്രയായി വിശിഷ്ടാതിഥികളെ സ്ക്കൂളിലേക്ക് ആനയിച്ചു പുഷ്പവൃഷ്ടി നടത്തി നവാഗതരെ വിദ്യാലയത്തിലേക്ക് സ്വീകരിച്ചു. 51 വിദ്യാര്ത്ഥികളാണ് ഇന്ന് ഒന്നാം ക്ലാസില് പ്രവേശനം നേടിയെത്തിയിട്ടുള്ളത്. വാര്ഡ് കൗണ്സിലറും പിടിഎ പ്രസിഡണ്ടുമായ കെ.കെ.സുധീര് കുമാറിന്റെ അദ്ധ്യക്ഷതയില് നഗരസഭാധ്യക്ഷ കെ.വി.റംല ടീച്ചര് മുനിസിപ്പല് തല പ്രവേശനോത്സവം ഉദ്ഘാടനം ചെയ്തു. നഗരസഭാ വൈസ് ചെയര്മാന് എം.കെ.പത്മനാഭന് അക്ഷരദീപം തെളിയിച്ചു. നവാഗതര്ക്ക് കേരളാ ഗ്രാമീണ് ബേങ്ക് പാനൂര് ശാഖയുടെ വകയായുള്ള കിറ്റ് മാനേജര് ഇ.എം.രാജന് വിതരണം ചെയ്തു. മദര് പിടിഎ പ്രസിഡണ്ട് എം.വി.സ്നേഹലത, ടി.റഊഫ്, കെ.പി.ശശീന്ദ്രന് മാസ്റ്റര് തുടങ്ങിയവര് സംസാരിച്ചു. ഹെഡ്മാസ്റ്റര് ഇ.സുരേഷ് ബാബു സ്വാഗതവും ഇ.മണിരാജ് നന്ദിയും പറഞ്ഞു. സ്കൂള് പരിസരം അലങ്കരിച്ചും വേദിയില് കുരുത്തോല ഉപയോഗിച്ചുള്ള വ്യത്യസ്ത രൂപങ്ങള് നിര്മ്മിച്ചുവെച്ചും ഉത്സവഛായ പകരാന് സംഘാടകര് പ്രത്യേകം ശ്രദ്ധിച്ചു. കുട്ടികളും രക്ഷിതാക്കളുമുള്പ്പടെ നിരവധി പേര് ചടങ്ങില് സംബന്ധിച്ചു. പ്രാര്ത്ഥനക്ക് പുറമേ പ്രത്യേകം തയ്യാറാക്കിയ അര്ത്ഥസമ്പുഷ്ടമായ പ്രവേശന ഗാനവുമുണ്ടായിരുന്നു.
ഇരിട്ടി നഗരസഭാ പരിധിയിലെ അംഗന്വാടികളുടെ പ്രവേശനോത്സവവും പൂര്വ വിദ്യാര്ഥി സംഗമവും ഘോഷയാത്രയും സംഘടിപ്പിച്ചു. ഘോഷയാത്രക്ക് ശേഷം പയഞ്ചേരി എം 2 എച്ച് ഓഡിറ്റോറിയത്തില് നടന്ന വിവിധ പരിപാടികളുടെ ഉദ്ഘാടനം നഗരസഭാ ചെയര്മാന് പി.പി.അശോകന് നിര്വഹിച്ചു. നഗരസഭാ വൈസ് ചെയര്മാന് കെ.സരസ്വതി അദ്ധ്യക്ഷത വഹിച്ചു. നഗരസഭാ കൗണ്സിലര്മാരായ പി.പി.ഉസ്മാന്, പി.വി.പ്രേമവല്ലി, പി.എം.രവീന്ദ്രന്, പി.വി.ദീപ, ഇന്ദുമതി തുടങ്ങിയവര് പ്രസംഗിച്ചു. അംഗന്വാടികളിലെ കുട്ടികളുടെ വിവിധ പരിപാടികളും അരങ്ങേറി.
