ചെങ്ങന്നൂര്: ഭാരതത്തിന്റെ കാഴ്ചപ്പാടുകളെ ആഴത്തില് സ്വാധീനിക്കാന് കഴിഞ്ഞ രചനകളില് പ്രധാനം രാമായണം തന്നെയാണന്ന് ഡോ.എം.ജി. ശശിഭൂഷണ് പറഞ്ഞു. ചെങ്ങന്നൂര് ദയാനന്ദഭവനില് വേദപണ്ഡിതന് നരേന്ദ്രഭൂഷണിന്റെ എഴുപത്തിയൊന്പതാം ജന്മ ദിനാഘോഷങ്ങളുടെ ഭാഗമായി രാമായണം ചരിത്രകാലങ്ങളിലൂടെ എന്ന വിഷയത്തില് പ്രഭാഷണം നടത്തുകയായിരുന്നു അദ്ദേഹം.
ഡോ.എം.ജി. ശശിഭൂഷണ്
രാമായണം നമ്മുടെ സംസ്ക്കാരത്തെ മാത്രമല്ല രാജനീതിയേയും ഗണ്യമായി സ്വാധീനിച്ചിരുന്നു. പിതൃഘാതകരായ പുത്രന്മാര് ഹൈന്ദവ രാജപരമ്പരകളില് പൗരാണികകാലം വരെ ഉണ്ടാകാതിരിക്കാന് കാരണം രാമായണത്തിന്റെ സ്വാധീനമായിരുന്നു എന്ന് മുഗള് ചക്രവര്ത്തിയായ അക്ബറിന് അറിയാമായിരുന്നു.
ദിന് ഇലാഹിയുടെ സ്ഥാപകനായ അക്ബര് ജീവിതാന്ത്യ നാളുകളില് സീതാരാമന്മാരുടെ രൂപങ്ങളോടുകൂടിയ വെള്ളിനാണയങ്ങള് ഒന്നിലധികം തവണ പുറത്തിറക്കിയിരുന്നു. പില്ക്കാലത്ത് ജഹാംഗീറായി പ്രശസ്തനായ സലീം രാജകുമാരന് അക്ബറിനെതിരെ സൈനിക വെല്ലുവിളികള് നടത്തുന്ന കാലത്തായിരുന്നു തന്റെ സദസ്സിലെ പണ്ഡിതന്മാരെക്കൊണ്ട് ചക്രവര്ത്തി രാമായണം പാരായണം ചെയ്യിച്ചത് സീതാരാമ നാണയങ്ങള് ഇറക്കിയതിനെ ചോദ്യം ചെയ്ത മതപുരോഹിതന്മാരെയും അദ്ദേഹം അവഗണിച്ചു.
മുഗള്ചക്രവര്ത്തിമാരില് പ്രശസ്തനായ ഷാജഹാനും തന്റെ പുത്രനായ ഔറംഗസീബിന്റെ തടവുകാരനായി ആഗ്രാക്കോട്ടയില് കഴിയുമ്പോള് പിതാവിന്റെ വാക്കുകളനുസരിച്ച് രാമനെക്കുറിച്ച് ഓര്ക്കുന്നുണ്ട്. ഭാരതത്തിലെ രാജാക്കന്മാര് എത്ര ഭാഗ്യവാന്മാര് എന്നാണ് മകളായ ജഹനാരയോട് ഷാജഹാന് പറഞ്ഞത്്.
ഉപനിഷത്തുകള് പേര്ഷ്യന് ഭാഷയില് പരിഭാഷപ്പെടുത്തിയ ദാരാ രാജകുമാരന് ഷാജഹാന്റെ പിന്ഗാമിയായി വന്നിരുന്നു എങ്കില് ഭാരതത്തിന്റെ ചരിത്രം മറ്റൊന്നാകുമായിരുന്നു. കഥകളിലൂടെ മഹത്തായ ജീവിതദര്ശനം തലമുറകള്ക്ക് പകര്ന്നുകൊടുത്ത രാമായണം കാലാതിവര്ത്തിയായി ഭാരതത്തിന്റെ ആത്മാവിനെ സ്വാധീനിച്ചു കൊണ്ടിരിക്കുന്നു. വരും കാലത്തും ഈ ആദികാവ്യം മാനവകുലത്തിന് വെളിച്ചമായി തുടരും.
മലയാളികള് അദ്ധ്യാത്മരാമായണത്തെയാണ്് കൂടുതല് പ്രണയിക്കുന്നതെങ്കിലും വാല്മീകീരാമായണത്തെ അവര് തങ്ങളുടെ ആത്മാവില് പ്രതിഷ്ഠിച്ചിരിക്കുന്നു. വാല്മീകിയുടെ ശ്രീരാമന് മര്യാദാപുരുഷോത്തമനാണെങ്കില്, അദ്ധ്യാത്മരാമായണത്തിലെ ശ്രീരാമന് അവതാര പുരുഷനും ഭഗവാനുമാണ്. രണ്ടും ഭാരതീയന്റെ മനസ്സിനെയും ആത്മാവിനേയും ഒരേ രീതിയില് സ്വാധീനിക്കുന്നു എന്നതാണ് സത്യമെന്നും അദ്ദേഹം പറഞ്ഞു. ഇന്ന്് വൈകിട്ട് അഞ്ചിന് വായനയും സമൂഹവും എന്ന വിഷയത്തില് ഡോ. സി.വി. രാജന്പിള്ള പ്രഭാഷണം നടത്തും.
