കെ.പി.മോഹനന്റെ തോല്‍വിക്കു പിന്നില്‍ മുസ്ലീം മതസംഘടനകള്‍

പാനൂര്‍: കെ.പി.മോഹനന്റെ തോല്‍വിക്കു പിന്നില്‍ മുസ്ലീം മതസംഘടനകള്‍. 15 വര്‍ഷം മണ്ഡലത്തിലെ ജനപ്രതിനിധിയായിരുന്ന കെ.പി.മോഹനന്റെ കനത്തതോല്‍വിക്കു കാരണം ചില മതസംഘടനകള്‍ എല്‍ഡിഎഫിനൊപ്പം ചേര്‍ന്നതാണെന്ന്് വ്യക്തം. എപി വിഭാഗം നേതാവ് അഷറ്ഫ് സഖാഫി നേരിട്ടാണ് മണ്ഡലത്തില്‍ പ്രചരണ പ്രവര്‍ത്തനം നടത്തിയത്. വീടുകളില്‍ ബീഫും, പൊറൊട്ടയും ഒരുക്കിയാണ് സിപിഎം കുടുംബസംഗമങ്ങള്‍ സംഘടിപ്പിച്ചത്. ബിജെപി അധികാരത്തില്‍ വരുന്നതിനെ പ്രതിരോധിക്കാന്‍ ഇടതുപക്ഷത്തിനു മാത്രമെ സാധിക്കുകയുളളൂവെന്നും മാതൃഭൂമിയിലെ മുഹമ്മദ് നബിക്കെതിരെയുളള വാര്‍ത്തവരെയും തെരഞ്ഞെടുപ്പിനായി സിപിഎം ഉപയോഗിച്ചു. ഇതിലൂടെ ഒരുവിഭാഗം മതമൗലികവാദ സംഘടനകളുടെ വോട്ടു നേടാന്‍ എല്‍ഡിഎഫിനു സാധിച്ചു. പാനൂര്‍, കുന്നോത്ത്പറമ്പ്, തൃപ്പങ്ങോട്ടൂര്‍, പെരിങ്ങളം, കരിയാട് പഞ്ചായത്തുകളിലാണ് മതക്ലാസുകള്‍ തിരഞ്ഞെടുപ്പിനായി തകൃതിയായി നടന്നത്. ഇവിടങ്ങളില്‍ മൃഗീയ ഭൂരിപക്ഷമുളള യുഡിഎഫിനു വോട്ടുകള്‍ നന്നേ കുറഞ്ഞതും ശ്രദ്ധേയമാണ്. പാനൂരില്‍ 56 വോട്ട് കൂടുതല്‍ ലഭിച്ചത് കെ.കെ.ശൈലജക്കാണ്. നിലവിലെ പാനൂര്‍ നഗരസഭയുടെ ഭാഗമായ പാനൂര്‍ പഞ്ചായത്ത് യുഡിഎഫ് കാലങ്ങളായി ആധിപത്യം പുലര്‍ത്തി വരുന്ന പ്രദേശമാണ്. എലാങ്കോട്, പാനൂര്‍ടൗണ്‍, തെക്കെപാനൂര്‍, പാലത്തായി ബൂത്തുകളില്‍ നിന്നും വന്‍വോട്ടു ചോര്‍ച്ചയാണ് യുഡിഎഫിനുണ്ടായത്. നഗരസഭയിലെ പെരിങ്ങളം, കരിയാട് ഭാഗത്ത് നേരിയ ലീഡ് മാത്രമാണ് യുഡിഎഫിനുണ്ടായത്. ഇവിടെ 7000ത്തിനു മുകളില്‍ ലീഡ് പ്രതീക്ഷിച്ചിരുന്നു യുഡിഎഫ്. കെ.പി.മോഹനന്റെ വീട് സ്ഥിതി ചെയ്യുന്ന കുന്നോത്ത്പറമ്പ് പഞ്ചായത്തില്‍ 3117 വോട്ടിന്റെ ലീഡ് മാത്രമാണ് യുഡിഎഫിനുണ്ടായത്. ഇവിടെ 8000 ലീഡാണ് നേതൃത്വം കണക്കു കൂട്ടിയത്. തൃപ്പങ്ങോട്ടൂരില്‍ 2331ന്റെ നേരിയ ഭൂരിപക്ഷവും ലഭിച്ചു.കൂത്തുപറമ്പ് നഗരസഭ, പാട്യം, കോട്ടയം, മൊകേരി പഞ്ചായത്തുകളില്‍ നിന്നും കെ.കെ.ശൈലജക്കു ലഭിക്കുന്ന ഭൂരിപക്ഷം പാനൂര്‍ മേഖലയില്‍ നിന്നും അട്ടിമറിക്കാമെന്ന് കണക്കുകൂട്ടിയ കെ.പി.മോഹനന് കനത്തപ്രഹരമാണ് മുസ്ലീം വിഭാഗം നല്‍കിയത്. ഭരണരംഗത്തുളളപ്പോള്‍ ആനുകൂല്യങ്ങള്‍ വാരിക്കോരി നല്‍കിയവര്‍ തന്നെ പണിപറ്റിച്ചു. 5000ത്തോളം വോട്ടു നേടുമെന്ന് വീമ്പടിച്ച എസ്ഡിപിഐ സ്ഥാനാര്‍ത്ഥി അഡ്വ:മുഹമ്മദ്ഷബീര്‍ നേടിയത് വെറും 1715 വോട്ടുകള്‍ മാത്രം. സിപിഎം നേതൃത്വവുമായി കടവത്തൂരിലെ എസ്ഡിപിഐ നേതാവ് നടത്തിയ വോട്ടുകച്ചവടവും യുഡിഎഫിനെ ബാധിച്ചു. പ്രചരണരംഗത്ത് സജീവമായിരുന്ന എസ്ഡിപിഐ അവസാന നിമിഷമാണ് കച്ചവടം ഉറപ്പിക്കുന്നത്. തൃപ്പങ്ങോട്ടൂര്‍ പഞ്ചായത്തിലെ കടവത്തൂര്‍,തൂവ്വക്കുന്ന്, പാലത്തായി ഭാഗങ്ങളില്‍ ശക്തമായ പ്രവര്‍ത്തനമുളള എസ്ഡിപിഐയ്‌ക്ക് പഞ്ചായത്തില്‍ ആകെ ലഭിച്ച വോട്ട് 133 മൊകേരിയില്‍ 227, പാനൂരില്‍ ലഭിച്ചത് 179 ഉം. വോട്ടുമറി നടന്നത് വ്യക്തമാണെന്ന് പ്രവര്‍ത്തകര്‍ പറയുന്നു.ഇതിനു പുറമെ ലീഗ് വിമതനായ വി.ഹാരിസ് വീടുകയറി കെ.കെ.ശൈലജക്ക് വോട്ടു തേടിയിറങ്ങുകയും ചെയ്തു. ഇങ്ങിനെ ഒരു വിഭാഗത്തിന്റെ അണിയറ നീക്കത്തില്‍ പരാജയത്തിന്റെ രുചി ആദ്യമായി അറിഞ്ഞു കെ.പി.മോഹനന്‍. അവസരത്തിലും അനവസരത്തിലും പ്രീണനം നടത്തി സുഖിപ്പിച്ചവര്‍ കൊടുത്തത് എട്ടിന്റെപണിയായി മാറി.