പാനൂര്: കെപി.മോഹനന്റെ തോല്വി. അവസാനിക്കുന്നത് സോഷ്യലിസ്റ്റ് നേതാവും മുന്മന്ത്രിയുമായ പിആര്.കുറുപ്പിന്റെ രാഷ്ട്രീയം. സോഷ്യലിസത്തിന്റെ വളക്കൂറുളള മണ്ണില് പഴയ പെരിങ്ങളം മാറി 2011ല് കൂത്തുപറമ്പ് മണ്ഡലമായി പരിണമിച്ചതോടെ എല്ഡിഎഫില് നിന്നും മറുകണ്ടം ചാടി യുഡിഎഫിനൊപ്പം ചേര്ന്ന കെപി.മോഹനന് ഇപ്പോള് നേരിട്ട പരാജയത്തിന്റെ അര്ത്ഥതലങ്ങളെറെ. പിആറിന്റെ രാഷ്ട്രീയ പാരമ്പര്യം നിലനിര്ത്താന് എന്നും ഒപ്പമുണ്ടായിരുന്ന അധികാരം ഇനി കെപി.മോഹനനു കൂട്ടില്ല. അധികാരവും ചെങ്കോലും നഷ്ടപ്പെട്ട മുന്മന്ത്രി കൂടിയായ കെപി.മോഹനനു പിന്തുണ നല്കാനുളള രാഷ്ട്രീയ പിന്ബലം ഇന്നു ഇവിടെ ജെഡിയു എന്ന രാഷ്ട്രീയ പാര്ട്ടിക്കില്ല. വിജയം സ്വന്തം കെഡ്രിറ്റാകുമ്പോള് പരാജയവും അങ്ങിനെയാവണമല്ലോ? നന്നേ ക്ഷയിച്ചു വന്ന ജെഡിയു ഇതുവരെ നിലനിന്നത് കെപി.മോഹനന്റെ അധികാരത്തണലില് മാത്രമായിരുന്നു. ആ യുഗം അവസാനിച്ചതോടെ പഴയ സോഷ്യലിസ്റ്റ് മുഖമായ ജെഡിയുവും ഇനി ചരിത്രമാകും. പതിറ്റാണ്ടുകളായി പിആര് കുറുപ്പ് എംഎല്എയും പിന്നീട് മന്ത്രിയുമായി അരങ്ങുവാണ മണ്ഡലം 15 വര്ഷം കെപി.മോഹനനും ഭരിച്ചു. രണ്ടു തവണ എല്ഡിഎഫിനൊപ്പവും,ഒരു തവണ യുഡിഎഫിനൊപ്പവും.ഇത്തവണ തോല്ക്കുകയും ചെയ്തു. ഇനിയെന്ത്? നഷ്ടപ്രതാപം വീണ്ടെടുക്കാന് കൂത്തുപറമ്പില് അനുദിനം ശിഥിലമായി കൊണ്ടിരിക്കുന്ന യുഡിഎഫില് നിന്നുകൊണ്ട് സാധിക്കുമോ? പരാജയത്തിനു കാരണമായി വിലയിരുത്തുന്നതു തന്നെ യുഡിഎഫിലെ അനൈക്യമാണ്. കോണ്ഗ്രസിലെ പ്രമുഖരായ രണ്ടുനേതാക്കള് ഈ മണ്ഡലത്തില് പ്രചരണത്തിനു പോലും നില്ക്കാതെ ഉദുമയില് കെ.സുധാകരനു വേണ്ടി പ്രവര്ത്തിക്കാന് പോകുകയായിരുന്നു.മുസ്ലീംലീഗിലെ ഒരുവിഭാഗം കെപി.മോഹനനെതിരെ വോട്ടുമറിച്ചതായും ആരോപണമുയര്ന്നു കഴിഞ്ഞിട്ടുണ്ട്. ലീഗിലെ ഗ്രൂപ്പു വഴക്കും പരാജയത്തില് നിര്ണ്ണായകമായി. ഖദര്ധരിച്ച് എയര്കണ്ടീഷന് റൂമിലിരുന്ന് വിയര്പ്പൊഴുക്കാതെ ജയിക്കാമെന്ന ചില നേതാക്കളുടെ ധാരണയും ഇതോടെ അസ്തമിച്ചു. ഒപ്പം പിആറിലൂടെ കൈമാറി കെപി.മോഹനനില് എത്തി നില്ക്കുന്ന കുടുംബാധിപത്യ രാഷ്ട്രീയവും.
കെപി.മോഹനന്റെ തോല്വി; അവസാനിക്കുന്നത് പിആര്.കുറുപ്പിന്റെ രാഷ്ട്രീയം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.