മാതൃകാ പോളിംഗ് സ്റ്റേഷനുകളിലടക്കം വോട്ടിംഗ് പൂര്‍ത്തിയാകാന്‍ വൈകി

നടുവണ്ണൂര്‍: നടുവണ്ണൂര്‍ ഗവ. ഹയര്‍സെക്കന്ററിസ്‌കൂളിലെ മാതൃകാ പോളിംഗ് സ്റ്റേഷനില്‍ വോട്ടെടുപ്പ് വൈകിയതായി പരാതി. ഇന്നലെ വൈകീട്ട് 5 മണിയായിട്ടും. 3,4 ബൂത്തുകളില്‍ സ്ത്രീകളടക്കമുള്ള വോട്ടര്‍മാരുടെ വന്‍ നിര കാണാമായിരുന്നു. വോട്ടെടുപ്പ് സമയം കഴിഞ്ഞും ക്യൂവിലുണ്ടായിരുന്ന 285 വോട്ടര്‍മാര്‍ക്ക് സ്ലിപ് നല്‍കിയാണ് വോട്ടെടുപ്പ് പൂര്‍ത്തിയാക്കിയത്. രാത്രി 7.45 നാണ് ഇവിടെ പോളിംഗ് അവസാനിച്ചത്. ഇതേസ്‌കൂളിലെ 2, 2എ ബൂത്തുകളില്‍ വോട്ടെടുപ്പ് സാധാരണനിലയിലായിരുന്നു, 3,4 ബൂത്തുകളില്‍ ഏതാണ്ട് 1700 വീതം വോട്ടര്‍മാരുണ്ടായിരുന്നു. വൈകീട്ട് 5 മണിയാകുമ്പോഴും ബൂത്ത് നമ്പര്‍ 4 ല്‍ 55 ശതമാനം പേര്‍ മാത്രമാണ് വോട്ട് ചെയ്തത്. 3-ാം നമ്പര്‍ ബൂത്തില്‍ 72 ശതമാനം പേര്‍ വോട്ടു ചെയ്തിരുന്നു. തിരിച്ചറിയല്‍ രേഖകള്‍ പരിശോധിക്കുന്നത് സംബന്ധിച്ച് പോളംഗ് ഓഫീസര്‍ കൈക്കൊണ്ട കര്‍ശന രീതികളാണ് വോട്ടെടുപ്പ് വൈകിച്ചതെന്ന് വോട്ടര്‍മാര്‍ പറഞ്ഞു. പലരും വോട്ടു ചെയ്യാതെ മടങ്ങിയതായും പരാതിയുണ്ട്. മാതൃകാ പോളിംഗ് സ്റ്റേഷനില്‍ വോട്ടര്‍മാര്‍ക്കുള്ള കുടിവെള്ളം പ്രാഥമിക കര്‍മ്മങ്ങള്‍ക്കുള്ള സൗകര്യം അമ്മമാര്‍ക്കുള്ള മുലയൂട്ടല്‍ കേന്ദ്രം എന്നിവ സജ്ജീകരിച്ചിരുന്നു. എന്നാല്‍ മാതൃകാപോളിംഗ് സ്റ്റേഷനിലെ വോട്ടെടുപ്പ് വൈകിയത് വോട്ടര്‍മാരെ ബുദ്ധിമുട്ടിലാക്കി.

അതിനിടെ പന്നിക്കോട് എ യു പി സ്‌കൂളില്‍ 128 നമ്പര്‍ ബൂത്തില്‍ പോളിംഗ് ഉദ്യോഗസ്ഥരുടെ മെല്ലെ പോക്കു കാരണം വോട്ടെടുപ്പ് ഏറെ വൈകി. സ്ത്രീകള്‍ അടക്കമുളള വോട്ടര്‍മാര്‍ വോട്ട് ചെയ്യാതെ തിരിച്ചു പോയ അവസ്ഥ വരെയുണ്ടായി. ചിലര്‍ രണ്ടും മൂന്നും തവണ കാത്തിരുന്നു തിരിച്ചുപോവുകയായിരുന്നു. വേട്ടെടുപ്പിന്റെ അവസാന സമയമായ ആറ് മണി കഴിഞ്ഞിട്ടും തിരുവമ്പാടി മണ്ഡലത്തിലെ പല ബൂത്തു കളിലും വോട്ടര്‍മാരുടെ നീണ്ട വരിയായിരുന്നു.മുക്കം മുന്‍സിപാലിറ്റിയിലെ മുത്താലത്ത് എ.എല്‍.പി.സ്‌കൂളിലെ രണ്ട് ബൂത്തുകളിലും നീണ്ട വരി കാണപ്പെട്ടു

ബാലുശ്ശേരി നിയോജകമണ്ഡലത്തിലെ കോട്ടൂര്‍ പഞ്ചായത്തിലെ 24-ാം ബൂത്തായ വാകയാട് ജിഎല്‍പി സ്‌കൂളില്‍ രാത്രി വൈകീട്ടാണ് വോട്ടിംഗ് അവസാനിച്ചത്. രാത്രി 8.30 വരെ 250 ഓളം പേര്‍ ഇവിടെ ക്യൂവിലാണ്. ആയിരത്തി അഞ്ഞൂറോളം വോട്ടര്‍മാരുള്ള ഇവിടെ പതുക്കെയാണ് വോട്ടിംഗ് നടന്നതെന്ന് ആരോപണമുയര്‍ന്നിട്ടുണ്ട്.

മുക്കം: മത്സരാവേശം ആദ്യം മുതലേ മുന്നിട്ടു നിന്ന തിരുവമ്പാടി നിയോജക മണ്ഡലത്തിലെ ചില ബൂത്തുകളില്‍ പോളിംഗ് അവസാനിക്കുന്ന ആറു മണിക്കു ശേഷവും നീണ്ട ക്യൂ ഉണ്ടായിരുന്നു. തോട്ടുമുക്കത്തെ 124-ാം നമ്പര്‍ ബൂത്തിലും മണാശ്ശേരി ഗവ: യു. പി. സ്‌ക്കൂളിലെ 96-ാം നമ്പര്‍ ബൂത്തിലും സന്ധ്യയാകു വരെ പോളിംഗ് നീണ്ടു. ആറു മണിയായപ്പോള്‍ നൂറി ലധികം പേര്‍ ക്യുവിലുണ്ടായിരുന്നു .അവര്‍ക്ക് പ്രിസൈഡിംഗ് ഓഫീസര്‍ ടോക്കണ്‍ നല്‍കി മുഴുവന്‍ പേര്‍ക്കും വോട്ട് രേഖപ്പെടുത്താന്‍ അവസരം നല്‍കി.

കൊയിലാണ്ടി പെരുവട്ടൂര്‍ യുപിസ്‌കൂളില്‍ സ്ത്രീ വോട്ടര്‍മാരുടെ നീണ്ട ക്യൂ