മട്ടന്നൂര്‍: രാഷ്‌ട്രീയ പാര്‍ട്ടികളുടെ പേരില്‍ തമ്മില്‍ത്തല്ലും വാക്കേറ്റവും നടക്കുന്ന ബൂത്തുകള്‍ക്ക് മാതൃകയാവുകയാണ് മട്ടന്നൂര്‍ നിയമസഭാ മണ്ഡലത്തിലെ കല്ലൂര്‍ ന്യൂ യുപി സ്‌കൂളിലെ 43-ാം നമ്പര്‍ ബൂത്ത്. രാഷ്‌ട്രീയ പരമായ വിയോജിപ്പുകളും ശക്തമായ മത്സരങ്ങളും നടക്കുന്നുണ്ടെങ്കിലും അതൊന്നും പോളിങ് ബൂത്തിന്റെ പ്രവര്‍ത്തനത്തില്‍ പ്രതിഫലിക്കരുതെന്ന കാര്യത്തില്‍ ഇവര്‍ ഒറ്റക്കെട്ടാണ്.
സംയുക്ത രാഷ്‌ട്രീയ പാര്‍ട്ടി പ്രവര്‍ത്തകര്‍ എന്ന കൂട്ടായ്‌മ രൂപീകരിച്ച് ബൂത്തിലെത്തുന്നവര്‍ക്ക് ഉച്ചഭക്ഷണവും രാവിലെയും വൈകുന്നേരവും ചായയും പലഹാരങ്ങളും ഒരുക്കിവെച്ചാണ് ഇവര്‍ പോളിങ്ങ് ദിനത്തെ വരവേറ്റത്. മാത്രമല്ല ജനാധിപത്യ പ്രക്രിയയില്‍ പങ്കാളികളായി ബൂത്തില്‍ നിന്ന് മടങ്ങുന്നവര്‍ക്ക് ഒരോ വൃക്ഷത്തൈകളും ഇവര്‍ സമ്മാനമായി നല്‍കി. പേര, ആര്യവേപ്പ്, മാവ്, കറിവേപ്പില ചാമ്പ തുടങ്ങിയ വൃക്ഷത്തൈകളാണ് ഇവിടെ നിന്ന് നല്‍കിയത്. വോട്ട് ചെയ്യുന്നതിനുള്ള പ്രചോദനവും കാലത്തിനൊപ്പം മറഞ്ഞുപോകുന്ന നാട്ടുനന്മകളെയും പ്രകൃതി സ്‌നേഹത്തെയും കുറിച്ചുള്ള ഓര്‍മ്മപ്പെടുത്തലുമാകാന്‍ ഇത് ഉപകരിക്കുമെന്നാണ് ഇവരുടെ പ്രതീക്ഷ.
തീര്‍ന്നില്ല, ഈ മാതൃകാ ബൂത്തിലെ സവിശേഷതകള്‍ അത്യാവശ്യഘട്ടത്തില്‍ വോട്ടര്‍മാര്‍ക്ക് പ്രയോജനപ്പെടുത്തുന്നതിനായി മെഡിക്കല്‍ യൂണിറ്റും ആശാ വര്‍ക്കര്‍മാരും എമര്‍ജന്‍സി വാഹനവും ഇവിടെ ഒരുക്കിയിട്ടുണ്ട്. വോട്ട് ചെയ്യാന്‍ വരിനില്‍ക്കേണ്ട എന്നുള്ളതും ഇവിടുത്തെ പ്രത്യേകതയാണ്. ബൂത്തിലെത്തുന്ന സമ്മതിദായകര്‍ക്ക് വിപുലമായ സൗകര്യങ്ങളാണ് ഇവിടുള്ളത്. ചുവന്ന പരവതാനി വിരിച്ച സ്‌റ്റേജിലാണ് കസേരകള്‍ നിരത്തിയിരുന്നത്. ബൂത്തിലെത്തി ടോക്കന്‍ എടുത്താല്‍ വോട്ടര്‍മാര്‍ക്ക് അവിടെ വിശ്രമിക്കാം. ഊഴം വരുന്നതിനനുസരിച്ച് വോട്ട് രേഖപ്പെടുത്തുകയും ചെയ്യാം. ഊഴം കാത്തിരിക്കുന്നവര്‍ക്ക് സംയുക്ത രാഷ്‌ട്രീയ പാര്‍ട്ടി പ്രവര്‍ത്തകരുടെ വകയായി ഗോതമ്പ് പായസവും ഉണ്ടായിരുന്നു.
മറ്റ് പല ബൂത്തുകളിലേയും പോലെ ഒരുകാലത്ത് ഇതും പ്രശ്‌ന ബാധിത ബൂത്തുകളുടെ പട്ടികയിലായിരുന്നു. രാഷ്‌ട്രീയ വൈര്യം മറന്ന് സമാധാനപരമായ തെരഞ്ഞെടുപ്പ് ഉറപ്പുവരുത്തുന്നതിനായി പ്രവര്‍ത്തകര്‍ ഒന്നിച്ചതോടെയാണ് മാതൃകാപരമായ മാറ്റത്തിന് വഴിതുറന്നത്. സംസ്ഥാനത്തെ മികച്ച ബൂത്തായി കല്ലൂര്‍ ന്യൂ യുപി സ്‌കൂളിലെ ബൂത്തിനെ വളര്‍ത്തിയെടുക്കുക എന്നുള്ളതാണ് ഇപ്പോള്‍ ഇവരുടെ സ്വപ്‌നം. ഇതിനായുള്ള പ്രവര്‍ത്തനങ്ങളില്‍ നിറഞ്ഞ പങ്കാളിത്തവുമായി ബൂത്ത് ലെവല്‍ ഓഫീസറും ഇതേ സ്‌കൂളിലെ അധ്യാപകനുമായ ഇ .ഗണേഷനും തെരഞ്ഞെടുപ്പ് വിഭാഗം ഉദ്യോഗസ്ഥരും വിവിധ രാഷ്‌ട്രീയ കക്ഷികളുടെ ബൂത്ത് ഏജന്റ്മാരും ഒപ്പമുണ്ട്.
തെരഞ്ഞെടുപ്പ് പ്രക്രിയയുടെ നടത്തിപ്പില്‍ നാടിനാകെ അനുകരിക്കാവുന്ന ഒരു മാതൃകയാണ് കല്ലൂരിലെ രാഷ്‌ട്രീയ പ്രവര്‍ത്തകരും നാട്ടുകാരും കാണിച്ചു തരുന്നത്.
