അഹമ്മദാബാദ്: അരങ്ങേറ്റ ടെസ്റ്റില് സെഞ്ചുറി നേടിയ ആദ്യ ഇന്ത്യന് ടെസ്റ്റ് ക്രിക്കറ്റര് ദീപക്ക് ഷൊധന് (87) അന്തരിച്ചു. ശ്വാസകോശാര്ബുദം ബാധിച്ച് ചികിത്സയിലായിരുന്ന ഇദ്ദേഹം കഴിഞ്ഞ ദിവസം അഹമ്മദാബാദിലെ വസതിയിലാണ് അന്തരിച്ചത്. സംസ്കാരം നടത്തി.
ഇടംകൈയന് ബാറ്റ്സ്മാനും പേസറുമായിരുന്ന ദീപക്ക് ഷൊധന് ഇരുപത്തിയഞ്ചാം വയസിലാണ് ഇന്ത്യയ്ക്കായി അരങ്ങേറിയത്, 1952ല് പാക്കിസ്ഥാനെതിരെ ഈഡന് ഗാര്ഡന്സില്. ആറ് വിക്കറ്റ് നഷ്ടത്തില് 179 എന്ന നിലയില് ഇന്ത്യ പതറുമ്പോള് എട്ടാമനായി ക്രീസിലെത്തിയ ഇദ്ദേഹം 110 റണ്സ് സ്വന്തം പേരില് ചേര്ത്താണ് മടങ്ങിയത്. ദീപക്കിന്റെ പ്രകടനം ഇന്ത്യയ്ക്ക് 140 റണ്സ് ലീഡും സമ്മാനിച്ചു. മൂന്നു ടെസ്റ്റില് മാത്രമേ ഇദ്ദേഹം ഇന്ത്യന് ജഴ്സി അണിഞ്ഞുള്ളു. എന്നാല്, 43 ഫസ്റ്റ് ക്ലാസ് മത്സരങ്ങളില് 1,802 റണ്സും 73 വിക്കറ്റും നേടി.
