കോട്ടയം: നിയമസഭാ തെരഞ്ഞെടുപ്പിലെ ജനങ്ങളുടെ വിധിയെഴുത്ത് ഇന്നലെ കഴിഞ്ഞു. ഫലമറിയാന്‍ 19വരെയുള്ള രണ്ടുനാളുകള്‍ കാത്തിരിക്കണം. രണ്ട് നാളുകള്‍ കൂട്ടിക്കിഴിക്കലുകളുടെ ദിനങ്ങളാണ്. ജനം ആരെ വരിക്കുമെന്നതാണ് ഇനിയുള്ള ചിന്തകള്‍. ഇടതുപക്ഷവും വലതുപക്ഷവും എന്‍ഡിഎ മുന്നണിയും അവകാശ വാദങ്ങളുമായി രംഗത്തുണ്ട്.
പോളിംഗ് ശതമാനം ഉയര്‍ന്നതിന്റെ ഗുണം തങ്ങള്‍ക്ക് അനുകൂലമാണെന്ന് ഒരോ മുന്നണികളും വാദിക്കുന്നു. കൂട്ടലും കിഴിക്കലും ആരംഭിച്ചെങ്കിലും ജില്ലയിലെ ചില രാഷ്‌ട്രീയ സംഭവവികാസങ്ങള്‍ ഇതിന് തടസ്സമാകുന്നുണ്ട്. ജില്ലയില്‍ ശക്തമായ പ്രവര്‍ത്തനം കാഴ്ചവച്ച എന്‍ഡിഎയുടെ പ്രകടനമാണ് കൃത്യമായ നിര്‍ണ്ണയിത്തിലെത്താന്‍ തടസ്സമാകുന്ന ഒരു ഘടകം. ഈഴവ വോട്ടുകളുടെ അടിയൊഴുക്കില്‍ നഷ്ടം ആര്‍ക്കെന്നതും പ്രശ്‌നമാണ്. കേരള കോണ്‍ഗ്രസ്സ് പിളര്‍ന്ന് രൂപംകൊണ്ട ജനാധിപത്യ കേരള കോണ്‍ഗ്രസ്സിന്റെ ശക്തി എത്രയെന്നതും ഫലത്തെ ബാധിച്ചേക്കാം. തെരഞ്ഞെടുപ്പ് കഴിഞ്ഞാല്‍ അന്ന് രാത്രിയിലും പിറ്റേന്ന് പകലുമായി തങ്ങള്‍ക്ക് ലഭിക്കുന്ന വോട്ടുകള്‍ കണക്കുകൂട്ടുന്ന പതിവ് സിപിഎം അടക്കമുള്ള സംഘടനകള്‍ക്ക് ഉണ്ടായിരുന്നു. ഈ പ്രവചനം പലപ്പോഴും ഫലപ്രഖ്യാപനത്തോട് അടുത്തു നില്‍ക്കാറുമുണ്ട്. എന്നാല്‍ ഇത്തവണ ഇത്തരത്തില്‍ കണക്ക് കൂട്ടാന്‍ സാധിക്കുന്നില്ലെന്ന് ഇരു മുന്നണികളും തുറന്ന് സമ്മതിക്കുന്നു. കാരണം എന്തെന്നാല്‍ ഈ തെരഞ്ഞെടുപ്പില്‍ ഇടത് വലത് മുന്നണികള്‍ക്ക് വെല്ലുവിളി ഉയര്‍ത്തിയ മൂന്നാം മുന്നണിയായ എന്‍ഡിഎ സഖ്യത്തിലെ പരിപാടികളിലും മറ്റും പങ്കെടുത്ത ജനക്കൂട്ടത്തെ കണ്ടാണ്.
എന്‍ഡിഎ സഖ്യം ആരുടെ പക്കല്‍ നിന്നാണ് വോട്ട് പിടിച്ചെന്ന ആശങ്കയിലാണ് ഇടത് വലത് മുന്നണികള്‍. പല മണ്ഡലങ്ങളിലും ബിജെപി അട്ടിമറി വിജയം നേടുമെന്നാണ് മുന്നണികളുടെ കണക്കുകള്‍ പറയുന്നത്. അതുകൊണ്ട് തന്നെ ഈ തെരഞ്ഞെടുപ്പില്‍ ബിജെപി മുന്നേറ്റം നടത്തുമെന്നും തങ്ങളുടെ വോട്ടില്‍ കുറവു വരുമെന്നും ഇടതു വലതു മുന്നണികള്‍ സമ്മതിക്കുന്നു. ജില്ലയിലെ ഗ്രാമ പ്രദേശങ്ങളിലും നഗര പ്രദേശങ്ങളിലും തദ്ദേശ തെരഞ്ഞെടുപ്പില്‍ ബിജെപി പ്രതീക്ഷിക്കാത്ത തരത്തില്‍ സ്വാധീനമുറപ്പിച്ചത് ഇരു മൂന്നണികളും ഭയപ്പാടൊയാണ് കാണുന്നത്.
എല്ലാ രാഷ്‌ട്രീയ പാര്‍ട്ടികളും തങ്ങളുടെ വിജയം ആഘോഷിക്കാനുള്ള ഒരുക്കള്‍ ആരംഭിച്ചു. ബിജെപി തെരഞ്ഞെടുപ്പിനെ നേരിട്ടത് കോണ്‍ഗ്രസിന്റെയും കമ്മ്യൂണിസ്റ്റ് പാര്‍ട്ടികളുടെയും കോട്ടകളില്‍ വിള്ളല്‍ ഉണ്ടാക്കും വിധത്തിലാണ്. ഇത് ഇരു മുന്നണികളെയും പരുങ്ങലിലാക്കി. മുതിര്‍ന്ന പാര്‍ട്ടി നേതാക്കള്‍ മത്സരിച്ച മണ്ഡലങ്ങളില്‍ പോലൂം ജയം അവകാശപ്പെടാന്‍ മുന്നണികള്‍ക്ക് സാധിക്കാത്ത അവസ്ഥയാണ് നിലവിലുള്ളത്. ബിജെപിയിലെ പ്രബലരായ നേതാക്കള്‍, ബിഡിജെഎസിലെ സമുദായ നേതാക്കള്‍, എന്നിങ്ങനെയുള്ളവരാണ് എന്‍ഡിഎ ടിക്കറ്റ്‌നല്‍കി മത്സരിച്ചത്. അതേ സമയം അര്‍ഹതയുള്ളവരെ തഴഞ്ഞായിരുന്നു ഇടതുവലതു മുന്നണികള്‍ സ്ഥാനാര്‍ത്ഥികളെ പ്രഖ്യാപിച്ചതെന്നും ആരോപണമുണ്ട്. ഇത് ബിജെപിക്ക് മുന്‍തൂക്കം ലഭിക്കാന്‍ കാരണമായതായി രാഷ്‌ട്രീയ നിരീക്ഷകര്‍ വിലയിരുത്തുന്നു.
കമ്മ്യൂണിസ്റ്റിനും കോണ്‍ഗ്രസിനും മാത്രം പരിചയമുള്ള ജില്ലയിലെ പല പ്രദേശങ്ങളിലും ഇക്കുറി ബിജെപി കടന്ന് ചെന്നു പ്രവര്‍ത്തനം നടത്തിയത് ശ്രദ്ധേയമായ ഒരു കാര്യമാണ്. ഫലപ്രഖ്യാപനം ആശങ്കയോടെ ഇടതുവലതു മുന്നണികള്‍ നോക്കികാണുമ്പോള്‍, തികഞ്ഞ ആത്മവിശ്വാസത്തോടെ ഫലപ്രഖ്യാപനം ആഘോഷമാക്കാന്‍ ബിജെപി ക്യാമ്പുകള്‍ ഒരുങ്ങിക്കഴിഞ്ഞു.
