മാഡ്രിഡ്: ജയിച്ചാല് കിരീടമുറപ്പായിരുന്ന കളിയില് തോറ്റ് ചാമ്പ്യന്പട്ടം അടിയറവച്ച തെറ്റ് ഇത്തവണ ബാഴ്സലോണ ആവര്ത്തിച്ചില്ല. അവസാന മത്സരത്തില് ഗ്രനഡയെ മടക്കമില്ലാത്ത മൂന്നു ഗോളിനു തുരത്തി കറ്റാലന്മാര് സ്പാനിഷ് ലീഗ് കിരീടം നിലനിര്ത്തി. ലൂയി സുവാരസിന്റെ ഹാട്രിക് മികവില് ബാഴ്സയുടെ 24ാം കീരീടം. 38 കളികളില് 91 പോയിന്റുണ്ട് കറ്റാലന്മാര്ക്ക്. അവസാന കളിയില് ഡിപോര്ട്ടീവോ ല കൊരുണയെ മടക്കമില്ലാത്ത രണ്ടു ഗോളിനു കീഴടക്കി റയല് മാഡ്രിഡ് 90 പോയിന്റോടെ രണ്ടാമത്.
ലൂയി സുവാരസിന്റെ തകര്പ്പന് പ്രകടനം സംശയമേതുമില്ലാതെ ബാഴ്സയെ ജയത്തിലേക്കും കിരീടത്തിലേക്കും നയിച്ചു 22, 38, 86 മിനിറ്റുകളില് സുവാരസ് സ്കോര് ചെയ്തു. 40 ഗോളുകളോടെ ലീഗിലെ ടോപ് സ്കോറര് പട്ടവും സുവാരസിന് സ്വന്തം. 35 ഗോള് നേടിയ ക്രിസ്റ്റ്യാനോ റൊണാള്ഡൊ രണ്ടാമത്. കഴിഞ്ഞ എട്ടു വര്ഷത്തിനിടെ ക്രിസ്റ്റ്യാനൊയും മെസിയും മാത്രം സ്വന്തമാക്കിയ നേട്ടത്തിലേക്കാണ് ഉറുഗ്വെ താരം തന്റെ പേരു കൂടി എഴുതിച്ചേര്ത്തത്.
ബാഴ്സ തോറ്റാല് മാത്രം സാധ്യതയുണ്ടായിരുന്ന റയല് മാഡ്രിഡും അവസാന മത്സരം അവിസ്മരണീയമാക്കി. ക്രിസ്റ്റ്യാനോ റൊണാള്ഡൊയുടെ ഇരട്ട ഗോളുകളാണ് റയലിന് ജയം സമ്മാനിച്ചത്. ഏഴ്, 25 മിനിറ്റുകളില് പോര്ച്ചുഗല് താരം ലക്ഷ്യം കണ്ടു. ലീഗിന്റെ അവസാന ഘട്ടത്തിലെ തകര്പ്പന് പ്രകടനമാണ് റയലിനെ രണ്ടാമതെത്തിച്ചത്. സിനദിന് സിദാന് പരിശീലകനായി ചുമതലയേറ്റ ശേഷമാണ് റയല് വിജയവഴിയില് തിരിച്ചെത്തിയത്. ഇനി ചാമ്പ്യന്സ് ലീഗ് കിരീടം റയലിനു മുന്നില്. നഗരവൈരികളായ അത്ലറ്റികോ മാഡ്രിഡ് എതിരാളികള്.
