തിരുവനന്തപുരം: ഗെയില് ഇന്ത്യന് സ്പീഡ് സ്റ്റാര് നാഷണല് ഫൈനല്സില്, ഉഷ സ്കൂളിലെ ജിസ്നാ മാത്യു, അണ്ടര് 17 വിഭാഗത്തില് 100 മീറ്ററില് വിജയിയായി. 2020-2024 ഒളിമ്പിക്സില് മെഡല് ലക്ഷ്യമിടുന്ന നാലുവര്ഷത്തെ ലോകോത്തര പരിശീലന ക്യാമ്പിലേക്ക് ജിസ്ന തെരഞ്ഞെടുക്കപ്പെട്ടു.
അണ്ടര് 14 വിഭാഗം 200 മീറ്ററില് മഹാരാഷ്ട്രയുടെതായി ബാഹ്മാനെ, ഒഡീഷയുടെ സുഖി ബാസ്കെ, ന്യൂദല്ഹിയുടെ സിന്ധ്യ ഫ്രാന്സീസ്, ന്യൂദല്ഹിയുടെ തന്നെ നെഹാല് എസ് എന്നിവരും, ഇതേ വിഭാഗത്തില് 100 മീറ്ററില് ഒഡീഷയുടെ സുഖി ബാസ്കെ, ന്യൂദല്ഹിയുടെ നിസാര് അഹമ്മദ്, മഹാരാഷ്ട്രയുടെ സനികാ നാതെ എന്നിവരും മികച്ച സമയം കണ്ടെത്തി, ഒളിമ്പിക്സ് പരിശീലന കളരിയിലേക്ക് യോഗ്യത നേടി.
അണ്ടര് 17 വിഭാഗം 200 മീറ്ററില് ന്യൂദല്ഹിയുടെ അക്ഷയ് നയിന്, മഹാരാഷ്ട്രയുടെ മരിയ കറാച്ചിവാല എന്നിവരാണ് കേരളത്തിന്റെ ജിസ്നാ മാത്യുവിനൊപ്പം മികച്ച സമയം കണ്ടെത്തിയവര്.
രാജ്യത്തെ 10 സംസ്ഥാനങ്ങളിലെ 55 ജില്ലകളില് നടന്ന പ്രാഥമിക ട്രയല്സില് അരലക്ഷത്തോളം കുട്ടികളാണ് പങ്കെടുത്തത്. അവരില്നിന്നും തെരഞ്ഞെടുക്കപ്പെട്ട 899 അത്ലറ്റുകളാണ് സംസ്ഥാനതല ക്യാമ്പില് മാറ്റുരച്ചത്. 11-17 പ്രായപരിധിയില്പ്പെട്ട കുട്ടികളായിരുന്നു മത്സരാര്ത്ഥികള്. ന്യൂദല്ഹി ജവഹര്ലാല് നെഹ്റു സ്റ്റേഡിയത്തില് നടന്ന ദേശീയ ഫൈനലില് കേരളത്തില് നിന്ന് ജിസ്ന ഉള്പ്പെടെ എട്ടുപേരാണ് പങ്കെടുത്തത്.
കേന്ദ്ര എണ്ണ പ്രകൃതിവാതക സഹമന്ത്രി ധര്മ്മേന്ദ്ര പ്രഥാന്, മീനാക്ഷി ലേഖി എംപി, ഗെയില് ഇന്ത്യ ചെയര്മാന് ബി.സി. ത്രിപാഠി എന്നിവര് പങ്കെടുത്തു. പി.ടി. ഉഷ, രജിത മിസ്ട്രി, അനുരാധ ബിസ്വാള്, കവിത റാവത്ത്, ഗെയില് ഇന്ത്യന് സ്പീഡ് സ്റ്റാര് ബ്രാന്ഡ് അംബാസഡര് ദ്യുതിചന്ദ് എന്നിവരായിരുന്നു ദേശീയ സെലക്ഷന് കമ്മറ്റി അംഗങ്ങള്. വിജയികള്ക്ക് വിദേശത്തും സ്വദേശത്തും വിദഗ്ദ്ധ പരിശീലകരുടെ കീഴില് പരിശീലനം നല്കും. ആവശ്യമെങ്കില് താരങ്ങളുടെ വിദ്യാഭ്യാസ ചുമതലയും ഗെയ്ല് ഏറ്റെടുക്കും.
