ന്യൂദല്ഹി: റിയോ ഒളിമ്പിക്സ് മുന്നില്ക്കണ്ട് രൂപം കൊടുത്ത ടാര്ജറ്റ് ഒളിമ്പിക് ഓഡിയം പദ്ധതി നടത്തിപ്പിലേക്ക് ദേശീയ കായിക വികസനനിധിയില് നിന്ന് 5 കോടി രൂപ ഗ്രാന്റായി സ്പോര്ട്സ് അതോറിറ്റി ഓഫ് ഇന്ത്യയ്ക്ക് കേന്ദ്ര യുവജനക്ഷേമ സ്പോര്ട്ട്സ് മന്ത്രാലയം അനുവദിച്ചു. നേരത്തെ അനുവദിച്ച 4.39 കോടി രൂപ വിനിയോഗിച്ച സാഹചര്യത്തിലാണിത്.
റിയോ ഒളിമ്പിക്സ് അടുത്തെത്തിയ സാഹചര്യത്തില് സാമ്പത്തിക ആവശ്യങ്ങള് നേരിടുന്ന കായികതാരങ്ങള്ക്ക് മുന്കൂര് സര്ട്ടിഫിക്കറ്റ് നിര്ബ്ബന്ധിക്കാതെ തന്നെ ഔട്ട് ഓഫ് പോക്കറ്റ് അലവന്സ് അനുവദിക്കാന് കേന്ദ്ര യുവജനകാര്യ സ്പോര്ട്ട്സ് മന്ത്രാലയം തീരുമാനിച്ചു.
ഈ അലവന്സ് ലഭിക്കാനുള്ള തങ്ങളുടെ യോഗ്യത സംബന്ധിച്ച് സ്വയം സാക്ഷ്യപ്പെടുത്തിയ ഒരു സര്ട്ടിഫിക്കറ്റ് കായികതാരങ്ങള് പിന്നീട് സമര്പ്പിച്ചാല് മതിയാകും. ഏതെങ്കിലും കാരണവശാല് സര്ട്ടിഫിക്കറ്റ് സമര്പ്പിക്കാന് സാധിക്കാതെ വരികയോ ഇരട്ടി അലവന്സ് വാങ്ങിയതായി ശ്രദ്ധയില്പ്പെടുകയോ ചെയ്താല് നല്കിയ തുക അവസാന തീര്പ്പാക്കലില് അഡ്ജസ്റ്റ് ചെയ്യും.
