വിശാഖപട്ടണം: ഐപിഎല്ലില് സണ്റൈസേഴ്സ് ഹൈദരാബാദിന് ആറാം ജയം. മുംബൈ ഇന്ത്യന്സിനെ 85 റണ്സിനു തകര്ത്ത് പോയിന്റ് പട്ടികയില് മുകളിലേക്കു കയറി സണ്റൈസേഴ്സ്. ഒമ്പത് കളികളില് 12 പോയിന്റായി ഹൈദരാബാദിന്. സ്കോര്: സണ്റൈസേഴ്സ് ഹൈദരാബാദ് – 177/3 (20), മുംബൈ ഇന്ത്യന്സ് – 92 (16.3/20).
ടോസ് നഷ്ടപ്പെട്ട് ബാറ്റിങ്ങിനിറങ്ങേണ്ടിവന്ന സണ്റൈസേഴ്സ് ഓപ്പണര് ശിഖര് ധവാന്റെ കരുത്തിലാണ് 177 റണ്സ് അടിച്ചെടുത്തത്. 57 പന്തില് 10 ഫോറും ഒരു സിക്സറും സഹിതം പുറത്താകാതെ 82 റണ്സെടുത്തു ധവാന്.
നായകന് ഡേവിഡ് വാര്ണര് (48), യുവരാജ് സിങ് (39) എന്നിവരും പിന്തുണ നല്കി. ഹര്ഭജന് സിങ് രണ്ടു വിക്കറ്റുമായി മുംബൈ ബൗളര്മാരില് മുന്നില്. മിച്ചല് മക്ലെന്ഘന് ഒരു വിക്കറ്റ്.
മൂന്നോവറില് 15 റണ്സ് വഴങ്ങി മൂന്നു വിക്കറ്റെടുത്ത ആശിഷ് നെഹ്റയുടെയും മുന്നോവറില് 16 റണ്സ് വഴങ്ങി മൂന്ന് ഇരകളെ കണ്ടെത്തിയ മുസ്തഫിസുര് റഹ്മാന്റെയും ബൗളിങ് പ്രകടനങ്ങളാണ് സണ്റൈസേഴ്സിന് മികച്ച ജയമൊരുക്കിയത്.
നെഹ്റ മുന്നിരയെ മടക്കിയപ്പോള്, മുസ്തഫിസുര് വാലറ്റത്തെയും കൂടാരം കയറ്റി. രണ്ടു വിക്കറ്റുമായി ബരീന്ദര് സ്രാനും, ഓരോ വിക്കറ്റുമായി ഭുവനേശ്വര് കുമാറും മോയ്സസ് ഹെന്റി ഖസും ഇവര്ക്ക് പിന്തുണ നല്കി. 21 റണ്സുമായി പുറത്താകാതെ നിന്ന ഹര്ഭജന് സിങ്ങാണ് മുംബൈയുടെ ടോപ് സ്കോറര്. ക്രുനാല് പാണ്ഡ്യ (17), കീറോണ് പൊള്ളാര്ഡ് (11) എന്നിവരും രണ്ടക്കം കണ്ടു. ആശിഷ് നെഹ്റയാണ് കളിയിലെ താരം.
