കണ്ണൂര്: ആസന്നമായ നിയസഭാ തെരഞ്ഞെടുപ്പില് ബിജെപി സ്ഥാനാര്ത്ഥികള്ക്ക് പൂര്ണ്ണപിന്തുണ നല്കി വിജയിപ്പിക്കുന്നതിന് പ്രസിഡണ്ട് കെ.രംഗനാഥിന്റെ അധ്യക്ഷതയില് കൂടിയ അഖിലേന്ത്യാ ചക്കാല സമുദായ സംഘം ദേശീയ സമിതിയോഗം തീരുമാനിച്ചു.
കേരളത്തിലും തമിഴ്നാട്ടിലും മാറിമാറി വരുന്ന സര്ക്കാരുകള് ചക്കാല സമുദായത്തെ അവഗണിക്കുകയാണ് ചെയ്തിട്ടുള്ളത്. എണ്ണയാട്ടുകുലത്തൊഴിലാക്കിയ ചക്കാല സമുദായത്തിന് സ്കൂളുകളോ കോളേജുകളോ അനുവദിച്ചിട്ടില്ല. നാളികേര വികസന കോര്പ്പറേഷന്, കേരഫെഡ് എന്നീ സ്ഥാപനങ്ങളില് സമുദായത്തില്പെട്ട് ഒരാളെപ്പോലും ഭരണ സമിതിയിലോ ഉദ്യോഗങ്ങളിലോ എടുത്തിട്ടില്ല.
കേരളം, തമിഴ്നാട്, പോണ്ടിച്ചേരി എന്നീ സംസ്ഥാനങ്ങളിലായി 30ലക്ഷത്തോളം വരുന്ന ചക്കാല സമുദായത്തെ ഇടത്-വലത് മുന്നണികളും ഡിഎംകെ അണ്ണാ ഡിഎംകെ മുന്നണികളും ആവശ്യത്തിന് ഉപയോഗിക്കുക എന്ന തന്ത്രമാണ് നാളിതുവരെ സ്വീകരിച്ചിട്ടുള്ളത്.
മലയാള ഭാഷയുടെ പിതാവായ തുഞ്ചത്തെഴുത്തച്ഛന്റെ പ്രതിമ സ്ഥാപിക്കുവാനോ ഒരു നിത്യ സ്മാരകം തലസ്ഥാന നഗരിയില് സ്ഥാപിക്കാനോ കേരളത്തിലെ ഇടത്-വലതു മുന്നണികള്ക്ക് സാധിച്ചിട്ടില്ല. സമുദായത്തിന്റെ ആവശ്യങ്ങള്ക്കുവേണ്ടി കഴിഞ്ഞ 25 വര്ഷക്കാലമായി നിരന്തരം മാറിമാറി വരുന്ന സര്ക്കാരുകളില് സമ്മര്ദ്ദം ചെലുത്തിയിട്ടുള്ളതാണ്. പരമ്പരാഗത എണ്ണയാട്ടു തൊഴിലാളികളായ ചക്കാല സമുദായത്തിന്റെ തൊഴില് സംരക്ഷിക്കുന്നതിന്വേണ്ട പദ്ധതികള് നടപ്പിലാക്കുമെന്ന് കേരളത്തില് ആദ്യമായി പ്രകടന പത്രികയില് ഉള്പ്പെടുത്തിയിട്ടുള്ളത് ബിജെപി മാത്രമാണ്.
മൂന്ന് സംസ്ഥാനങ്ങളിലെയും മുഴുവന് സമുദായാംഗങ്ങളിലും ബിജെപിക്കും അവരുടെ ഘടക കക്ഷികള്ക്കും പിന്തുണ നല്കി വിജയിപ്പിക്കുന്നതിന് അഭ്യര്ത്ഥിക്കുന്നതിനും ദേശീയ സമിതിയോഗം തീരുമാനിച്ചു. യോഗത്തില് ഭാരവാഹികളായ കെ.വിക്രമന്, കെ.വേലപ്പന്, കെ.സുകുമാരന് (തമിഴ്നാട്), ആറ്റുകാല് മോഹന്ദാസ്, ചെങ്കവിള ഗിരീഷ്, പയന്തി സുരേഷ് (കേരളം), രാമനാഥന് (പോണ്ടിച്ചേരി) എന്നിവര് സംസാരിച്ചു.
