ബത്തേരി : വികസനം എന്ഡിഎയിലൂടെ വയനാട്ടിലെത്തുമെന്നും അതിന് ചവിട്ടുപടിയാകണം ബത്തേരി മണ്ഡലത്തിലെ എന്ഡിഎ സ്ഥാനാര്ത്ഥി സി.കെ.ജാനുവിന്റെ വിജയമെന്നും കര്ണ്ണാടക മുന് വനംവകുപ്പ് മന്ത്രി വിജയ്ശങ്കര്. ബത്തേരി നിയോജകമണ്ഡലം ദേശീയ ജനാധിപത്യസഖ്യം സ്ഥാനാര്ത്ഥി സി. കെ.ജാനുവിന്റെ തിരഞ്ഞെടുപ്പ് പരസ്യപ്രചാരണത്തിന് കല്ലൂരില് തുടക്കമിട്ടുകൊണ്ട് മുഖ്യപ്രഭാഷണം നടത്തുകയായിരുന്നു അദ്ദേഹം.
സി.കെ. ജാനു ബത്തേരിയില്നിന്നും വിജയിച്ചാല് വയനാട്ടില് വന് വികസനം കൊണ്ടുവരാന് സാധിക്കും. വനവാസി കോളനികളില് അടിസ്ഥാന സൗകര്യങ്ങള് ഏര്പ്പെടുത്തുന്നതിനും അവരുടെ വികസനത്തിനും ഉള്പ്പെടെ രാത്രിയാത്രാനിരോധനം, റെയില്വേ തുടങ്ങിയ പ്രശ്നങ്ങള്ക്ക് പരിഹാരം കാണാനും സാധിക്കുമെന്നും അദ്ദേഹം പറഞ്ഞു.
പരസ്യപ്രചരണപരിപാടി കര്ണ്ണാടകയിലെ ബിജെപി നേതാവും നിലവിലെ എംഎ ല്സിയുമായ ശ്രീനിവാസപൂജാരി ഉദ്ഘാടനം ചെയ്തു. സി.കെ.ജാനുവിന്റെ പടയോട്ടത്തിലൂടെ കേരളത്തില് എന്ഡിഎയുടെ അശ്വമേധയാഗത്തിന് തുടക്കമായതായി അദ്ദേഹം പറഞ്ഞു. മോദി പ്രധാനമന്ത്രിയായതോടെ അന്താരാഷ്ട്രതലത്തില് ഇന്ത്യയുടെ യശ്ശസ് ഉയരാന് കാരണമായതായും ശ്രീനിവാസപൂജാരി പറഞ്ഞു.
രണ്ട് മുന്നണികളും കാലകാലങ്ങളായി കേരളത്തിലെ ദളിത്-പിന്നോക്ക വിഭാഗങ്ങളെ വഞ്ചിക്കുകയാണെന്നും ഇതിന് എന്ഡിഎയെ വിജയിപ്പിച്ച് മറുപടി നല്കണമെന്നും സി.കെ. ജാനു പറഞ്ഞു.
ചടങ്ങില് നിയോജകമണ്ഡലം പ്രസിഡണ്ട് കെ.പി.മധു അധ്യക്ഷത വഹിച്ചു. സി. കെ.ജാനു, പി.സി.മോഹനന് മാസ്റ്റര്, സജി ശങ്കര്, ജെആര്എസ് നേതാവ് ബിജു കാക്കത്തോട്, ബിജെപി നേതാക്കളായ പി.ജി.ആനന്ദകുമാര്, സുരേന്ദ്രന്, തുടങ്ങിയവര് സംസാരിച്ചു. ഉദ്ഘാടനപരിപാടിക്ക് ശേഷം ചീരാല് ഭാഗത്ത് സ്ഥാനാര്ത്ഥി പര്യടനം നടത്തി.
