തിരുവനന്തപുരം: കേന്ദ്രാവിഷ്കൃത പദ്ധതിയായ ബിഎസ്യുപി പദ്ധതിപ്രകാരം തിരുവനന്തപുരം നഗരസഭയുടെ കീഴില് നിര്മ്മാണം പൂര്ത്തിയാക്കിയ കല്ലടിമുഖം പദ്ധതി പ്രദേശത്തുള്ള ‘സാക്ഷാത്ക്കാര’ത്തിലേക്ക് നഗരസഭയുടെ കൊത്തളത്ത് പ്രവര്ത്തിക്കുന്ന യാചക പുരനധിവാസ കേന്ദ്രത്തിലെ അന്തേവാസികളെ വിഷുദിനത്തില് മാറ്റി പാര്പ്പിച്ചു. ദേശീയ നഗര ഉപജീവന ദൗത്യത്തിന്റെ പാര്പ്പിട പദ്ധതിയില് ഉള്പ്പെടുത്തിക്കൊണ്ട് സാക്ഷാത്കാരത്തിന്റെ നടത്തിപ്പിന് ആവശ്യമായ മെച്ചപ്പെട്ട ഭൗതിക സാഹചര്യം നഗരസഭ ഒരുക്കിയിട്ടുണ്ട്. അന്തേവാസികള്ക്ക് അവരുടെ മാനസികോല്ലാസം വര്ദ്ധിപ്പിക്കുന്നതരത്തില് മെച്ചപ്പെട്ട അന്തരീക്ഷമാണ് ഒരുക്കിയിട്ടുള്ളത്. ഫര്ണിച്ചറുകള്, കിടക്കകള് എന്നിവ നല്ല നിലവാരം പുലര്ത്തുന്നവയാണ്.
അടിസ്ഥാന സൗകര്യങ്ങളായ വൈദ്യുതി, കുടിവെള്ളം എന്നിവ സമയബന്ധിതമായി പ്രാവര്ത്തികമാക്കിക്കൊണ്ട് അന്തേവാസികള്ക്ക് യാതൊരു ബുദ്ധിമുട്ടും ഇല്ലാത്ത തരത്തില് കേന്ദ്രം നടത്തിക്കൊണ്ടുപോകുന്നതിനുള്ള കര്മ്മപരിപാടികള് നഗരസഭാ ആസൂത്രണം ചെയ്തിട്ടുണ്ട്. പദ്ധതി പ്രദേശത്ത് ജൈവ പച്ചക്കറി കൃഷി ഊര്ജ്ജിതമായ നിലയില് പ്രാവര്ത്തികമാക്കുന്നതിന് വികസനകാര്യം കമ്മിറ്റിയും തീരുമാനിച്ചിട്ടുണ്ട്. താത്പര്യമുള്ള അന്തേവാസികള്ക്കും ഇതില് പങ്കുചേരാം. ക്ഷേമ പദ്ധതികളായ ത്വയോമിത്രം, പാലിയേറ്റീവ് കെയര് എന്നീ പദ്ധതികളും കൂട്ടിയിണക്കിക്കൊണ്ടാണ് കേന്ദ്രം പ്രവര്ത്തിപ്പിക്കുന്നത്.
പദ്ധതിയുടെ തുടര്പ്രവര്ത്തനത്തിന് സന്മനസ്സുള്ളവര്ക്ക് ഒരു സഹായ ഹസ്തം എന്നുള്ള നിലയില് നഗരസഭയുമായി കൈകോര്ക്കാം. സാക്ഷാത്കാരത്തിന്റെ നിത്യനിദാന ചെലവുകള്ക്കും അന്തേവാസികളുടെ ഭക്ഷണത്തിനുമുള്ള തുക കണ്ടെത്തുന്നതിനായി നഗരസഭ ആരംഭിച്ചിട്ടുള്ള ബാങ്ക് അക്കൗണ്ടുകളിലേക്ക് തുക സഹായധനമായി നല്കാവുന്നതാണ്. അക്കൗണ്ട് നമ്പര്: 2906101014328.
