കൊച്ചി: നിയമസഭ തിരഞ്ഞെടുപ്പുമായി ബന്ധപ്പെട്ട് പോളിംഗ് ശതമാനം വര്ധിപ്പിക്കുന്നതിനുള്ള സ്വീപ് പദ്ധതിയുടെ ഭാഗമായുള്ള വോട്ടുവണ്ടി തൃക്കാക്കര മണ്ഡലത്തിലെ വിവിധ ഭാഗങ്ങളില് പര്യടനം നടത്തി.
വികാസവാണി, വളളത്തോള് ജംക്ഷന്, തൃക്കാക്കര അമ്പലം പരിസരം, ഇടപ്പള്ളി ടോള്, അത്താണി എന്നിവിടങ്ങളിലെത്തിയ വോട്ടുവണ്ടിയില് നിരവധി പേരാണ് വോട്ട് ചെയ്ത് നോക്കാനും സംശയങ്ങള് ദുരീകരിക്കാനുമായി എത്തിയത്. ഓട്ടോ തൊഴിലാളികള്, ചുമട്ട് തൊളിലാളികള് തുടങ്ങിയവര് വോട്ടുവണ്ടിയിലെത്തി. സാധാരണക്കാരും വീട്ടമ്മമാരും ഉദ്യോഗസ്ഥരുമടക്കം നിരവധി പേരാണ് വോട്ടുവണ്ടി സന്ദര്ശിച്ച് വോട്ടിംഗ് പരിചയം നേടിയത്. തെരഞ്ഞെടുപ്പില് ആദ്യമായി ഏര്പ്പെടുത്തുന്ന വിവിപാറ്റ് സംവിധാനത്തെക്കുറിച്ച് കൂടുതല് അറിയാനും മനസിലാക്കുവാനും വോട്ടുവണ്ടിയില് സൗകര്യമുണ്ട്.
ജില്ലയിലെ എറണാകുളം, തൃക്കാക്കര മണ്ഡലങ്ങളിലാണ് പരീക്ഷണാടിസ്ഥാനത്തില് വിവിപാറ്റ് സംവിധാനം ഉപയോഗപ്പെടുത്തുന്നത്. സമ്മതിദാനാവകാശം വിനിയോഗിക്കണമെന്ന സന്ദേശം സമൂഹത്തിലെ എല്ലാ വിഭാഗം ജനങ്ങളിലേക്കും എത്തിക്കുന്നതിന്റെ ഭാഗമായാണ് വോട്ടര് ബോധവത്കരണ പ്രവര്ത്തനത്തിനായി വോട്ടുവണ്ടി പര്യടനം. ജില്ലയിലെ പോളിംഗ് 80 ശതമാനത്തിലേക്ക് എത്തിക്കുകയാണ് ലക്ഷ്യം.
വോട്ടിംഗ് യന്ത്രത്തിന്റെ പ്രവര്ത്തനം പരിചയപ്പെടുത്തുന്നതോടൊപ്പം വോട്ട് ചെയ്യാന് പരിശീലനവും നല്കുന്നുണ്ട്. ജില്ല തിരഞ്ഞെടുപ്പ് ഓഫീസും ജില്ല ഇന്ഫര്മേഷന് ഓഫീസും ചേര്ന്നാണ് പ്രചരണ പരിപാടികള് സംഘടിപ്പിക്കുന്നത്. വിവിപാറ്റ് മെഷീന്റെ പ്രവര്ത്തനം പരിചയപ്പെടാന് താല്പര്യമുള്ള എറണാകുളം, തൃക്കാക്കര മണ്ഡലങ്ങളിലുള്ളവര് ജില്ല ഇന്ഫര്മേഷന് ഓഫീസുമായി ബന്ധപ്പെട്ടാല് വോട്ടുവണ്ടി സ്ഥലത്തെത്തിക്കുന്നതാണ്. ഫോണ്: 2354208.
