സ്വന്തം ലേഖകന്
കണ്ണൂര്: കണ്ണൂര് യൂനിവേഴ്സിറ്റിയില് വിദൂരവിദ്യാഭ്യാസ വിഭാഗത്തിലെ രണ്ടായിരത്തി ഒരുനൂറോളം രണ്ടാം വര്ഷ വിദ്യാര്ത്ഥികളുടെ ഇംഗ്ലീഷ് പേപ്പര് രണ്ടാം ഭാഗത്തിന്റെ ഉത്തരക്കടലാസിന്റെ കൗണ്ടര് ഫോയില് കാണാതായ സംഭവത്തില് പ്രതിഷേധം ശക്തമാകുന്നു. എസ്എഫ്ഐ ഒഴികെ എബിവിപി, കെഎസ്യു ഉള്പ്പടെയുള്ള വിദ്യാര്ത്ഥി സംഘടനകള് ശക്തമായ പ്രതിഷേധ പരിപാടികളുമായി രംഗത്തെത്തിക്കഴിഞ്ഞു. കൗണ്ടര് ഫോയിലുകള് നഷ്ടപ്പെട്ടതുമായി ബന്ധപ്പെട്ട് കഴിഞ്ഞ ദിവസം ചില പത്രങ്ങളില് വാര്ത്ത വന്നിരുന്നു. കൗണ്ടര്ഫോയില് കാണാതായത് കാരണം മൂല്യനിര്ണ്ണയം കഴിഞ്ഞ ഉത്തരക്കടലാസുകള് ഏത് വിദ്യാര്ത്ഥിയുടെതാണെന്ന് തിരിച്ചറിയാന് കഴിയാത്ത സാഹചര്യമാണുള്ളത്. ഇതു കാരണം ഇതുവരെ ഫല പ്രഖ്യാപനം നടത്താനും സാധിച്ചിട്ടില്ല. കൗണ്ടര് ഫോയില് നഷ്ടപ്പെട്ട ഉത്തരക്കടലാസുകള് തിരിച്ചറിയാന് ഇംഗ്ലീഷ് ഒന്നാം ഭാഗത്തിന്റെ കയ്യക്ഷരം പരിശോധിക്കുന്ന രീതിയാണ് അധികതര് ഇപ്പോള് അവലംബിക്കുന്നത്. എന്നാല് ഇത് അശാസ്ത്രീയവും നിയമവിരുദ്ധവുമാണ്. ചില വിദ്യാര്ത്ഥികളെ യൂനിവേഴ്സിറ്റിയിലേക്ക് വിളിച്ച് വരുത്തി ഉത്തരക്കടലാസുകള് തിരിച്ചറിയാനുള്ള ശ്രമവും നടന്നിരുന്നു. കൗണ്ടര് ഫോയില് എലി നശിപ്പിച്ചതാണെന്നാണ് യൂനിവേഴ്സിറ്റി അധികൃതര് നല്കുന്ന വിശദീകരണം. എന്നാല് കൗണ്ടര് ഫോയില് മാത്രം എലി നശിപ്പിച്ചുവെന്ന് പറയുന്നത് വിശ്വാസ യോഗ്യമല്ല. നഷ്ടപ്പെട്ട കൗണ്ടര് ഫോയില് യൂനിവേഴ്സിറ്റിയില് ഉണ്ടോ എന്ന് കണ്ടെത്താന് ഇതുവരെയും ഔദ്യോഗിക പരിശോധന നടത്താത്തതും സംശയാസ്പദമാണ്. കൗണ്ടര് ഫോയിലുകള് കാണാതായി മാസങ്ങള് കഴിഞ്ഞിട്ടും സംഭവം രഹസ്യമായി സൂക്ഷിക്കാന് ശ്രമിച്ച ഉദ്യോഗസ്ഥര്ക്കെതിരെ നടപടി വേണമെന്ന ആവശ്യവും ശക്തമാണ്. യൂനിവേഴ്സിറ്റി സ്റ്റോറുമായി ബന്ധപ്പെട്ട ഉദ്യോഗസ്ഥര്ക്കെതിരെ സമഗ്രമായ അന്വേഷണം നടത്തി നടപടിയെടുക്കണമെന്നാണ് വിദ്യാര്ത്ഥി സംഘടനകള് ആവശ്യപ്പെടുന്നത്. സംഭവവുമായി ബന്ധപ്പെട്ട് സിന്റിക്കേറ്റ് സബ്കമ്മറ്റി അന്വേഷണം നടത്തുന്നുണ്ട്. എന്നാല് സിന്റിക്കേറ്റ് സബ്കമ്മറ്റി നടത്തുന്ന അന്വേഷണത്തില് സംഭവത്തിലെ ദുരൂഹത പുറത്ത് കൊണ്ടുവരാനാവില്ലെന്നും ക്രൈംബ്രാഞ്ച് അന്വേഷണത്തില്ക്കൂടിമാത്രമേ യഥാര്ത്ഥ കുറ്റക്കാരെ കണ്ടെത്താന് സാധിക്കൂ എന്നുമാണ് വിദ്യാര്ത്ഥി സംഘടനകള് പറയുന്നത്.
